EFESIOS 4
4
Meyke nexpanchásamáxche eñama Espíritu
1Ekmések ko'o sekpeywa kéxegke keso sekha nak kaxwo' sẽlpextétamakxa seltamho kóltehek kéxegke m'a eyéméxchexa nak antehek negko'o ektaha axta sẽlwoneykha Dios, ekhawo m'a ektahakxa axta apkelwónencha'a Dios kéxegke. 2Kólteme megkeymáxkoho kélwáxok, kólteme nahan ektakmeleykha kélwáxok; kólteme megkólpekhésamaxche, kólteme nahan kélenmáxamáxkoho kélmók yetlo kélásekhayo.#Col 3.12-13. 3Kóllenxánem cha'a kóltehek kéxegke meyke kélexpanchásamáxche yetlo appasmo m'a Espíritu Santo, tén han eñama m'a meyke ektahakxa egwáxok ektaha nak ekteméseso megkólexpanchásamáxche kéxegke. 4Negko'o nenteme wánxa xama Cristo apyókxa, wánxa nahan xama Espíritu, ekhawo m'a ektahakxa axta anhan kéxegkáxa apkelwónencha'a Dios yakwayam kóltehek wánxa xama kélhaxneykha. 5Apwánxa xama Wese' egegkok, wánxa nahan xama magya'áseyam, wánxa nahan xama yakpasama yegmen. 6Apwánxa xama Dios aptaha nak Egyap nenxámokxoho, aptaha nak Wese' apwányam nepyeseksa apyókxoho énxet, aptamháha cha'a Dios eñama segásenneykekxa negyókxoho nak, apheyk nahan egwáxok negyókxoho nak.
7Wánxa agkok, negyókxoho axta nelxawágkok negko'o negmowána eñama Dios, cham'a apkepmenyého axta hegmések Cristo. 8Ekeso eñamakxa ektéma nak eknaktáxésamaxche weykcha'áhak se'e;
“Apmeyeykekxeyk axta néten,
apnaklákxók axta xamo' ma'a
ektaha axta apteméseso apkelmomap,
apmések axta nahan apkelmopwancha'a énxet'ák.”#Sal 68.18.
9¿Yaksak ekxeyenma xa “apmeyeykekxo axta néten”? Xeyenmak ma'a apwéweykento axta sekxo' keso náxop, ektahakxa nak kónegók agko'. 10Ektahakxa netno' agko' néten axta nahan apmeyeykekxak ma'a énxet apwéweykento axta, yakwayam enxoho etnehek apsawheykekxoho Cristo ekyókxoho aksok ekhéyak nak. 11Cristo axta anhan apkelmeyáseyak nápakha énxet yakwayam etnahagkok seykha amya'a, keñe axta anhan nápakha énxet'ák apkelmeyásegko yakwayam etnahagkok Dios appeywa apkellegaso, keñe axta anhan apkelmeyásegko nápakha énxet'ák yakwayam etnahagkok apkeltenneykha tásek amya'a, keñe axta anhan nápakha énxet'ák apkelmeyásegko yakwayam etnahagkok apkelmeykha apnámokkok kélakneykekxexa, tén han ma'a énxet'ák apkelxekmóso nak apnámokkok. 12Cháxa ektahakxa axta apkelánesákxo apkeltamheykha m'a ektaha nak énxet'ák apagkok, yakwayam enxoho elanaksek aksok apnámokkok, cham'a eyéméxchexa nak etnehek apkeltamheykha énxet'ák apteme nak melya'áseyam, yakwayam enxoho nahan ewánegkesek ma'a Cristo apyókxa, 13ekwokmoho nentaha meyke nelexpanchásamáxche eñama m'a magya'áseyam nak, tén han eñama m'a negyekpelchágwayam nak Dios Apketche. Keñe sat keynnakwók negko'o nenteme magya'áseyam, aghágwakxohok agko' sat ma'a aptémakxa nak Cristo. 14Mantehek sat kaxwo' negko'o máxa sakcha'a, ekmanyehel'a kayakmagkasek ektahakxa elchetamso awáxok, ektemésesamol'a ekhó exchahayam segyegeyak ma'a ekyókxoho ektémakxa nak axnagkok nelxekmowásamáxche, cham'a sakcha'a eyhayol'a elyexanchesha m'a énxet'ák apkelya'áseykegkoho nak apkeltémakxa hẽlyexanchesha, cham'a énxet'ák apkelyetleykekxo nak ámay senxegánegkesamo nak. 15Akke tásek antehek negko'o m'a ekmámnaksoho nak nempeywa neyseksók nelásekhamaxkoho, kéméxchek negko'o agyanchesagkohok nenteme magya'áseyam ekwokmoho neghagwákxoho Cristo aptaha nak apkemha apmonye nepyeseksa Dios énxet'ák apagkok. 16Cristo nahan keñamak ektakmela ekyepetcheykekxa mók ektémakxa nak negyókxa. Tásek nahan ekyepetcheykekxa mók xa ekyókxoho nak eñama m'a ekyepetcheyo nak mók, tásek agkok nahan eltamheykha ekyókxoho ekhéyak nak negyókxa, kaxñegkok nahan éktegeyák ekyókxoho nak, kayawagkok nahan ektémakxa nak elásekhamaxkoho.#Col 2.19.
Axnagkok nentémakxa eñama Cristo
17Elpakhetchesek ko'o kéxegke yetlo sekxeyenma Wese' egegkok apwesey, eltamhok ko'o megkóltemekxak makham ma'a apkeltémakxa nak énxet'ák melya'áseyak nak Dios, apkelyetleykekxo nak ma'a ektémakxa nak elchetamso apwáxók ektaha nak mékoho, 18melya'ásegkok nahan aksok. Megkaweykekxohok nahan axnagkok nentémakxa eñama Dios xa énxet'ák nak, hakte méko nahan apkelya'áseyak eñama m'a elyennakte apwáxók. 19Kelyennaktegkek apwáxók, apchahayók ekmoma apwáxók ma'a aksok ekmaso apkelyespagkamakxa nak, eyeykhasakpohok nahan cha'a apkeláneyak ma'a nentémakxa ekmanyása nak.#Ro 1.21-25. 20Wánxa agkok megkaltámeyagkek eyke kéxegke ekmaso nentémakxa eñama enxoho apxekmóso m'a Cristo, 21cham'a eyámnaksoho enxoho kéllegaya kéxegke kéltenneykha amya'a ekxeyenma nak Cristo, cham'a eyámnaksoho enxoho anhan eltámeyeykegko kéxegke eñama Cristo m'a ektémakxa nak amya'a ekmámnaksoho. 22Kólwatés kéllané kéxegke m'a nano' nentémakxa axta,#Col 3.9. cham'a eyesógwokmoho agko' nak eñama ektawáseykha m'a aksok ekmaso ekyespagko nak. 23Kéméxchek kéxegke kóltemesásekxak axnagkok ma'a ektémakxa nak ekyetneykha kélaktek, tén han ma'a ektémakxa nak ekpakméteykha kélwáxok, 24kóltemekxa nahan kéxegke axnagkok kéltémakxa ektémol'a antaxnekxak nentaxno aphaxnagkok,#Col 3.10. cham'a elánamáxche nak eñama Dios apmopmenyého,#Gn 1.26. cham'a ekwetamaxkohol'a anhan nentaha nentémakxa ekpéwomo, tén han nentémakxa eyáxñeyo eñama m'a amya'a ekmámnaksoho eñama nak Dios.
25Nágkólteme kaxwo' kéxegke kélmowána amya'a, kólteme cha'a kaxwo' ekmámnaksoho kélpeywa kóllának kélmók,#Zac 8.16. hakte negyókxoho nenteme neleñama Cristo apyókxa ektaha nak wánxa xama.#Ro 12.5.
26Kéllókek agkok, nágkóllána megkólya'asáxma,#Sal 4.4; Stg 1.19-20. kóllenxánem nahan cha'a megkólwagkasók kéllo xama ekhem. 27Nágkólho aksa kalyentamaxkohok keykkónek kelyekhama'.
28Enxet apmenyexmo axta, elwatés apmenyexma, etneykha, etakmelchesho nahan apkelané m'a aptamheykha, yakwayam enxoho keytek apmésakxa aksok ma'a énxet meyke nak aksok apagkok.
29Nágkólteme cha'a ekmaso kélpeywa, wánxa agkok kólteme cha'a ektakmela kélpeywa ekmowána nak kapasmok énxet'ák, ekmésamol'a anhan aksok eltakmela eleñama néten ma'a énxet ektahakxa enxoho apháxenmo. 30Nágkóllapwagkas aksa Espíritu Santo apkeñama nak Dios, cham'a kélkahásamáxko nak kéxegke yakwayam enxoho kólyekpelchaxkohok kélteme nak Dios énxet'ák apagkok, cham'a ekwa'a sat ekhem yakwánxa hẽlwagkasek teyp.
31Kólwatés kélteme m'a ektémakxa nak eknatheyáseykha kélwáxok, tén han ma'a ektémakxa nak ekmanyehe kóllók, kólwatés kéllo, kólwatés nahan ma'a kélpaxameykha nak, tén han ma'a ekmaso nak kélpeywa kóllának kélmók, tén han ma'a ekyókxoho ektémakxa nak negmámenyého anlók. 32Kólteme ektakmeleykha kélwáxok, kólteme nahan apmopyósa kóllanok kélmók, nágkólyakmagkásekxa cha'a aptemésesakxa kélmók, ekhawo aptahakxa axta Dios meyakmagkáseykekxo nentémakxa eñama m'a Cristo.#Col 3.13.
Currently Selected:
EFESIOS 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
