LOS HECHOS 22
22
1“Elyáxeg tén han apkelwányam nak, kóleyxho hana yakwánxa nak atnehek seyátegmoweyak kélpeywa kéxegke.”
2Xama axta apkelleg'a appakmeta Hebreo appeywa Pablo xa énxet'ák nak, yágwokmok axta apkelwanmeyeykekxa. Aptahak axta appakmeta Pablo s'e:
3“Judío ko'o, cha'a sekteyekemxa m'a tegma apwányam Tarso yókxexma Cilicia, akke sekwáneykemxa s'e tegma apwányam Jerusalén, eltámesamaxchék axta ko'o, Gamaliel axta selxekmóso,#Hch 5.34-39. ekyetlókasegkek axta seltámesamaxche m'a ektémakxa axta ẽlyepmeyk nano' segánamakxa apagkok. Elenxáneykmek axta ko'o atnehek sekyetleykha Dios ekweykmoho kañók agko' ewáxok, ekhawo kéltahakxa nak kaxwo' kélyókxoho kéxegke keso negwánxa nak. 4Ekmenxeneykha axta ko'o ekweykmoho selnapa m'a énxet'ák apkelyetlo nak ámay axnagkok. Almok axta anhan cha'a axatmok kañe' sẽlpextétamakxa, magweyxek axta ektahakxa enxoho kelán'a tén han apkelennay'a. 5Apkelya'ásegkok ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, apkelya'ásegkok nahan ma'a apyókxoho apkelámha apmonye'e nak kélakneykekxexa. Egkések axta ko'o weykcha'áhak apkeláphaso xa énxet'ák nak apcháphásesa m'a ẽlyáxeg'a judíos apheykencha'a nak ma'a tegma apwányam Damasco, ekmahágkek axta ko'o m'a, axta elchetámak ma'a énxet'ák apteme nak melya'áseyam Jesús yakwayam enxoho anaklantak se'e Jerusalén, tén han kóllegásesagkohok.#Hch 8.3; 26.9-11.
Pablo apkeltenneykha sekxo' apyakmagkasama apwáxok
(Hch 9.1-19; 26.12-18)
6“Neyseksa sekxega ámay axta ko'o seyáhapwa'a elseyexma ekyennakte agko' eñama néten, yetseksókhem axta m'a, eyágketchesekmek axta tegma apwányam Damasco, 7ekteyekmek axta ko'o náxop. Ekleg'ak axta anhan kélpeywa, entahak axta amya'a seyáneyáxko s'e: ‘Saulo, Saulo, ¿yaksak ektaha seyakmásencha'a nak xép?’ 8Ektahak axta ko'o selmaxneyeyncha'a s'e: ‘¿Wese', yaksak exchep?’ ‘Ko'o Jesús señama Nazaret, cháxa apyakmáseyncha'a nak xép’, axta entahak amya'a selátegmowágko. 9Apkelwet'ak axta elseyexma m'a énxet'ák sektaha axta selxegexma'a, apkelyegwakkek axta anhan, wánxa axta aksa melleg'a m'a ektahakxa axta amya'a selpakhetcheso ko'o. 10Ektahak axta ko'o selmaxneyeyncha'a s'e: ‘Wese', ¿yaksak eyéméxko alának ko'o?’ Aptahak axta seyáneya Wese' egegkok se'e: ‘Yempekxa néten, elenxanmoho apmaheyak tegma apwányam Damasco. Sat kóltennaksek xép eyéméxchexa etnehek ma'a.’ 11Keñe axta apmágko émek selxegexma'a sentama m'a tegma apwányam Damasco, hakte elseyexma axta etnesásak meyke ahakta'ák.
12“Apheyk axta xama énxet apwesey Ananías ma'a aptaha axta ekpéwomo aptémakxa nápakto' Dios, apkelyaheykekxók axta m'a Moisés segánamakxa apagkok nak; tásek axta anhan katnehek cha'a apkelxeyenma énxet'ák judíos apheykha Damasco xa énxet nak. 13Etyánegwa'awók axta ko'o Ananías. Xama axta apwa'a sekhakxa, aptahak axta seyáneya s'e: ‘Eyáxeg Saulo, étekxaksáxma exchep.’ Yetlókók axta anhan sekweteykekxaxma, ewanchek axta sekwet'a kaxwo' Ananías. 14Keñe axta aptaha seyáneya s'e: ‘Egyepmeyk Dios apagkok axta apkelyésáha exchep yakwayam enxoho ékpelchágwomhok ma'a ektémakxa nak Dios apmopmenyého, yakwayam enxoho anhan étak xép ma'a aptaha nak appéwomo, tén han eñohok appeywa apagko' xép ma'a. 15Xép sat etnehek apkeltenneykha nápakta'awo' apyókxoho énxet'ák xa ektahakxa nak apweté, eltennaha sat xép ma'a aksok apweté tén han ma'a aplegé nak. 16Ná exnekxoho kaxwo' xép. Etnamha, etegye yakpasama yegmen, yáxñásekxoho xa aptémakxa nak mey'asáxma, ewónmakha Wese' egegkok apwesey.’
Pablo apkeltenneykha ektémakxa kéláphaso nepyeseksa énxet'ák metnaha nak judíos
17“Xama axta sekwa'akto ko'o tegma apwányam Jerusalén, ekmahágkek axta tegma appagkanamap yakwayam atnehek nempeywa nelmaxnagko. Ekwet'ak axta ko'o aksok selxekmósamo. 18Ekwet'ak axta ko'o Wese' egegkok. Aptahak axta seyáneya s'e: ‘Epekhésha sat, etyep heykxa xa tegma apwányam Jerusalén, hakte megkahaxnaxkók sat apxéna enxoho exchep sekwesey xa.’ 19Ektahak axta ko'o seyáneya s'e: ‘Wese', apkelya'ásegkok sekmaheykegko cha'a ko'o ekyókxoho apchakneykekxexa judíos xa énxet'ák nak, axatmohok axta anhan cha'a sẽlpextétamakxa énxet'ák apteme nak mey'áseyam xép; annahapmakha axta anhan cha'a, 20ekheyk axta nahan ko'o m'a apmatñama axta exchep apkeláneykha apwesey axta Esteban, aptaha axta aplegaso exchep apwesey, leyawók axta aksa ko'o ewáxok ektahakxa apmatña, eltakmelchesesek axta nahan apkelnakta m'a énxet'ák ektaha axta apchakhe Esteban.’#Hch 7.58. 21Wánxa agkok, aptahak axta seyáneya Wese' egegkok se'e: ‘Exeg sat kaxwo', wáphaksek sat xép ma'a mók apkelókxa eyátépexa nak.’ ”
Sẽlpextétamo apwese' apma Pablo
22Axta néxa kélháxenmo appeywa Pablo xa; keñe axta aptaha apkelyennaktésawo apkelpeywa énxet'ák s'e: “¡Megkeyméxchek etepagkok cha'a xa énxet nak! ¡Kólmasésem neyseksa apha keso náxop!” 23Apkelenxanakmók axta apkelpáxameykha xa énxet'ák nak, apkelpaxnexcháha axta apkelántaxno, apkexakkek axta anhan néten xóp ánek. 24Ekeso eñamakxa apkeltamho axta sẽlpextétamo apwese' kólakxegkesek Pablo sẽlpextétamakxa, apkeltamhok axta kóltekpagmakha yakwayam enxoho exének yaksak ektaha apkelpáxameyncha'a nak énxet'ák aptaknawe. 25Xama axta kélpenchesa kélpexteté Pablo yakwayam kólyekpexchetmakha, apkelmaxneyáha axta Pablo sẽlpextétamo apkemha apmonye apwokmo axta m'a. Aptahak axta s'e:
—¿Payhawoya exchep elyekpexchetmakha énxet aphawo nak énxet romano meyke kélyekpelchémo sekxo' aksok apkelané?
26Xama axta apleg'a apkemha apmonye sẽlpextétamo xa, apkeltennásekxeyk axta sẽlpextétamo apwese'. Aptahak axta apcháneya s'e:
—¿Háxko sat etnehek xép? Aphawo neyke énxet apkeleñama Roma m'a énxet nak.
27Apyo'ókmek axta sẽlpextétamo apwese' Pablo. Aptahak axta apkelmaxneyeyncha'a s'e:
—¿Naksoya exchep aptaha aphawo m'a énxet'ák apkeleñama nak Roma?
—Ehay, axta aptahak Pablo.
28Aptahak axta sẽlpextétamo apwese' apcháneya Pablo s'e:
—Awanhek axta ko'o sekyamasma selyakye yakwayam atnehek señama Roma.
—Ekxakak axta ko'o yakwayam atnehek sekhémo m'a énxet'ák apkeleñama nak Roma sekxo' sekteyekmo, axta aptahak apchátegmowágko Pablo.
29Axta keñamak apyenyawa aksa Pablo m'a sẽlpextétamo yakwayam axta eykhe elyekpexchetmakha; wokmók axta anhan sẽlpextétamo apwese' apkeye apya'ásegwokmo aptaha Pablo aphawo énxet'ák apkeleñama nak Roma, hakte apkelpextetchek axta.
Pablo apwayam nápakta'awo' kelwese'e énxet'ák judíos
30Mók ekhem axta entahak apkeltamho ey'ásegwomhok ektakmela sẽlpextétamo apwese' ektahakxa apsexnenagko énxet'ák judíos ma'a Pablo, kélhexyawásesek axta apmék cadenas kélpexteté axta, keñe axta apkeltamho yaknekxak énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a apyókxoho kelwese'e nak. Kéltekkesek axta Pablo, keñe axta kélchenegkesekmo nepyeseksa xa énxet'ák nak.
Currently Selected:
LOS HECHOS 22: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
