LOS HECHOS 21
21
Pablo apmeyeykekxa tegma apwányam Jerusalén
1Xama axta negkexeykxo ẽlyáxeg'a nentémo xamo' magya'áseyam ma'a, nelchánteyk axta yántakpayhe, axta nelpéwók nelxega m'a egkexe étkok ekwesey nak Cos. Mók ekhem axta entahak nelwákxo Rodas, keñe axta nelxega neleñama Rodas nelmahágko m'a egkexe étkok ekwesey nak Pátara. 2Pátara axta anhan negwetágwokmok negko'o yántakpayhe ekmaheyak ma'a Fenicia. Axta nelchenátwomhok yántakpayhe m'a. 3Neyseksa nelxega axta negko'o negwet'ak negyeykhágwokmo m'a ekgexe étkok ekwesey nak Chipre, nensagkalwa axta payhok negwetakxa m'a, keñe axta negyeyk'a, nenlenxanakmok axta nelxega ekwokmoho nelwokmo yókxexma Siria. Nelwokmek axta anhan tegma apwányam Tiro, hakte aksok axta peyk kakxakhagwakxak yántakpayhe m'a. 4Nelwetágwokmek axta énxet'ák apteme melya'áseyam ma'a, siete ekhem axta neghakmok xamo' xa énxet'ák nak. Apkeltamhok axta eykhe memyekxak Pablo tegma apwányam Jerusalén xa énxet'ák nak eñama apya'asáseykegkoho m'a Espíritu Santo. 5Xama axta ekyeyk'a xa siete ekhem nak, nelxegákxeyk axta makham negko'o. Apsawhekpók axta énxet'ák sẽlyetlawa yetlo apnakteyegka'a tén han ma'a apketchek, ẽlyetlókek axta ekweykmoho nepyáwa tegma apwányam, nelwokmek axta negko'o neyáwa wátsam ekwányam keñe axta neltekxeya entapnák xóp nentaha nempeywa nelmaxnagko. 6Nelpeykásegkakxók axta negko'o amonye nelxega xa énxet'ák nak, keñe axta nelchánta yántakpayhe, apkeltakháwok axta apxanák xa énxet'ák nak.
7Nelwokmók axta negko'o nelxega neyp wátsam ekwányam neleñama Tiro, nelwokmók axta nelxega m'a Tolemaida. Nelpeykásegkek axta ẽlyáxeg'a nentémo xamo' nak magya'áseyam ma'a. Xama ekhem axta neghakmok xamo' xa énxet'ák nak. 8Mók ekhem axta entahak nelxegákxo makham, nelwákxeyk axta m'a tegma apwányam Cesarea. Nelmahágkek axta Felipe#Hch 6.5; 8.5. apxagkok aptaha axta tásek amya'a apkeltenneykha, aptaha axta apkeñama nepyeseksa m'a siete appasmeykha nak apkeltamheykha énxet'ák seykha amya'a. Negháha axta negko'o apxagkok Felipe. 9Hawók nekha apketchek kelwán'ák axta Felipe meyke anakteyegka'a. Kaxénhok axta cha'a amya'a eñama nak Dios. 10Xámchek axta ekhem negheykha negko'o m'a, cham'a apwokmo axta xama énxet Dios appeywa aplegaso apwesey axta Agabo#Hch 11.28. apkeñama m'a Judea. 11Xama axta apwokmo neghágkaxa negko'o Agabo, apmeyk axta Pablo apteté nepxet, apnaktetchek axta apmék, tén han apnakteta m'a apmagkok. Aptahak axta appakmeta s'e:
—Apxénchek Espíritu Santo peya etnehek enaktetchesek apmék énxet'ák judíos ektaha nak apagkok se'e nenteté nenxet nak, cham'a tegma apwányam Jerusalén, tén han peya egkések ma'a pók énxet'ák nak.
12Xama axta nenleg'a negko'o xa, tén han apkelleg'a m'a énxet'ák apkeleñama nak tegma apwányam Cesarea, neltamhok axta memhagkek Pablo m'a tegma apwányam Jerusalén. 13Wánxa agkok, aptahak axta segátegmowágko Pablo s'e:
—¿Yaksak ektaha kéllekxagweyncha'a nak, tén han sellapwagkasa ko'o? Háwe ekwánxa agkok sekmakawo ko'o helnaktetchesek emék, ekmakawók nahan watsapok ma'a tegma apwányam Jerusalén eñama sekyetlo ko'o Wese' egegkok Jesús.
14Magwanchek axta negko'o negmoko anlekwomho' Pablo, keñe axta nelwátésekmo nempakhetcheso. Nentahak axta nelpakmeta s'e:
—Kalanaxchek sat ma'a ektémakxa nak apmopmenyého Wese' egegkok.
15Nenláneykxeyk axta negko'o nentahakxa natámen xa, nelmahágkek axta m'a tegma apwányam Jerusalén. 16Ẽlyetlókek axta anhan nápakha énxet'ák apteme axta melya'áseyam Jesús apkeleñama m'a tegma apwányam Cesarea, ennaklákxeyk axta negko'o apxagkok xama énxet apkeñama nak Chipre apwesey axta Mnason, aptaha axta nano' mey'áseyam Wese' egegkok Jesús, apmokók axta anhan hegmések yakwánxa aghakha negko'o.
Pablo apteme meyk'a Santiago
17Xama axta nelwokmo negko'o tegma apwányam Jerusalén, yetlo elpayheykekxa apwáxók axta ẽlmak takha' ẽlyáxeg'a nentémo xamo' nak magya'áseyam. 18Mók ekhem axta entahak sẽlyetlawa negko'o Pablo nentaha meyk'a Santiago. Apháha axta anhan apyókxoho apkelámha apmonye'e kélakneykekxexa m'a: 19Apkelpeykásegkek axta Pablo xa énxet'ák nak, keñe axta apkeltennáseyncha'a ekyókxoho m'a ektémakxa axta aksok apkelané Dios nepyeseksa énxet'ák metnaha nak judíos eñama apchásenneykekxa m'a Pablo. 20Xama axta apkelleg'a énxet'ák xa, apkeltemésesek axta apcheymákpoho Dios. Entahak axta amya'a apcháneyákpo Pablo s'e:
—Egyáxeg, apwet'ak xép apxáma judíos apteme melya'áseyam, apyókxoho nahan apkelenxanakmok apkeltamho kólyetlákxak ma'a Moisés segánamakxa apagkok nak. 21Kéltennasegkek nahan énxet'ák judíos apxénamakpo exchep apkelxekmósama énxet'ák judíos apheykha nak megkatnahakxa apkelókxa, apxeyenmék hek xép megkeyméxko elyahakxohok ma'a Moisés segánamakxa apagkok nak, keñe exnek han meltémo exchep kólkahaksek kélketchek ma'a kélyenyekhamol'a egyempehek hẽlkahaksek, keñe exnek han meltémo exchep elyetlók ma'a nentémakxa nak negko'o. 22¿Yaksak eyke eyéméxko anlána'? Hakte ellegak sat amya'a énxet'ák apwa'a exchep. 23Akke tásek elának xép se'e: Apyetneyk hawók nápakha énxet'ák negyeseksa negko'o, cham'a eyéméxko nak esawhohok elának ma'a aptémakxa axta apkelpeywa. 24Enaklakxa xa énxet'ák nak, etne sat eyáxñeyo aptémakxa exchep nápakto' Dios xamo' xa énxet'ák nak. Xép sat eyanmagkasesek ekwánxa ekyanmaga yakwayam etnahagkok eyáxñeyo apkeltémakxa xa énxet'ák nak, yakwayam enxoho elepwának etegyagkok apkelyese.#Nm 6.13-21. Keñe sat elya'ásegwók apyókxoho énxet'ák ektémakxa nak apxénamap xép ektaha megkamámnaksoho, tén han elya'ásegwók apkelyaheykekxoho exchep ma'a eltémókxa nak antehek segánamakxa. 25Nentáxésesek axta negko'o weykcha'áhak neltamhókxa etnahagkok ma'a énxet'ák metnaha nak judíos apteme axta melya'áseyam: megkeyméxchek etawagkok ma'a ápetek kélméso nak aksok kéleykmáseso, tén han ma'a éma, tén han metawagkek ápetek ma'a aksok kélnaktóso kélyakhakkaso nak ayespok ekmatña, kéméxchek nahan megkóllanyek ma'a ekmaso nak nentémakxa mansexta.#Hch 15.29.
Pablo apmomap kañe' tegma appagkanamap
26Apnaklókek axta Pablo hawók nápakha énxet'ák. Mók ekhem axta entahak apkelana Pablo eyáxñeyo nentémakxa nápakto' Dios xamo' xa énxet'ák nak; keñe axta aptaxna kañe' tegma appagkanamap Pablo yakwayam eltennágwakxak ekwánxa ekhem yakwánxa kawók néxa m'a apkeláneyak axta negaxñáseykekxa nentémakxa nápakto' Dios, cham'a yakwánxa sat elsók aksok apméso Dios xa hawók nápakha énxet'ák nak.
27Chágketwokmek axta yakwánxa kammok néxa siete ekhem, nápakha énxet'ák judíos apkeleñama yókxexma Asia axta apkelwet'ak Pablo m'a kañe' tegma appagkanamap. Apyenegkesek axta nahan exma. Kélwakhegwokmek axta Pablo. 28Aptahak axta apkelyennaktésawo apkelpeywa s'e: “¡Enxet'ák Israel, hempásem negko'o! Cháxa énxet apweynchámeykencha'a nak ekyókxoho yókxexma xa, apkelxekmósegkek nahan énxet'ák ma'a nelxekmowásamáxche enmexma nak ma'a énxet'ák egagkok, tén han enmexma m'a Moisés segánamakxa apagkok nak, tén han enmexma s'e tegma appagkanamap egagkok nak. Apkelántaxnésa'ak kaxwo' nápakha énxet'ák griegos s'e tegma appagkanamap egagkok nak, aptawáseyha s'e ekpagkanamaxchexa nak.”
29Aptemék axta apkelpeywa énxet'ák apxéna Pablo xa, hakte nano' axta apwet'a m'a nepyeseksa tegma apwányam yetlo apxegexma Trófimo,#Hch 20.4. cham'a Trófimo apkeñama axta Efeso, apkeneykek axta énxet'ák apyentameykekxa Pablo kañe' tegma appagkanamap ma'a Trófimo.
30Sawhékxók axta apyennegkesóxma énxet'ák ekyókxoho nepyeseksa tegma apwányam, apnaktémágkek axta nahan énxet'ák apkelwokmo m'a tegma appagkanamap. Apmákpek axta Pablo, kélyegenteyk axta kéltekkesa m'a kañe' tegma appagkanamap, ñohok axta anhan kélapégkakxo atña'ák. 31Keto' axta apmatñamakxa Pablo aplegágweykxo amya'a xama sẽlpextétamo apwese' apkeñama Roma apyennegkesáxma énxet'ák ma'a tegma apwányam Jerusalén. 32Apchánchesákxeyk axta sẽlpextétamo apagkok xa sẽlpextétamo apwese' nak, tén han ma'a sẽlpextétamo apkelámha apmonye'e nak, apketchágkek axta appáxakwokmo énxet'ák. Xama axta apkelwet'a sẽlpextétamo apwese' xa énxet'ák nak, tén han ma'a sẽlpextétamo apagkok axta, apkelwáteságkek axta aptekpageykha Pablo. 33Apyepetchegwokmok axta xa sẽlpextétamo apwese' nak, apmeyk axta Pablo, apkeltamhok axta kóltétek ánet cadenas. Keñe axta apkelmaxneyeyncha'a aptémakxa enxoho, apkelmaxneyáha axta anhan ektémakxa enxoho aksok apkelané. 34Mók aksok axta cha'a apxénak apkelyennaktésawo apkelpeywa xa énxet'ák nak, keñe axta anhan nápakha apxéna mók aksok, mopwanchek axta apmoko ey'ásegwomhok sẽlpextétamo apwese' xa ektahakxa axta apyennegkesóxma énxet'ák; keñe axta apkeltamho sẽlpextétamo apwese' kólyentemekxak Pablo m'a sẽlpextétamo apxanák. 35Xama axta kélwagkasa Pablo m'a nelchánteykegkaxa axta néten yakwayam antexek sẽlpextétamo apxanák, keñe axta kéleyna Pablo, axta ñokxa m'a apkellóko apagko' axta énxet'ák; 36hakte apyókxoho énxet'ák axta apkelxegak axayo' neptámen Pablo. Aptahak axta apkelyennaktésawo apkelpeywa s'e: “¡Yetsapok apagkok xa!”
Pablo apchátegmoweyak énxet'ák apkelpeywa
37Xama axta peya kóltaxnések Pablo kañe' sẽlpextétamakxa, aptahak axta Pablo apkelmaxneyeyncha'a sẽlpextétamo apwese' s'e:
—¿Ewancheya ko'o apakhetchesek sekxo' xép?
Aptahak axta apchátegmowágko sẽlpextétamo apwese' s'e:
—¿Apwanche neyke exchep griego appeywa? 38¿Háweya exchep énxet apkeñama axta Egipto aptekkesa axta kempakhakma étkok keñe apmahágko yókxexma meykexa énxet yetlo apkelxegexma'a cuatro mil énxet apkempakhayol'a?
39Aptahak axta Pablo s'e:
—Judío ko'o, cha'a seyókxa m'a Tarso yókxexma Cilicia, cham'a aptaha nak apyawakxa tegma m'a; heyho hana sekxo' alpakhetchesek ko'o xa énxet'ák nak.
40Apcha'awók axta anhan xa sẽlpextétamo apwese' nak, keñe axta apkenmeyncha'a Pablo m'a keto' nentaxnamakxa axta sẽlpextétamo apxanák, apya'ásek axta néten apmek apkeltamho elwanmak énxet'ák. Xama axta apkelwanmeyágko énxet'ák, aptahak axta apkelpakhetchesa Hebreo appeywa s'e:
Currently Selected:
LOS HECHOS 21: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
