EFESIOS 2
2
Nelwagkásamáxche teyp eñama segásekhayo Dios
1Máxa kélhapák axta kéxegke nano', eñama m'a kéltémakxa ekmaso axta, tén han eñama m'a megkólya'asáxma axta, 2hakte kélyetlamchek axta kéxegke ektémakxa nak keso náxop, kélláneyak axta anhan kéxegke m'a ekyespagkamakxa nak kelyekhama' wese', eláneykencha'a nak aksok ekha elmowancha'a ekheykha tekhenxet, cham'a elyáteyagkoho nak énxet'ák aptaha nak melyaheykekxoho Dios.#Ef 6.11-12; Col 1.13. 3Nentemegkek axta anhan negko'oxa negyókxoho xa nano' nentémakxa nak, negyetleykekxo m'a aksok negyespagkamakxa nak, ólyahakxohok axta cha'a ekyókxoho aksok negmokókxa enxoho anlána', negyetleykekxeyk axta ektémakxa elchetamso egwáxok. Axta keñamak eyéméxko henlegásesagkohok ekmaso agko' Dios#Col 3.6. eñama xa nentémakxa ekmaso nak, ekhawo nahan ma'a apxámokxoho énxet'ák nak. 4Wánxa agkok, awanhek eyke segemleykekxoho Dios, awanhek nahan segásekhayo, 5ékeso eñamakxa segmeyáseykxo nak ekyennakte egnenya'ák xamo' Cristo, cham'a nentémakxa axta makham máxa eghapák eñama m'a nentémakxa axta mólya'asáxma.#Col 2.13. Apmések axta aksa kéxegke Dios kélwagkásamáxche teyp eñama m'a ektémakxa nak segemleykekxoho. 6Ennakxátekhásekmek axta negko'o Dios xamo' Cristo, eghésakxeyk axta nahan xamo' Cristo m'a néten. 7Apkelanak axta Dios xa, yakwayam enxoho kataxchek ma'a egmonye sat, ekyetna ekyawe agko' segásekhayo negko'o, tén han exekmósek aptaha segméso naksa m'a ektémakxa nak segemleykekxoho eñama Cristo Jesús. 8Kélwagkásexchek axta kéxegke teyp eñama m'a apméso naksa axta kéxegke Dios ma'a ektémakxa nak segemleykekxoho, eñama m'a kélteme nak megkólya'áseyam. Háwe eyke kélweté kélagko' kéxegke xa, kélxawé axta eñama Dios apméso. 9Háwe eñama aksok kéllané xa kélwagkásamáxche teyp nak, yakwayam enxoho méko kawának keyxkohok awáxok. 10hakte Dios axta aptaha senlané negko'o; enlanak axta negko'o eñama m'a Cristo Jesús yakwayam enxoho anlának ma'a nentamheykha ektakmela nak, ekhawo m'a apkeláneykekxa apagko' axta Dios ma'a nano' axta.
Meyke ektahakxa egwáxok ekyetna nak negko'o eñama Cristo
11Kéxegke megkóltaha nak Judíos, apkeltéma nak énxet'ák judíos “meyke kélkahaso”, (cham'a énxet'ák judíos apkelkahásesamol'a apyempehek énxet, apkeltamhomakpekxoho nak apancha'awók “ekha kélkahaso apyempehek”), 12kaxénwakxoho kélwáxok kélheykencha'a axta kéxegke meyke Cristo nano' axta, axta kólpáxakxók kéxegke énxet'ák Israel, axta nahan kaweykekxohok kéxegke m'a ekhémo mók nelpakhetchásamáxkoho Dios nak, axta nahan kaweykekxohok kéxegke m'a sempekkencháseykekxa axta appeywa Dios. Kélheykha axta kéxegke keso náxop meyke Dios, tén han meyke elhaxneykha kélwáxok. 13Kaxwo' eyke kéltemék kéxegke kélyepetcheyo Cristo Jesús eñama m'a apyegkenma axta éma apagkok. Makhawók axta kélheykha kéxegke Dios, kéltemesásekxeyk eyke kaxwo' keto' Dios kéxegke. 14Cristo apteme senteméseso negko'o meyke ektahakxa egwáxok#Jn 14.27. aptaha axta nahan appaxakteyáseykekxa énxet'ák judíos ma'a énxet'ák metnaha nak judíos, cham'a apmasésa axta ekhó kélhaxta nepyeseksa xa énxet'ák nak. Apyókxa axta keñamak 15Cristo apmasésakmo m'a ektémakxa axta segánamakxa eñama judíos,#Col 2.14. ekha axta eltémókxa antehek, tén han ma'a kéltémókxa nak antehek. Aptemesásekxeyk axta Cristo apyepetcheyo pók énxet'ák judíos, tén han ma'a énxet'ák metnaha nak judíos, aptemesásekxeyk axta wánxa xama énxet'ák aphaxnancha'ák eñama apyepetcheyo Cristo. Cháxa aptahakxa axta Cristo apmasésa ektémakxa axta nelenmexamaxche xa. 16Apketsapma néten aksok ektegyéso axta keñamak Cristo apmasésakmo apkelenmexamap énxet'ák judíos tén han ma'a énxet'ák metnaha nak judíos, aptemesásekxeyk axta nahan Cristo apkelásekheykekxoho Dios xa énxet'ák nak, aptemesásekxeyk axta anhan wánxa xama xa énxet'ák nak, ektémol'a wánxa xama negyókxa.#Col 1.20.
17Apwa'ak axta Cristo yakwayam hensókásegmak amya'a ektakmela eñamakxa nak meyke ektahakxa egwáxok negyókxoho nak, ekhawo nak han kéxegkáxa kélheykencha'a axta makhawók Dios, tén han ma'a énxet'ák apheykha axta keto' Dios.#Is 57.19. 18Cristo nahan keñamak negkegwagko negko'o antehek negyepetcheyo Dios Egyap negyókxoho nak, judíos tén han ma'a énxet'ák metnaha nak judíos, eñama m'a aptaha nak apwánxa xama Espíritu. 19Ekeso eñamakxa ekmassa nak kéltaha kéxegke pók énxet'ák, massék kélheyncha'a kéxegke megkatnahakxa xapop kélagkok, kaxwo' eyke wákxók kéxegke m'a apkeltémakxa nak Dios énxet'ák apagkok, kéltemék nahan Dios apnámokkok. 20Kéxegke kélteme máxa xama tegma apkelánamapla'a néten tegma apówhak ekyennaktesol'a tegma, cham'a aptaha nak seykha amya'a, tén han ma'a énxet'ák Dios appeywa apkellegaso nak. Jesucristo eyke apteme meteymog apyennakteso xa tegma nak.#Is 28.16; Mt 21.42. 21Cristo apyepetche nahan keñamak peya epenchesakpohok apkelánamap xa tegma nak, cham'a ekyókxoho ektémakxa nak apkelánamap, ekwokmoho aptaha tegma appagkanamap, tén han apyepetcheyo Wese' egegkok. 22Ekhawo ektémakxa nak han kéxegkáxa, Cristo kélyepetcheyo keñamak kéltaha kélyepetcheykekxa kélmók, yakwayam enxoho kóltehek tegma appagkanamap#1 Co 3.16-17; 1 P 2.4-5. aphamakxa Dios eñama m'a Espíritu apagkok nak.
Currently Selected:
EFESIOS 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
