LOS HECHOS 23
23
1Apkelanawók axta Pablo xa énxet'ák ekyawakxa nak kéláyo. Aptahak axta apkeláneya s'e:
—Elyáxeg, méko cha'a ko'o ektémakxa elchetamso ewáxok nápakto' Dios.
2Keñe axta apkeltamho Ananías etekpagkasek apátog Pablo m'a énxet'ák apchakneykha axta keto' apkenmágkaxa Pablo, cham'a Ananías aptaha axta apkemha apmonye appasmo apkelmaxnéseso Dios énxet'ák apagkok. 3Aptahak axta apchátegmowágko Pablo s'e:
—¡Dios sat etekpog xép apteme nak apkelmeyókásamákpoho apagko' aptémakxa!#Mt 23.27. Apheyk agkok xép aphamakxa yakwayam etnehek sékpelchémo ko'o eñama m'a eltémókxa nak antehek segánamakxa, ¿Yaksak ektaha apkeltamho nak héltekpog, megkeytnók eltémókxa antehek segánamakxa xa?
4Aptahak axta apkelpakmeta énxet'ák ektaha axta apheykha m'a:
—¿Keya aptahak apwanyeyncha'a exchep apkemha apmonye appasmo nak apkelmaxnéseso Dios énxet'ák apagkok xa ektaha nak, aptaha nak Dios apchásenneykha?
5Aptahak axta Pablo s'e:
—Elyáxeg, exchek ko'o ay'ásegkok aptaha apkemha apmonye appasmo apkelmaxnéseso Dios énxet'ák apagkok xa énxet nak; hakte temegkek eknaktáxésamaxche s'e: ‘Ná exén ekmaso m'a énxet apteme nak wese' nepyeseksa Dios énxet'ák apagkok.’#Ex 22.28.
6Xama axta apyekpelchágwokmo Pablo nápakha énxet'ák ekyawe nak kéláyo aptaha apkelyetlo apkeltémakxa m'a énxet'ák Saduceos, keñe anhan nápakha aptaha apkelyetlo m'a apkeltémakxa nak énxet'ák Fariseos, aptahak axta apyennaktésawo appeywa Pablo s'e:
—Elyáxeg, ko'o sekteme fariseo,#Hch 26.5; Flp 3.5. hakte fariseo axta ko'o táta; kéltemék kéxegke selyekpelchémo hakte may'ásekmok ko'o m'a apnakxétekhágwayam nak apkeletsapma axta.
7Xama axta aptaha appeywa Pablo xa, ñohok axta apkelátegmoweykpo fariseos ma'a énxet'ák saduceos, yeykháxchek axta mók apkelpakmeyesma ektaha axta apchakneykekxa m'a. 8Hakte exénhok cha'a énxet'ák saduceos menakxátekhágweykmo m'a énxet'ák apkeletsapma axta,#Mt 22.23; Mr 12.18; Lc 20.27. exénhok nahan cha'a méko m'a Dios apchásenneykha nak, tén han apkenagkama méko m'a kélhagák; keñe énxet'ák fariseos melya'ásekmo ekyókxoho xa. 9Apyókxoho énxet axta apkelyennaktésawók apkelpeywa, keñe axta apchakneyncha'a nápakha énxet apkelxekmóso nak ektémakxa segánamakxa, aptaha axta apkelyetlo apkeltémakxa fariseos. Aptahak axta apkelpakmeta s'e:
—Melaneyk aksok ekmaso xa énxet nak; aksok kexaha entekkesásak appeywa, Dios apchásenneykha esenhan.
10Yágwokmok axta apyenegkesóxma énxet'ák, tamháha axta apwáxok sẽlpextétamo apwese' kóltemésesek nápakha apketkók Pablo, keñe axta apkeltamho kólnaklósawakxak nápakha sẽlpextétamo yakwayam enxoho etekkesek Pablo m'a, tén han éntemekxak makham ma'a sẽlpextétamo apxagkok.
11Mók axta'a axta entahak apxekmowáseykpekxoho Wese' egegkok Pablo. Aptahak axta apcháneya s'e: “Ewaskápekxoho Pablo, cháxa aptahakxa nak apkeltenneykha sekwesey s'e Jerusalén, sat nahan etnehek apkeltennáseykha sekwesey énxet'ák apheykha tegma apwányam Roma xa ektaha nak.”
Kélláneykekxa amya'a yakwayam emátog Pablo
12Mók ekhem axta entahak ekhawo mók apkelpakmeyesma nápakha énxet'ák judíos yakwayam yakhek Pablo, ekmámnaksoho axta aptemesásak apkeltamhok ennápekxak Dios melánegko enxoho m'a aptamhágkaxa axta apkelpeywa, cham'a apxéna axta metawagkek aptéyak tén han ménagkek yegmen ekwokmoho apchakha Pablo. 13Cuarenta teyp axta apyókxoho énxet'ák ektaha axta apmáheyo etnahagkok xa ektaha nak. 14Apkelyo'ókmek axta apkelámha apmonye'e nak appasmo apkelmaxnéseso Dios énxet'ák apagkok xa énxet'ák nak, tén han ma'a énxet'ák judíos apkelámha apmonye'e nak. Aptahak axta apkeláneya s'e:
—Ekmámnaksoho axta nentemesásak negko'o neltamho hennápekxak Dios manlana enxoho m'a nentahakxa axta nelpeywa nenxéna mantawagkehek nentéyak, tén han magyenagkek yegmen ekwokmoho negakha Pablo. 15Kéxegke kéltaha nak ekyawe kéláyókxa, tén han xa kélxegexma'a nak, kólmaxna sẽlpextétamo apwese' yakwayam éntementak Pablo kélnápakta'awo' kéxegke, kóltennés sat negmoko negko'o agya'asagkohok agko' aptahakxa Pablo. Ampencheshok sat negko'o nenlaneykekxa nentahakxa yakwayam agakhek Pablo amonye apwé.
16Wánxa agkok, apleg'ak axta amya'a Pablo apyáxa étche xa, apmahágkek axta anhan sẽlpextétamakxa yakwayam eltennaksek Pablo. 17Apwóneyha axta Pablo xama apkemha apmonye sẽlpextétamo. Aptahak axta apcháneya s'e:
—Entemekxa hana aphakxa sẽlpextétamo apwese' s'e wokma'ák nak, hakte yetneyk xama aksok yakwayam eltennaksek.
18Apyentegkek axta sẽlpextétamo xa wokma'ák nak. Axta apya'ásak ma'a aphakxa axta sẽlpextétamo apwese'. Aptahak axta apcháneya s'e:
—Ewóneyha exchek ko'o Pablo, aptaha nak apmomap, apkeltamhok xeyk eyntegkásentak xép se'e wokma'ák nak, hakte yetneyk hek amya'a yakwayam eltennaksek xép.
19Apmeyk axta apmek sẽlpextétamo apwese' xa wokma'ák nak, mók nekha axta apyentamak. Aptahak axta apkelmaxneyeyncha'a s'e:
—¿Yaksak apmoko heltennaksek xép?
20Aptahak axta appakmeta wokma'ák se'e:
—Hawók mók apkelpakmeyesma énxet'ák judíos apmoko elmaxnak xép yakwayam éntemekxak Pablo nápakta'awo' ma'a énxet'ák ekyawe nak kéláyo, yetlo apmáheyo eltennaksek xép apmoko elya'ásegwomhok ektakmela aptahakxa Pablo. 21Ná elyahakxoho aksa exchep, hakte cuarenta teyp apyókxoho énxet'ák apkelyexákpoho nak apkelhaxna Pablo, apkelxénchek axta apkeltamho ellegásesagkohok Dios melánegko enxoho m'a apkelxeyenma axta elanagkok, cham'a apkelxéna axta metawagkok aptéyak tén han ménagkok yegmen ekwokmoho apchakha Pablo; kaxwo' eyke appenchesek apkeláneykekxa aptamhágkaxa, xép appeywa aksa apkelhaxnak kaxwo'.
22Keñe axta apcháphasa sẽlpextétamo apwese' xa wokma'ák nak, apkeltamhok axta anhan meltennaha m'a aptahakxa axta apkeltennaso.
Pablo kéláphaso aphakxa Felix
23Apkelwóneyha axta apkánet sẽlpextétamo apkelámha apmonye'e xa sẽlpextétamo apwese' nak, apkeltamhok axta yának elánekxak aptamhágkaxa doscientos sẽlpextétamo apkelxegamol'a náxop, keñe setenta m'a apkelchántamol'a yatnáxeg, keñe anhan doscientos ma'a sẽlpextétamo apkelmeykhal'a sawhéwa, yakwayam enxoho elmahagkok ma'a tegma apwányam Cesarea a las nueve axta'a. 24Apkeltamhok axta nahan kóltahanchesek yatnáxeg yakwayam enxoho yántek Pablo, apkeltamhok axta kólyentemekxak aphakxa Felix yetlo meyke kélteméseseykmohoxma. 25Apcháphásek axta nahan weykcha'áhak xa sẽlpextétamo apwese' nak. Aptahak axta aptáxéso s'e:
26“Ko'o Claudio Lisias, eyáphásesek ekxeyenma ewáxok xép Felix aptaha nak wese' apchásenneykha apkeláneykha apchókxa. 27Apchakxegkesek axta énxet'ák judíos sẽlpextétamakxa s'e énxet nak. Peyk axta eykhe nahan yakhek, wánxa agkok, xama axta sekleg'a ko'o aptaha aphawo énxet apkeleñama Roma s'e, ekyo'ókmek axta ko'o yetlo sẽlpextétamo ahagkok, negmeyókek axta anhan. 28Eltamhok axta ko'o ay'asagkohok aksok eksexnenagko, ekyentegkek axta nápakta'awo' judíos ekyawe nak kéláyo, 29xénaxchek axta ektaha eksexnenagko m'a segánamakxa apagkok nak xa énxet'ák nak; axta eyke kapayhawok emátog, megkapayhawok nahan kólhésók sẽlpextétamakxa. 30Ekleg'ak axta ko'o amya'a apkeláneykxo aptamhágkaxa énxet'ák judíos apmoko yakhek xa énxet nak, ékeso eñamakxa seyáphasa nak aphakxa exchep; eltamhok nahan ko'o exének énxet'ák nápakto' xép ektahakxa aksok megkaleklo apwáxok aptahakxa Pablo, cham'a énxet'ák apxéna axta ekmaso Pablo.”
31Apyentegkek axta sẽlpextétamo Pablo, ekhawo m'a ektahakxa axta amya'a apkeláneyákpo, axta'a axta kélyentamákxo tegma apwányam Antípatris. 32Mók ekhem axta entahak apkeltakhegwokmo sẽlpextétamo apkelxega axta náxap'ák, apxanák axta apkelmeyákxa', keñe axta m'a sẽlpextétamo ektaha axta apkelchánte yatnáxeg apkelyetlákxoho Pablo m'a kélya'asakxa axta. 33Xama axta apkelwokmo tegma apwányam Cesarea, kélmések axta weykcha'áhak wese' apchásenneykha apkeláneykha xa yókxexma nak, kélyensakmek axta anhan Pablo m'a. 34Xama axta appenchesa apkelyetseté weykcha'áhak xa wese' apchásenneykha apkeláneykha nak yókxexma, apkelmaxneyáha axta Pablo apkeñamakxa; xama axta apya'ásegwokmo aptaha apkeñama Pablo m'a yókxexma Cilicia, 35aptahak axta apcháneya s'e:
—Weyxhok sat xép appeywa apkelwa'a enxoho m'a énxet'ák apmáheyo nak esexnenak xép.
Keñe axta apkeltamho wese' apchásenneykha apkeláneykha apchókxa elanha sẽlpextétamo Pablo m'a wese' Herodes apxagkok.
Currently Selected:
LOS HECHOS 23: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
