LOS HECHOS 25
25
Pablo apwayam aphakxa wese' Festo
1Wokmek axta ekhem yakwánxa etnehek Festo wese' apchásenneykha apkeláneykha xa yókxexma nak, wokmek axta antanxo ekhem apteme wese', keñe axta aptepa tegma apwányam Cesarea. Axta apmeyákxak ma'a tegma apwányam Jerusalén. 2Apkelwokmek axta apkelámha apmonye'e appasmo apkelmaxnéseso Dios énxet'ák apagkok, tén han ma'a judíos kelwese'e nak, apkelwokmek axta apmoko esexnenak Pablo. 3Apkelmaxnakkek axta Festo xa énxet'ák nak, apkeltamhok apagko' axta yának kólyentemekxak Pablo m'a tegma apwányam Jerusalén, hakte appenchesek axta apkeláneykekxa apkelpakmeyesma yakwayam yakhegwakxak Pablo m'a náxet ámay. 4Apchátegmowágkek axta Festo, apkeltennásek axta apha Pablo sẽlpextétamakxa m'a tegma apwányam Cesarea, xénchek axta anhan apwáxok Festo kanyehémhok emyekxak ma'a. 5Aptahak axta apkeláneya s'e:
—Kéméxchek hetlók tegma apwányam Cesarea m'a kelwese'e kélagkok nak kéxegke. Apkeláneyak agkok ekmaso aptémakxa m'a énxet nak, sat kólewának kólsexnenak ma'a.
6Wenaktémok axta apha wese' Festo m'a tegma apwányam Jerusalén, ocho ekhem axta ko'o nek apha m'a, diez ekhem esenhan, keñe axta aptakháwo m'a tegma apwányam Cesarea. Mók ekhem axta entahak aphákxo néten aptaháno segyekpelchémókxa, apkeltamhok axta kólyentemekxak Pablo. 7Xama axta aptaxnegwokmo Pablo m'a, apchágketchesakmók axta énxet'ák judíos apkeleñama Jerusalén, yágwokmok axta nahan apmáheyo esexnena', mopwancha'ak axta eyke peya exekmóshok ektaha nakso' ma'a aptahakxa axta apkelpakmeyesma. 8Aptahak axta Pablo apchátegmowágko amya'a s'e:
—Malaneyk ko'o aksok ekmaso xama enxoho, matnék nahan senmexma m'a judíos segánamakxa apagkok nak, magwanmexmak nahan ma'a tegma appagkanamap nak, matnék nahan senmexeykha m'a wese' apwányam apkeñama nak Roma.
9Wánxa agkok, apmenyék axta eyke yásekhohok énxet'ák judíos ma'a Festo. Ekeso eñamakxa aptaha axta apkelmaxneyeyncha'a Pablo s'e:
—¿Apmokóya emyekxak tegma apwányam Jerusalén yakwayam enxoho ko'o eykpelkohok aksok apkelané exchep ma'a?
10Aptahak axta apchátegmowágko Pablo s'e:
—Ekheyk kaxwo' ko'o s'e sẽlyekpelchemókxa ektaha nak apagkok ma'a wese' apwányam Roma, keso eyéméxchexa nak ko'o heltehek selyekpelchémo s'e. Apya'ásegkok ektakmela exchep maláneya ko'o xama aksok enmexma énxet'ák judíos. 11Elanak agkok ko'o m'a aksok ekmaso eyéméxko nak watsapok eñama selané m'a, watsapok ahagkok ko'o xa. Háwe agkok ekmámnaksoho ekxénamaxche aksok sesexnenagko, megkapayhawok kólának hemok xa énxet'ák nak. Eltamhok ko'o etnehek sékpelchémo apagko' ma'a wese' Cesar.
12Keñe axta apkelpakhetchesa Festo m'a énxet'ák apmésamakxa axta cha'a appeywa. Aptahak axta Festo appakhetchesa Pablo s'e:
—Cháxa apkeltamho nak ékpelkohok xép wese' Cesar, wese' Cesar sat nahan ey'ókxa'.
Pablo apwayam aphakxa wese' Agripa
13Mók ekhem axta entahak, apkelmahágko tegma apwányam Cesarea wese' Agripa tén han ma'a Berenice. Festo axta apyo'ókmok yakwayam epeykesek. 14Yáma wegkawók axta apheykha m'a, ékeso eñamakxa apkeltennáseyncha'a axta Festo ektémakxa apxénamap Pablo m'a wese' Agripa. Aptahak axta apcháneya s'e:
—Apheyk xama énxet aphésama axta Felix sẽlpextétamakxa s'e. 15Eltennasa'ak axta ko'o ektémakxa megkaleklo apwáxók aptémakxa Pablo m'a apkelámha apmonye'e nak appasmo apkelmaxnéseso Dios énxet'ák apagkok tén han ma'a apkelámha apmonye'e nak énxet'ák judíos, apkeltamhok axta añásesagkohok, cham'a sekha axta ko'o Jerusalén. 16Eyategmowágkek axta ko'o seltennasa megkatnama apkeltémakxa romanos, cham'a kéltemo nak aksa emátog xama énxet melwet'a enxoho sekxo' ma'a énxet'ák ektahakxa enxoho apsexnenagko, yakwayam enxoho yátegmowagkok ektahakxa amya'a apxénamap. 17Ekeso eñamakxa sekpekhésawo axta ko'o selana xa, cham'a apkelwa'a axta énxet'ák se'e, mók ekhem axta entahak sekhákxo m'a néten sektaháno sektémakxa nak cha'a selyekpelchémo énxet, eltamhok axta helyentegkásentak xa énxet nak. 18Wánxa agkok, axta eyke kaxnawok apkelxeyenma aksok ekmaso apkelané m'a seyáneyakxa axta ko'o elanak, cham'a énxet'ák apkelwa'a axta yakwayam esexnenak Pablo. 19Wánxa axta aksa apkelxéna megkalcha apwáxók ma'a ektémakxa nak apcháyókxa Pablo, cham'a apketsapma exnexta xama énxet apwesey Jesús, cham'a apxeyenma nak Pablo megyetsapma. 20Axta ko'o ay'ásegkok sektemésesakxa xa amya'a nak, keñe axta selmaxneyeyncha'a ko'o Pablo apmenyék kexaha emhagkok ma'a tegma apwányam Jerusalén yakwayam enxoho kóltehek kélyekpelchémo eñama xa amya'a nak. 21Wánxa agkok, apkeltamhok axta eyke Pablo etnehek apyekpelchémo m'a wese' apwányam Roma, keñe axta seltamho ko'o exek aksa makham sẽlpextétamakxa ekwokmoho seyewagko wáphaksek aphakxa m'a wese' apwányam.
22Keñe axta aptaha wese' Agripa apcháneya Festo s'e:
—Emenyék nahan ko'o xa weyxhok appeywa m'a énxet nak.
—Saka sat eñak appeywa, axta aptahak apchátegmowágko Festo
23Mók ekhem axta entahak, apkelwokmo wese' Agripa tén han ma'a Berenice, apkelántaxneyk axta yetlo apkeleymákpoho kañe' tegma aphágkaxa axta énxet, tén han ma'a sẽlpextétamo apkelámha apmonye'e nak, tén han ma'a kelwese'e apkelámha apmonye'e nak apheykha xa tegma apwányam nak. Apkeltamhok axta Festo kólyentemekxak Pablo m'a. 24Aptahak axta Festo s'e:
—Wese' Agripa tén han kelwese'e negaknákxo nak xamo' negko'o s'e. Cháxa énxet xa. Apyókxoho énxet'ák judíos axta esantegkásak amya'a ektahakxa eksexnenagko xa, cham'a énxet'ák apkeleñama nak tegma apwányam Jerusalén, tén han ma'a énxet'ák apkeleñama nak se'e Cesarea, melwateseykmok nahan apkelpáxameykha apkeltémo yetsapok xa énxet nak. 25Wánxa agkok, xénchek axta eyke ko'o ewáxok meláneya aksok ekmaso eyéméxko nak yetsapok, apkeltémo apagko' axta eyke Pablo etnehek apyekpelchémo m'a wese' apwányam, ékeso eñamakxa sekmoko axta ko'o wáphaksek aphakxa wese' apwányam. 26May'ásegkok ko'o yakwánxa atnehek sektáxéseso wese' apwányam ahagkok ektahakxa apxénamap xa énxet nak, ékeso eñamakxa sekyentamánto nak kélnápakta'awo' kéxegke, tén han nápakto' xép wese' Agripa, yakwayam enxoho keytek sektáxeso ko'o natámen kélmaxneyeykha. 27Chakhók ko'o nek agáphaksek énxet apmomap megkaxénáxko enxoho aksok eksexnenagko.
Currently Selected:
LOS HECHOS 25: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
