LOS HECHOS 24
24
Pablo apchátegmoweyak amya'a nápakto' Felix
1Cinco ekhem axta entahak ekyeykhe, apwokmek axta tegma apwányam Cesarea Ananías aptaha axta apkemha apmonye appasmo apkelmaxnéseso Dios énxet'ák apagkok. Nápakha énxet apkelámha apmonye'e axta anhan apkelxegexma'a, axta nahan ma'a énxet kélásenneykekxohol'a apwesey axta Tértulo. Apkelwokmek axta aphakxa wese' xa énxet'ák nak yakwayam enxoho esexnenak Pablo. 2Xama axta kélyentamánto Pablo, appakmetchek axta Tértulo yakwayam esexnenak Pablo. Aptahak axta apcháneya Felix se'e:
—Wese', xép keñamak ekyetna negko'o meyke ektahakxa negheykha, xép apya'áseykegkoho nahan keñamak ektakmelwokmo apheykha énxet'ák negheykegkaxa nak. 3Negmések cha'a negko'o ekpayheykekxa egwáxok xép, leklamók nahan apwáxók énxet'ák ekyókxoho negheykegkaxa nak, ektémakxa aptamheykha exchep Felix. 4Neltamhok negko'o hegeyxhok yakwatakxoho yakwayam enxoho mólya'aksexma aptamheykha. 5Negya'ásegwokmek negko'o aptaha ekmaso aptémakxa s'e énxet nak, ekyókxoho yókxexma nahan aptekkásak apkexpanchásamap énxet'ák judíos xa, cháxa aptaha nak apkemha apmonye nepyeseksa m'a énxet'ák apkeltamhomakpo nak Nazarenos. 6Weykmók nahan apmáheyo etwasha m'a tegma appagkanamap egagkok nak, ékeso eñamakxa negma axta negko'o xa énxet nak. 7Sẽlpextétamo apwese' apwesey Lisias axta eyke empáxakwokmok negko'o yetlo apyennaktéso apyempehek segyementagwokmo xa énxet nak; 8Apxénchek axta Lisias apkeltamho agyo'ótak xép, negko'o nentaha nak nenxeyenma ekmaso Pablo. Xép apwanchek elmaxneyha yakwayam ey'asagkohok ektakmela ektahakxa nak nensexnenagko negko'o xa.
9Hawók axta anhan aptahakxa apkelpeywa énxet'ák judíos apheyncha'a axta m'a. 10Keñe axta aptaha apmek wese' apkeltamho epakmétek Pablo. Aptahak axta appakmeta Pablo s'e:
—Ektakmelakxoho agko' sekmoko apakmétek nápakto' xép yakwayam wátegmowagkok xa énxet'ák nak, hakte ekya'ásegkok ko'o aptaha exchep segyekpelchémo nepyeseksa énxet'ák apheykha nak saxma eyeynamókxa m'a nano' axta. 11Xép akke apwanchek etegyaha amya'a, kaxwo' wokmok doce ekhem sekwa'a axta ko'o Jerusalén yakwayam alpeykeshok Dios. 12Meteyk ko'o alátegmoweyxche xama énxet xa énxet'ák nak, meteyk nahan atekkesek apyennegkesóxma énxet'ák kañe' tegma appagkanamap tén han ma'a apchakneykekxexa nak énxet'ák judíos, tén han ma'a mók nekha apyawakxa nak tegma. 13Mopwanchek exekmóshok ektaha nakso' eñama aksok sesexnenagko ko'o xa énxet'ák nak. 14Wánxa eyke aksa sekxéna ko'o ektaha nakso' sekyetleykha m'a ẽlyepmeyk nano' Dios apagkok, ekhawo ektémakxa nak negyetlo ámay axnagkok apkeltéma nak énxet'ák judíos megkamámnaksoho, hakte may'ásekmok ko'o m'a ekyókxoho ektémakxa nak eknaktáxésamaxche segánamakxa, may'ásekmok nahan ma'a ekyókxoho ektémakxa nak eknaktáxésamaxche énxet'ák Dios appeywa apkellegaso weykcha'áhak apagkok. 15Yetneyk ko'o elhaxneykha ewáxok Dios ekhawo nak han xa énxet'ák nak, cham'a peya sat enakxétekhágwók énxet'ák apkeletsapma axta, cham'a énxet'ák meyke apkeltémakxa axta, tén han ma'a elmasagcha'a axta apkeltémakxa. 16Ekeso eñamakxa selenxanakmo nak cha'a ko'o katnehek meyke ektahakxa elchetamso ewáxok nápakto' Dios tén han nápakta'awo' énxet'ák.
17“Ektakháwok axta ko'o seyókxa yakwayam enxoho almésagkok aksok énxet'ák, tén han agkések aksok ma'a Dios, cham'a natámen axta elyekhéyak apyeyam sekweynchámeykha mók nekha. 18-19Elanak axta ko'o xa, cham'a natámen seláneykekxa axta sektémakxa ekhawo m'a elánamáxkohol'a cha'a. Apsextók axta énxet ma'a, méko axta nahan ekyennamáxma, cham'a seteyágwokmo axta ko'o kañe' tegma appagkanamap#Hch 21.17-28. nápakha énxet'ák judíos apkeleñama m'a yókxexma Asia. Cháxa énxet'ák eyéméxko nak elwak se'e yakwayam enxoho hesexnena', cham'a ekyetna enxoho aksok sesexnenagko. 20Mopwanchek agkok apmoko hesexnenak xa énxet'ák nak, akke kéméxchek exének xa énxet'ák apheyncha'a nak se'e, cham'a apwetaya enxoho seláneya aksok ekmaso, cham'a sekwokmo axta nápakta'awo' énxet'ák judíos ekyawe nak kéláyo. 21Wánxa aksa ko'o sektéma sekyennaktésamo sekpeywa s'e: ‘Sakhem kéltaha selyekpelchémo kéxegke hakte may'ásekmok ko'o m'a apnakxétekhágwayam nak énxet apkeletsapma axta.’#Hch 23.6.
22Xama axta apleg'a Felix xa, apmágwokmek axta sekxo' yakwayam kóltehek kélyekpelchémo, hakte nano' axta aplegé kaxénaxchek ektémakxa xa ámay axnagkok nak. Aptahak axta apkeláneya énxet'ák se'e:
—Apwa'ak sat agkok sẽlpextétamo apwese' apwesey nak Licias, heltennaksek sat ektakmela xa kélxéna nak kéxegke
23Apkeltamhok axta Felix elenxanmohok apkeláneykha apkemha apmonye sẽlpextétamo m'a Pablo, wánxa axta aksa apkeltamho kólhok aksa eweynchamha sekxo' meyke kélteméseseykmohoxma, apkeltamhok axta anhan Felix yohok epasmok Pablo m'a énxet'ák ektaha axta apkelxegexma'a Pablo.
24Mók ekhem axta entahak apwa'akto makham Felix yetlo aptáwa ekwesey axta Drusila, judía axta m'a. Apkeltamhok axta Felix kóltennásekxak Pablo, apleg'ak axta Felix ektahakxa apxeyenma Pablo ektémakxa mey'áseyam Wese' egegkok Jesucristo. 25Xama axta apxéna Pablo m'a nentémakxa ekpéwomo nak, tén han ma'a ektémakxa nak negmowána anlanagkohok nentémakxa, tén han ma'a yakwánxa sat etnehek segyekpelchémo Dios egmonye sat, apyegwakkek axta Felix, aptahak axta apcháneya Pablo s'e:
—Etakhekxa sat kaxwo', wáneyha sat makham méko enxoho selanakxa xama ekhem.
26Apkelháxanmeyk axta nahan Felix egkések selyakye m'a Pablo yakwayam enxoho ényekxa'; ékeso eñamakxa apcháneyeykencha'a axta cha'a yakwayam enxoho epakhetchesek. 27Apkánet apyeyam axta weykmók ekteme xa; keñe axta apkelwátésa apteme wese' Felix xa yókxexma nak, Porcio Festo axta apyakmagkaso. Apmenyék axta Felix yásekhohok énxet'ák judíos, keñe axta apcha'awo aksa kélhésama Pablo sẽlpextétamakxa.
Currently Selected:
LOS HECHOS 24: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
