LOS HECHOS 26
26
Pablo apkeltennaso ektémakxa aksok eksexnenagko m'a wese' Agripa
1Aptahak axta wese' Agripa apcháneya Pablo s'e:
—Apwanchek yátegmowagkok xép ektahakxa nak amya'a apxénamap.
Apya'ásek axta néten apmek Pablo. Aptahak axta appakmeta s'e: 2“Awanhek ekpayheykekxa ko'o ewáxok sekmoko apakmétek nápakto' xép wese' Agripa, yakwayam enxoho wátegmowagkok aptahakxa nak sexeyenma apmoko hesexnena' énxet'ák judíos, 3Xép ekyagwánxa agkok apya'áseykegkoho ekyóxoho m'a apkeltémakxa nak énxet'ák judíos, apya'ásegkok nahan ma'a nenxéna axta. Ekeso eñamakxa seltamho nak ko'o yeyxhok xép sekpeywa yetlo mepekhésamap.
Aptémakxa Pablo amonye apyakmagkaso apwáxok
4“Apyókxoho énxet'ák judíos apkelya'ásegkok sektémakxa axta cha'a ko'o nepyeseksa sektémakxa wokma'ák, cham'a seyókxa, tén han ma'a tegma apwányam Jerusalén. 5Apkelya'ásegkok nahan sektéma axta cha'a ko'o sekyetleykekxa m'a apkeltémakxa nak fariseos,#Hch 23.6; Flp 3.5. apwanchek exének apmoko enxoho exének, cham'a énxet'ák fariseos ektahakxa nak ekyagwánxa agkok apcháyo m'a ektémakxa nak nelpeykesamo Dios, kaxnók ma'a pók énxet'ák nak. 6Cháxa keñamak selyentamanto nak ko'o yakwayam heltehek selyekpelchémo, eñama m'a ektémakxa nak elhaxneykha ewáxok katnehek ma'a ektémakxa axta appekkencháseykekxa appeywa Dios ẽlyepmeyk nano'. 7Apkelháxanmeyk nahan éthok kasawhaxkohok katnehek apyókxoho doce pók aptémakxa énxet'ák israel xa appekkeneykekxa axta appeywa Dios, ékeso eñamakxa apkeláneya nak cha'a apkeltamheykha eñama nak Dios, ekyókxoho ekhem tén han ekyókxoho axta'a. Wese' Agripa, cháxa keñamak apmoko nak hesexnenak énxet'ák judíos eñama apkelhaxanma katnehek xa. 8¿Yaksak ektaha kélya'áseykmo nak kéxegke apnakxétekháseykmo cha'a Dios ma'a énxet'ák apkeletsapma axta?
Pablo apkeltenneykha ektémakxa axta apmenxeneykencha'a énxet'ák apkelyetlo nak Cristo
9“Xeyenmék axta nahan ko'o ewáxok eyéméxko alának ekyókxoho m'a enmexma nak Jesús apkeñama Nazaret apwesey. 10Cháxa seláneya axta cha'a ko'o neyseksa sekha axta m'a tegma apwányam Jerusalén. Axta cha'a kañék apkeltémo m'a apkelámha apmonye'e nak appasmo apkelmaxnéseso Dios énxet'ák apagkok, axatmok axta cha'a sẽlpextétamakxa apxámokma m'a énxet'ák melya'áseyam nak Jesús, aptekyókek axta agkok nahan, kalkohok axta cha'a ko'o ewáxok. 11Allegásesagkohok axta cha'a ko'o xa énxet'ák nak, yakwayam enxoho wának elxének apkelwátésa apteme melya'áseyam Jesús. Cháxa sektéma axta cha'a ko'o ekyókxoho apchakneykekxexa énxet'ák judíos xa, ektaknagkamchek axta ko'o apkeltémakxa xa énxet'ák nak, weykmók axta sekmenxeneykha apheykha nak mók apkelókxa.#Hch 8.3; 22.4-5.
Pablo apxeyenma makham ektémakxa apyakmagkaso apwáxok
(Hch 9.1-19; 22.6-16)
12“Ekmahágkek axta ko'o tegma apwányam Damasco eñama sekmáheyo alának xa, axta apkeltémo m'a apkelámha apmonye'e nak appasmo apkelmaxnéseso Dios énxet'ák apagkok. Eksókók axta weykcha'áhak sekmowána nak alának xa. 13Wese', náxet ámay neyseksa sekxega axta ko'o ekwet'ak ekweywento elseyexma eñama m'a néten, yetseksókhem axta m'a, kayhok agko' axta eyapogwaté m'a elseyexma nak, axta kaxnawok ma'a ekweykenxal'a elsasóxma ekhem. Kelsásek axta exma neyáwa ko'o tén han ma'a énxet'ák selxegexma'a axta ko'o. 14Negyókxoho axta nempalakmok náxop, ekleg'ak axta ko'o selpakhetchesa Hebreo appeywa, entahak axta amya'a seyáneyáxko s'e: ‘Saulo, Saulo, ¿yaksak ektaha seyakmásencha'a nak xép? Aplegasásamakpoho apagko' aptahak xép, máxa aptahak xép ma'a nentégwayamla'a aksok ekmahanta.’ 15Ektahak axta ko'o seyátegmowágko s'e: ‘¿Wese', yaksak exchep?’ Aptahak axta seyátegmowágko Wese' egegkok se'e: ‘ko'o Jesús, cháxa apyakmáseyncha'a nak xép. 16Yempekxa néten, etnamha, emenyék ko'o atnehek seyásenneykha exchep, tén han etnehek apxeyenma xa ektahakxa nak apweté, tén han ma'a peya sat étak eñama nak ko'o, cháxa keñamak sekxekmowásexkoho nak xép xa. 17Amyók sat xép nepyeseksa énxet'ák judíos, tén han nepyeseksa m'a énxet'ák metnaha nak judíos, cham'a énxet'ák peya nak apaxaktésok xép. 18Eyáphásek xép nepyeseksa xa énxet'ák nak, yakwayam enxoho elyekpelchásesamhok, tén han kamaskok apkelteyáseyncha'a ekyaktesakxaxma, wánxa aksa elteyésha m'a neyseksa elseyexma nak, yakwayam enxoho anhan kamaskok ekyetna ekmowána Satanás nepyeseksa xa énxet'ák nak, wánxa aksa elyetlakxak ma'a Dios; yakwayam enxoho etnahagkok mehey'áseyam ko'o, keñe anhan elxawagkok ma'a meyakmagkáseykekxa nak Dios apkeltémakxa melya'asáxma, tén han exkak yakwayam epáxakwók ma'a Dios énxet'ák apagkok apkelpagkanamap nak.
Pablo apkelyaheykekxoho aksok apxekmósamo Dios
19“Wese' Agripa, elyahákxók axta ko'o ektahakxa aksok selxekmósamo eñama Wese' egegkok, néten axta keñamak ma'a. 20Eklegásek axta ko'o sekxo' apmonye'e amya'a eñama Dios ma'a énxet'ák apheykha nak tegma apwányam Damasco,#Hch 9.20. keñe axta seklegasa nahan ma'a apyókxoho énxet'ák apheykha nak tegma apwányam Jerusalén,#Hch 9.28-29. keñe axta anhan seklegasa m'a ekyókxoho yókxexma Judea, axta anhan eklegásak ma'a énxet'ák metnaha nak judíos, wának axta cha'a elyakmagkasek apwáxók, tén han etnekxak melya'áseyam ma'a Dios, eltémók axta anhan cha'a elanagkok ma'a nentamheykha eñama nak Dios, yakwayam enxoho kataxchek ektémakxa apkelyakmagkaso apwáxók. 21Cháxa keñamak sema axta ko'o énxet'ák judíos kañe' tegma appagkanamap xa, apmokók axta anhan heyakhek. 22Wánxa agkok, elenxanakmok eyke ko'o sekwaskápeykekxoho ekwokmoho kaxwo' nak eñama sepasmo m'a Dios, eltennáseykha cha'a ko'o aptémakxa Dios apyókxoho énxet'ák, apketkók, tén han ma'a apkelwányam nak. Meypetchesók cha'a ko'o mók aksok seltennasama énxet'ák ma'a apkelxeyenma axta ekmáheyo katnehek énxet'ák ektaha axta apkellegaso Dios appeywa, cham'a apxeyenma axta anhan Moisés, 23cham'a apkelxeyenma axta ekmáheyo yetsapok Mesías, tén han etnehek apmonye apxátekhágwayam ma'a natámen apketsapma,#1 Co 15.20. keñe anhan eltennasha ektémakxa elseyexma segwagkasamo teyp ma'a nelenyémeyo xamo' nak negko'o tén han ma'a pók énxet'ák nak.”#Is 42.6; 49.6.
Pablo apmáheyo elekwomhok wese' Agripa yakwayam etnehek apyetlo Cristo
24Xama axta aptaha appeywa Pablo apchátegmowágko amya'a xa, aptahak axta Festo apyennaktésawo appeywa s'e:
—¡Pablo! ¡Yéhayaxma' exchep! Yeykhágwokmok ektémakxa nak apkeltámesamap, la'a aptaha nak ekyéháxma.
25Aptahak axta apchátegmowágko Pablo s'e:
—Wese' Festo, meheyéhak ko'o exma; payhawók xa sektahakxa nak sekpeywa, ekmámnaksoho agko' nahan. 26Cháxa apha wese' Agripa xa, aptaha nak apya'áseykegkoho ektakmela xa sekxéna nak ko'o, ékeso eñamakxa magweysákxo nak sekxéna nápakto' xa; hakte nakso' ko'o ektemesásak apya'ásegkoho nahan wese' Agripa ekyókxoho xa sekxéna exchek, hakte megkatnek ekpowásamáxkoho ekteyapma xa aksok nak. 27Wese', ¿Ya ey'ásekmok xép ektémakxa axta apkelxeyenma énxet'ák ektaha axta Dios appeywa apkellegaso? Ekya'ásegkok ko'o aptéma exchep mey'áseyam xa.
28Aptahak axta apchátegmowágko wese' Agripa s'e:
—¿Apkeneykeya yepwának hetnésesek sekyetlo Cristo ekmanyehe agko'?
29Aptahak axta Pablo s'e:
—Ekmanyehe agko' kexaha ayakmagkasesek apwáxok, yehémek esenhan, háwe eyke apwánxa apagkok xép apkepmenyého Dios hexnágwakxohok ko'o, akke apmenyék nahan Dios hexnágwakxohok ko'o m'a apyókxoho énxet aphaxnawo nak se'e seltenneykha nak, meyke eyke so ektahakxa nak ko'o selnaktetcheso emék cadenas.
30Keñe axta apkempákxo néten wese', tén han ma'a wese' apkeláneykha nak apchókxa, Berenice axta anhan ma'a, tén han ma'a apyókxoho énxet'ák apheyncha'a axta m'a, 31apkelmahágkek axta mók nekha yakwayam elpakhetchesakpohok exének xa ektahakxa axta apxeyenma Pablo. Aptahak axta apkelpakhetcháseykpoho s'e:
—Melaneyk xama aksok ekmaso eyéméxko nak yetsapok xa énxet nak; megkeyméxchek nahan kólhésók sẽlpextétamakxa.
32Aptahak axta wese' apwányam Agripa apcháneya wese' Festo s'e:
—Kélwanchek axta kólyenyekxak xa énxet nak, cham'a megyáneya enxoho etnehek apyekpelchémo m'a wese' apwányam Cesar.
Currently Selected:
LOS HECHOS 26: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
