EFESIOS 5
5
Eyéméxchexa etnehek énxet'ák ektaha nak Dios apketchek
1Kóllenxánem kólhágwakxohok ma'a aptémakxa nak Dios, kéxegke kélteme nak Dios apketchek apkelásekhayo. 2kóllenxanmoho kélteme kélásekhamaxkoho, ekhawo m'a ektémakxa axta segásekhayo Cristo, apyenyawákpók axta apagko' yakwayam etnehek segyanmaga negko'o ektémol'a aksok ektekyawa kélméso Dios, tén han ma'a ektémol'a aksok ekwatnamáxche ekmátsal'a etekhánek ekpakneyam Dios.#Ex 29.18; Sal 40.6.
3Kéxegke kélteme nak Dios énxet'ák apagkok, megkatakmelak kólxének ma'a ekmaso nak nentémakxa mansexta xama enxoho, tén han ma'a mansexta ekmanyása nak, megkatakmelak nahan kólxének mansexta kélámenyéxa enxoho kóllának. 4Nágkólteme nahan ekmaso kélpeywa, tén han ma'a nempeywa ekyéháxma nak, tén han ma'a ekmanyása nak nempeywa; hakte megkapayhawok antehek nempeywa xa ektaha nak; akke tásek ma'a nelteméseso nak apcheymákpoho Dios. 5kélya'ásegkok eyke kaxwo' kéxegke m'a énxet ektahakxa enxoho apkelané ekmaso nentémakxa mansexta, esenhan ma'a apkelané enxoho nentémakxa ekmanyása nak, tén han ma'a apkelmeyókásamákpoho nak apxakko' aksok (ektaha nak ekhawo m'a nelpeykesamo nak kéleykmáseso), megkawakxók sat apkelteme Wese' apwányam apagkok Cristo tén han Dios xa énxet'ák nak. 6Nágkólho aksa kalyexanchesha kéxegke m'a énxet apkelpeywa ektaha nak mékoho, hakte cháxa keñamak ekxegakmo nak yakwayam ellegásesagkohok ekmaso agko' Dios xa énxet'ák nak, cham'a melyaheykekxoho nak Dios. 7Nágkólpaxkaha aksa kéxegke xa énxet'ák nak.
8Axta kólya'áseykegkok kéxegke Dios, máxa axta entemék kélheykencha'a enxoho ekyaktesakxaxma, wánxa agkok kéltemék eyke kaxwo' kélyepetcheyo Wese' egegkok, ékeso eñamakxa kélheyncha'a nak neyseksa elseyexma, kólteme kéxegke m'a apkeltémakxa nak énxet'ák apheykha nak neyseksa elseyexma. 9Hakte katekkeshok cha'a ekxámokxoho nentémakxa ektakmela xa elseyexma nak, tén han ma'a nentémakxa ekpéwomo nak, tén han ma'a nentémakxa ekmámnaksoho nak. 10Kóllenxánem kóllának ma'a ekleklamókxa nak apwáxok antehek Wese' egegkok. 11Nágkólweyhénekxoho aksa kéxegke aksok mékoho apkeláneyak ma'a énxet'ák apkeleñama nak neyseksa ekyaktesakxaxma, tásek eyke kólxekmósek apyókxoho énxet'ák yakwayam enxoho elya'ásegwók apkeltémakxa xa énxet'ák nak. 12Kawomhok nahan negko'o negmegkakto anxének aksok apkelyexamakpoho nak apkeláneyak xa énxet'ák nak. 13Yáxñakxoho agkok nahan entahak ekwetamaxche xa aksok nak eñama ekpekkeneykekxa yáxñakxoho m'a elseyexma, tásek nahan cha'a katnehek ekwetamaxche ektémakxa. 14hakte elseyexma kapekkenekxak yáxñakxoho. Ekeso eñamakxa ektéma nak amya'a s'e:
“Exatakha, xeyep ektaha nak apteyenma,
exnekxa néten nepyeseksa énxet'ák
ektaha nak apkeletsapma,
Cristo sat yelsásesexma exchep.”
15Kóltakmelches kéxegke xa kéltémakxa ektakmela nak. Nágkólteme megkólya'áseyak aksok, wánxa agkok, kólteme ekha kélya'áseyak. 16Kólyentamaxkoho cha'a kóllának aksok eltakmela m'a kélewagkexa enxoho cha'a kóllána', hakte yentexek kaxwo' keso negwánxa nak.#Col 4.5. 17Nágkólteme aksa megkólya'áseyak aksok; kóllenxánem cha'a kólya'ásegwomhok ektémakxa nak Wese' egegkok apmopmenyého. 18Nágkólteme anmenáto, hakte katnéseshok cha'a énxet memágwayam aptémakxa xa; wánxa agkok, kólho epékesesagkok kéltémakxa Espíritu Santo. 19Kóltennasha cha'a kélmók ma'a eñama nak salmos, cham'a kélpakhetchásexkoho enxoho, yetlo m'a negmeneykmaso eleñama nak Dios, tén han ma'a negmeneykmaso aptekkeso nak Espíritu, kólmeneykmes, kólteméses nahan apcheymákpoho Wese' egegkok ekweykmoho kañók agko' kélwáxok. 20Kólmés cha'a ekxeyenma kélwáxok Dios Egyap, cham'a ektahakxa enxoho cha'a kéxegke yetlo kélxeyenma Jesucristo Wese' egegkok apwesey.#Col 3.16-17.
Nentémakxa neltakmelcheso egketchek tén han entáwa
21Kólteme cha'a kélyaheykekxoho kélmók eñama m'a kélteme nak kéláyo Cristo.
22Kelán'ák ekha nak anakteyegka'a, kólyahakxoho cha'a kélnakteyegka'a,#Col 3.18; 1 P 3.1. ekhawo m'a ektémakxa nak kélyaheykekxoho Wese' egegkok. 23Hakte énxet ekha nak aptáwa, apteme apkemha apmonye agkok ma'a aptáwa, ekhawo ektémakxa nak Cristo apteme apkemha apmonye nepyeseksa Dios énxet'ák apagkok. Cristo nahan apteme apkelwagkaso teyp ma'a ektaha nak Dios énxet'ák apagkok, hakte cháxa Cristo apyókxa xa. 24Kéméxchek nahan katnehek elyaheykekxoho agko' atáwa kelán'a ekha nak atáwa, ekhawo aptamheykegkaxa nak Dios énxet'ák apagkok apkelyaheykekxoho m'a Cristo.
25Enxet'ák ekha nak apnakteyegka'a, kólásekhoho kélnakteyegka'a,#Col 3.19; 1 P 3.7. ekhawo ektémakxa axta apkelásekhayo Cristo m'a ektaha nak Dios énxet'ák apagkok, apmeyásekpók axta apagko' yakwayam etnehek apyanmaga xa Dios énxet'ák apagkok nak. 26Apkelanak axta Cristo xa yakwayam enxoho etnésesek apkelpagkanamap ma'a ektaha nak Dios énxet'ák apagkok, aptemésesek axta anhan meyke ekyepetche xama aksok ekmanyása eñama m'a appeywa nak, tén han eñama m'a apkelyenyeso axta neygmen, 27yakwayam enxoho etnésesek apkeleymákpoho enaklakxohok apagko' ma'a aphamakxa nak, meyke ekyepetche xama aksok ekmanyása, esenhan ma'a aksok ekmaso nak, tén han meyke m'a xama aksok ekhawo nak xa, wánxa agkok apkelpagkanamap aksa etnésesagkok, tén han etnésesagkok apkelpéwomo.#Col 1.22; Ap 21.2,9. 28Ekhawo ektémakxa nak ma'a énxet ekha nak aptáwa, yásekhohok ma'a apyókxa nak, kéméxchek nahan etnehek apchásekhayo aptáwa xa ektaha nak. Enxet ektahakxa enxoho apchásekhayo aptáwa, etnehek nahan apchásekhamakpekxoho apagko'. 29Hakte méko kataknók ma'a ektémakxa enxoho ekyókxa, kólagkok aksa ekto, kóltakmelchesek nahan, ekhawo aptemésesamakxa nak Cristo m'a ektaha nak Dios énxet'ák apagkok, 30hakte cháxa ektaha Cristo apyókxa xa, negko'o anhan nenteme neleñama xa Cristo apyókxa nak. 31“Ekeso eñamakxa elyamhopa enxoho énxet, eyenyók sat ma'a apyap tén han ma'a egken, yakwayam etnehek apyepetcheyo wánxa m'a aptáwa, katnehek sat máxa xama negyókxal'a, cháxa ánet nak.”#Gn 2.24. 32Cháxa ektaha nak ekpowásamáxkoho agko' xa, ekxénchek ko'o m'a Cristo tén han ma'a Dios énxet'ák apagkok nak. 33Akke ekxénak nahan ko'o eyéméxko kóltehek kéxegke kélásekhayo m'a kélnakteyegka'a nak, ekhawo m'a ektémakxa nak kélásekhamaxchekxoho kélagko', hawók nahan kelán'ák ekha nak anakteyegka'a, kólteme ekha kélyaheykekxoho kélnakteyegka'a.
Currently Selected:
EFESIOS 5: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
