EFESIOS 3
3
Pablo kélásennagko eswok tásek amya'a nepyeseksa énxet'ák metnaha nak judíos
1Ekeso eñamakxa sekha nak kaxwo' ko'o sẽlpextétamakxa eñama Cristo Jesús, ko'o Pablo, eñama selané sektamheykha yakwayam apasmok kéxegke megkóltaha nak judíos. 2Kélya'ásegkok eyke kéxegke aptaha Dios seyásennagko yakwayam alának se'e sektamheykha nak, yakwayam apasmok kéxegke, eñama m'a ektémakxa nak seyemleykekxoho Dios.#Col 1.25. 3Apxekmósek axta Dios ektémakxa aksok apkeláneykekxa ektaha nak megkótémaxche, ey'asásegwokmek axta#Gá 1.12. ko'o, ekhawo m'a sektahakxa axta sektáxéseso ekyakwate kéxegke. 4Kélyetsetmeyk agkok xa, kólyekpelchágwók sat sekya'ásegkoho ko'o m'a amya'a ekpowásamáxkoho eñama nak Cristo. 5Axta kólhayok elyekpelkohok énxet'ák xa amya'a ekpowásamáxkoho nak, cham'a nano' axta, wánxa agkok, apxekmósek eyke kaxwo' Dios ma'a seykha amya'a apkelpagkanamap nak, tén han ma'a énxet'ák ektaha nak apkellegaso appeywa eñama m'a Espíritu apagkok nak. 6Keso ektaha nak amya'a ekpowásamáxkoho s'e: kaxhok sat mók apkelxawe aksok kélpagkancheso m'a énxet'ák metnaha nak judíos tén han ma'a énxet'ák judíos, eñama m'a tásek amya'a nak, hakte hawók mók appasmeykekxa Cristo apyókxa, weykekxók nahan apkelxaweyak ma'a apekkeneykekxa axta appeywa Dios eñama Cristo Jesús.#Col 1.26-27.
7Ekxawáyak axta aksa ko'o yakwayam atnehek seltenneykha s'e amya'a nak, eñama segkéso naksa m'a Dios, eñama nahan ma'a ektémakxa nak ektamheykha Dios apmopwána. 8Ko'o eyke sekteme kónegók ahagko' nepyeseksa m'a elyáxeg'a ektaha nak Dios énxet'ák#1 Co 15.9. apagkok, cham'a apteme nak kóneg; Egkések axta eyke aksa ko'o Dios ektakmela sektamheykha yakwayam atnehek seltennáseykha amya'a ektakmela m'a énxet'ák metnaha nak judíos cham'a amya'a ekxeyenma nak ekxámokma agko' aksok eltakmela eleñama nak Cristo. 9Eyásennakkek axta anhan ko'o Dios yakwayam alya'asásegwók apyókxoho énxet'ák ma'a apmaheyókxa nak elának Dios ektaha nak ekpowásamáxkoho, cham'a aptéma axta cha'a appósamo Dios nano' axta, aptaha nak apkelané ekyókxoho aksok. 10Temegkek axta xa yakwayam enxoho elya'ásegwók ekyókxoho ektémakxa apya'áseykegkoho Dios ma'a, Dios apkelásenneykha ekha nak apkelmopwancha'a, tén han ma'a ekha nak kélyaheykekxoho m'a néten eñama apxekmóso m'a Dios énxet'ák apagkok nak. 11Apkelanak axta Dios xa eñama m'a megkamassegwayam nak apmaheyókxa etnehek, cham'a apsawhawo axta apkelana Wese' egegkok Jesucristo, eñama apchásenneykekxa Dios. 12Cristo nahan keñamak nentaha negko'o meyke sẽlya'ásekhaxma yakwayam agyo'ókxak Dios, yetlo megkatnaheykha egwáxok eñama m'a magya'áseyam nak Dios. 13Ekeso eñamakxa seltamho nak ko'o megkalleklágwomek kéxegke eñama s'e seklegeykegkoho nak ko'o kéxegke eñamakxa, yakwayam kalpeykásekxak kélwáxok akke kéxegke xa seklegeykegkoho nak ko'o.
Cristo segásekhayo
14Ekeso eñamakxa seltekxeya nak ko'o etapnák xóp nápakto' Dios Egyap, 15cham'a apmésama nak apwesey apyókxoho ektaha nak énxet'ák apagkok apheykha nak néten tén han keso náxop. 16Elmaxnakkek ko'o Dios Egyap seltamho epekkenchesek kélwáxok kéxegke kélmowána, tén han ma'a kélwaskápeykekxoho eñama nak apméso Espíritu apkeñama nak Dios, eleñama nak ma'a ekheykegkaxa nak ekxámokma agko' aksok apagkok eltakmela eleñama nak néten. 17Elmaxnakkek nahan ko'o Dios seltamho exek kélwáxok kéxegke Cristo eñama xa megkólya'áseyam nak. Keñe sat keytek kéxegke kélwaskapma tén han kóllenxanmohok kélyennaktésamo kélteme kélásekhamaxkoho. 18kólya'ásegwomhok sat kéxegke xamo' énxet'ák apteme nak melya'áseyam, ekwánxa nak ekyawe segásekhayo Cristo, tén han ma'a ekwánxa nak ekwegkakxa, tén han ma'a ekwánxa nak ekweykmoho kañók agko', tén han ma'a ekwánxa nak ekweykmoho netno' agko'. 19Emenyék ko'o kólya'ásegwomhok kéxegke xa Cristo segásekhayo ektaha nak ekyawe agko', megkaxnawok ekyawe m'a ekweykenxal'a negko'o ekxeyenma egwáxok, yakwayam enxoho kalánhok agko' kélwáxok kéxegke m'a aptémakxa nak Dios.
20Apcheymákpoho sat kaxwo' kóltemésesek Dios, aptaha nak apmopwána eyeykhásamhok elának ma'a ekwánxa enxoho nelmaxnagko negko'o esenhan ma'a ekwánxa enxoho ekxeyenma egwáxok, eñama m'a apmopwána ektamheyncha'a nak negyeseksa negko'o. 21¡Apcheymákpoho sat kóltemésesek Dios nepyeseksa m'a ektaha nak Dios énxet'ák apagkok eñama m'a Cristo Jesús, megkatnegwayam enéxa! Katnahagkok sat.
Currently Selected:
EFESIOS 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
