HEBREOS 13
13
Nentémakxa ekpeykesáseykekxoho nak apwáxok Dios
1Nágkólyensem kélteme kélásekhamaxkoho nentémol'a anlának ma'a egyáxeg nentémo xamo' nak magya'áseyam. 2Nágkalwagkamák ma'a ektémakxa nak cha'a kélapeykha ektaha nak apkelwayam kélxagkok, hakte nápakha énxet nahan aphésakmohok cha'a apxagkok Dios apchásenneykha neyseksa mey'áseyak.#Gn 18.1-8; 19.1-3; Ro 12.13; 1 P 4.9.
3Kaxén kélwáxok kéxegke kéltaha máxa kélmomaxche xamo' ma'a énxet'ák kélhéseyam nak sẽlpextétamakxa. Kaxén nahan kélwáxok kéxegke m'a énxet'ák kélnaktawáseykegkoho nak, hakte awanchek katnehek kéxegkáxa xa ektaha nak.#Mt 25.35-46.
4Kólteme kélyaheykekxoho ektémakxa nak sẽlyamhopma. Kóltakmelches ma'a ektémakxa nak kélyepetcheykha kéltáwa. Hakte Dios sat eñásesagkohok ma'a ektahakxa enxoho elané ekmaso nak nentémakxa mansexta, tén han ma'a ektahakxa enxoho ektawáseykha m'a ektémakxa nak sẽlyamhopma.
5Nágkólmésho agko' kélwáxok selyakye;#1 Ti 6.6. tásek kapayhekxak aksa kélwáxok ma'a ekwánxa enxoho ekyetna kéxegke, hakte axta aptemék appeywa Dios se'e: “Sekxegexma sat cha'a atnehek xép, meynyewek sat nahan apxakko'.”#Dt 31.6,8; Jos 1.5; Flp 4.11-13. 6Ekeso eñamakxa negkegwagko nak negko'o antehek nempeywa yetlo magya'áseyam se'e:
“Wese' egegkok aptaha sepasmo ko'o;
magwakyek sat ma'a yakwánxa enxoho
hetnésesek énxet.”#Sal 56.3-4,9-11; 118.6.
7Kaxén kélwáxok kéxegke m'a ektaha axta apkelámha apmonye'e kélagkok kélakneykekxexa, cham'a apkellegasama axta kéxegke amya'a eñama nak Dios; Kaxén kélwáxok kéxegke aptamheykegkaxa axta ekwokmoho apkeletsapma, kólyetlakxa m'a ektémakxa axta melya'áseyam xa énxet'ák nak.
8Meyakmagkasemek Jesucristo m'a aptémakxa axta, ekhawo makham keso kaxwo' nak, meyakmagkasemek nahan cha'a aptémakxa. 9Nágkólho aksa kamok kélwáxok kéxegke m'a nelxekmowásamáxche mók ektémakxa énatchásamáxkohol'a. Akke tásek katnésesek ekyennakwayam egwáxok neyseksa nenteme magya'áseyam ma'a Dios segásekhayo nak, megkaxnawok ma'a ektémakxa nak negyetleykekxa kéltémókxa antehek negmayhe antók; hakte axta kapasmók énxet xa kéltémókxa nak antehek.
10Yetneyk negko'o mók ektémakxa m'a negméso nak aksok Dios, cham'a megkapayhawo nak etawagkok ma'a énxet appasmo nak apkelmaxnéseso Dios énxet'ák apagkok, apkeltamheykencha'a nak ma'a nano' tegma appagkanamap nak. 11Esakxohok cha'a aksok kélnaktóso ektekyawa éma agkok kañe' tegma appagkanamap yakwayam egkések Dios ma'a apkemha amonye nak appasmo apkelmaxnéseso Dios énxet'ák apagkok, yakwayam enxoho kólmasésesek apkeltémakxa nak melya'asáxma énxet'ák. Teyp apheykegkaxa énxet#Lv 16.27. cha'a kólwatnegwók xa aksok kélnaktóso ektekyawa nak. 12Ekhawo ektahakxa axta anhan Jesús apmátegweykmo m'a nepyáwa tegma apwányam, yakwayam enxoho etnésesek apkelpagkanamap ma'a ektaha nak énxet'ák apagkok eñama m'a apyegkenma axta éma apagkok. 13Agyetlók hana Jesús nepyáwa tegma, yakwayam enxoho anlegagkohok xamo' ma'a kéltemésesakxa axta. 14Méko negko'o tegma apwányam memassegwayam keso náxop, wánxa agkok, negketamchek eyke negko'o m'a tegma apwányam apyetna nak egmonye. 15Kéméxchek cha'a negko'o óltemésesek apcheymákpoho Dios eñama m'a Jesucristo. Cháxa nelteméseso nak apcheymákpoho Dios ekteme m'a aksok eyéméxko nak agmések Dios. ¡Oltemésesek hana apcheymákpoho Dios yetlo nenxeyenma apwesey.!#Lv 7.12; Sal 50.14,23; Os 14.2. 16Nágkalwagkamák aksa kéxegke kéllané m'a kéltémakxa ektakmela nak, tén han ma'a ektémakxa nak cha'a kélpasmomáxkoho kéxegke m'a ekyetnakxa enxoho aksok kélagkok, hakte cháxa ekleklamo nak apwáxok Dios agmések xa ektéma nak.
17Kólyahakxoho cha'a m'a aptaha nak apkelámha apmonye'e kélagkok kélakneykekxexa. Kólteme cha'a m'a aptemésesakxa enxoho. Hakte mellókaseykmok apkelyampé apkeltakmelchesama kéxegke xa énxet'ák nak, apkelya'ásegkok nahan peya eltennaksek Dios ma'a ektémakxa nak apkeltamheykha. Nágkóltemésesamhóxma neyseksa apkeltamheykha, yakwayam enxoho kalpayhekxak apwáxók neyseksa apkeltamheykha. Hakte megkapasmek kéxegke m'a ektahakxa enxoho apkeltamheykha xa énxet'ák nak, cham'a kellapwagkasa enxoho.
18Hẽlmaxnéses negko'o xa, hakte nakso' nentemesásak negko'o ekyetna megkatnaheykha egwáxok, egmenyék negko'o katakmelhok nentémakxa neyseksa nenlané m'a ekyókxoho aksok nak. 19Awanhek ko'o seltémo helmaxnésesek yakwayam enxoho yohok Dios kañehémhok awakxak makham kélhágkaxa kéxegke.
Ekxénamaxche aksok eltakmela tén han ekxeyenma kélwáxok
20-21Dios segmésamol'a meyke ektahakxa egwáxok sat etnésesek kéxegke kélpéwomo, tén han etnésesek kéxegke eltakmela kéltémakxa neyseksa kéllané m'a ekyókxoho aksok nak, yakwayam enxoho kóllának kéxegke m'a ektémakxa nak apmopmenyého Dios, tén han hentemésesek negko'o xa m'a apmokókxa enxoho hentemésesek, eñama m'a Jesucristo, cham'a Dios apxátekhásekmo axta Wese' egegkok Jesús nepyeseksa énxet'ák apkeletsapma, cham'a Jesús aptaha nak apkeláneykha nekkések apagko',#Is 40.11; Ez 34; Lc 15.4-5; Jn 10.1-16. cham'a aptemésesa axta ekmámnaksoho m'a nelpakhetchásamáxkoho nak Dios megkatnegwayam enéxa eñama m'a ekyegkenamaxche axta éma apagkok.#Ex 24.8; He 10.29. ¡Apcheymákpoho sat cha'a kóltemésesek Cristo! Katnahagkok sat.
22Elyáxeg, eltamhok ko'o megkalleklamagkek kéxegke kélháxenmo s'e sektahakxa nak sekpeywa ekyakwaté sektáxéseso kéxegke yakwayam enxoho kalwaskakkásekxohok. 23Emenyék ko'o altennaksek kéxegke kélyenyékxo Timoteo, cham'a apmákpo axta; apwakteyk sat agkok heykxa Timoteo sekhakxa ko'o, eyntemekxohok sat sektaha enxoho meyk'a kéxegke.
24Kóltennés sat seyáphásesa ko'o ekxeyenma ewáxok apyókxoho apkelámha amonye'e nak kélakneykekxexa, tén han ma'a apyókxoho ektaha nak Dios énxet'ák apagkok. Apcháphásesek ekxeyenma apwáxók kélhágkaxa kéxegke ẽlyáxeg apheykha nak Italia.
25Dios sat etnehek apméso naksa kéxegke m'a ektémakxa nak segemleykekxoho.
Currently Selected:
HEBREOS 13: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
