1 TESALONICENSES 1
1
Pablo ekxeyenma apwáxok
1Ko'o Pablo, yetlo selxegexma'a Silvano, tén han Timoteo. Apchakneykekxexa ẽlyáxeg'a tegma apwányam Tesalónica#Hch 17.1. ektáxesásak ko'o s'e weykcha'áhak nak, cham'a ektaha nak apkelyepetcheyo Dios Egyap tén han Wese' egegkok Jesucristo. Dios sat etnehek apméso naksa kéxegke m'a ektémakxa nak segemleykekxoho, tén han egkések meyke ektahakxa kélwáxok kéxegke.
Ektémakxa axta apteme melya'áseyam énxet'ák apheykha Tesalónica
2Agméshok cha'a negko'o ekxeyenma egwáxok Dios kéxegke eñamakxa, kaxénhok cha'a egwáxok kéxegke nentaha enxoho nempeywa nelmaxnagko. 3Mehẽlwagkágwokmok cha'a negko'o ekxeyenma egwáxok kéxegke nápakto' Dios Egyap, cham'a kéltamheykencha'a nak yetlo ekyawe agko' megkólya'áseyam neyseksók kéltamheykha, tén han kéltamheykencha'a yetlo ekyawe agko' kélásekhayo, mehẽlwagkágweykmok nahan ektémakxa nak ekpasmo yakwayam kólenmaxaxkohok kéllegeykegkoho yetlo kélwaskápeykekxoho m'a kélhaxneykha nak Wese' egegkok Jesucristo. 4Elyáxeg, apkelásekhayók kéxegke Dios, negya'ásegkok nahan negko'o Dios axta apkelyéseykha kéxegke. 5Xama axta nenlegasa negko'o kéxegke tásek amya'a, háwe axta nempakmeteykha aksa, yetlo Espíritu Santo apmopwána axta eyke, tén han yetlo negya'áseykegkoho agko' ektaha ekmámnaksoho s'e amya'a nak. Kélya'ásegkok kéxegke nentémakxa axta cha'a negko'o kélnepyeseksa kéxegke, neltémo ampasmok.
6Kéxegke axta eyke kélyetlákxak nentémakxa negko'o, kélyetleykekxek nahan aptémakxa m'a Wese' egegkok Jesús, yetlo ekpayheykekxa kélwáxok axta nahan kélmak takha' tásek amya'a, cham'a ekpayheykekxa kélwáxok apmésamo axta cha'a kéxegke Espíritu Santo, neyseksók eykhe ekyawe kéllegeykegkoho.#Hch 17.5-9. 7Axta keñamak apwet'a ektakmela kéltémakxa kéxegke apyókxoho énxet'ák ekha nak melya'áseyam apheykha m'a yókxexma Macedonia tén han Acaya. 8Kéxegke axta kéltekkeso xa amya'a eñama nak Wese' egegkok, cháxa ekpayhekxo nak, háwe axta ekwánxa agkok ekpayhekxo m'a yókxexma Macedonia tén han ma'a Acaya, wákxók axta eyke anhan ma'a ekyókxoho yókxexma nak, legáxchek axta nahan amya'a ekyetna kéxegke megkólya'áseyam Dios. Ekeso eñamakxa megkeyméxko nak anxének negko'o ektémakxa nak megkólya'áseyam kéxegke. 9Hakte apkelxeyenma apancha'awok axta eyke nentaha axta negko'o meyk'a kéxegke xa énxet'ák nak, exénhok nahan cha'a ektakmela axta sẽlapeykha kéxegke, exénhok nahan cha'a ektémakxa kélyenseykmo kéxegke kélpeykesamo kéleykmáseso, yakwayam kólyetlakxak ma'a Dios memassegwayam aptaha nak apmámnaksoho. 10Exénhok nahan cha'a ektémakxa nak kélhaxneykha kéxegke yakwayam ewatak makham Jesús apkenyekta néten, Dios Apketche, aptaha axta nahan apxátekháseyam. Jesús apteme sẽlwagkaso teyp ekyentaxnakxa nak Dios senlegasáseykegkoho ekxegakmo nak.
Currently Selected:
1 TESALONICENSES 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
