LOS HECHOS 20
20
Pablo apmaheyak Macedonia tén han ma'a Grecia
1Xama axta ekmassa ekyennamáxma, apkeláneyáha axta Pablo énxet'ák apteme axta melya'áseyam yakwayam enxoho elpakhetchásekxohok makham. Keñe axta apkelpeykásegkakxoho xa énxet'ák nak apmahágko m'a Macedonia. 2Apsawhekxók axta apteme meyk'a Pablo xa yókxexma nak, apkelwaskakkáseykxók axta énxet'ák apteme melya'áseyam eñama m'a apkeltenneykha. Keñe axta apwokmo nahan ma'a yókxexma Grecia. 3Apkántanxo pelten axta aphakmok ma'a. Keto' axta apchántamakxa Pablo yántakpayhe yakwayam emhagkok ma'a yókxexma Siria, cham'a apleg'a axta amya'a apkeláneykxo apkelpakmeyesma énxet'ák judíos yakwánxa etnésesek, keñe axta aptakháwo náxop Pablo, appéwok axta makham ma'a Macedonia. 4Xama énxet apkeñama tegma apwányam Berea axta aptahak nahan apxegexma apwesey axta Sópater, Pirro apketche axta m'a; Aristarco axta anhan ma'a, tén han ma'a Segundo, apkeleñama axta tegma apwányam Tesalónica, Gayo axta anhan ma'a apkeñama axta Derbe, Timoteo axta nahan ma'a, Tíquico axta anhan, tén han ma'a Trófimo, cháxa aptaha axta apkeleñama yókxexma Asia xa. 5Apmonye'e axta apkelxegak xa ẽlyáxeg'a nak. Axta ẽleyxwokmok negko'o m'a tegma apwányam Troas. 6Natámen aptámákpexa kelpasmaga meyke kempáseyak axta eyke nelántépak negko'o m'a tegma apwányam Filipos. Yántakpayhe axta nelchántak, cinco ekhem axta entemék neltahanyékxo tegma apwányam Troas xa énxet'ák nak. Siete ekhem axta neghakmok ma'a.
Pablo apteme meyk'a tegma apwányam Troas
7Negaknákxeyk axta negko'o eyeynókxa ekxega ekhem la'a yakwayam enxoho anlának nempasmo ektakmela. Apkeltennáseyha axta Pablo m'a énxet'ák apteme axta melya'áseyam. Mók ekhem axta peyk etyapok Pablo m'a, ékeso eñamakxa ekwokmoho axta apkeltenneykha axta'a eysekso'. 8Negaknákxeyk axta negko'o tegma netno', xámok axta chálewaso elálewágko m'a; 9apheyk axta átog étkok xama wokma'ák apwesey axta Eutico. Ahóxek axta apkeltenneykha Pablo, keñe axta apyenméncha'a xa wokma'ák nak, yentaxnegwokmók axta anhan apteyenma, keñe axta apteyekmo apkeñama m'a tegma netno' ektahakxa axta antanxo apwáxok; kélheyásekxeyk axta néten aphápak. 10Aptekkek axta Pablo náxop, apyetnakmek axta néten apyetnakxa wokma'ák, appathetchek axta anhan. Aptahak axta apkeláneya énxet'ák aptémo xamo' melya'áseyam se'e:
—Nágkawho aksa kélnenyek; megyetsapak se'e wokma'ák nak.
11Keñe axta apkenátweykxo makham Pablo m'a tegma netno', apyepteyk axta kelpasmaga apkelana nempasmo ektakmela, aptókagkek axta nahan, keñe axta apkelenxanakmoho apkeltenneykha Pablo ekwokmoho elsaka, keñe axta apxega. 12Apyennákxók apagko' axta kélyentamákxo xa wokma'ák nak. Axta keñamak ekyágwokmoho apteme melya'áseyam énxet'ák xa.
Pablo apxega apmaheyak Mileto apkeñama m'a Troas
13Egmonye'e axta negko'o nelxegak, yántakpayhe axta nelchántak nelwákxo m'a Aso yakwayam enxoho agyentawakxak Pablo m'a, ekhawo m'a ektahakxa axta nelpakmeyesma, hakte náxop axta apmokók exog Pablo. 14Xama axta nelwetáxko negko'o m'a yókxexma Aso, nenchántawók axta xamo' yántakpayhe Pablo m'a, keñe axta nelmahágko m'a tegma apwányam Mitilene. 15Nelxegákxeyk axta negko'o neleñama m'a Mitilene, mók ekhem axta entahak negyeykhágwokmo m'a nepyáwa tegma apwányam Quío, xama ekhem axta entahak nelwokmo m'a tegma apwányam Samos, neyáwa wátsam ekwányam axta m'a. Mók ekhem axta entahak nelxega nelwokmo m'a Mileto. 16Cháxa nentahakxa axta negko'o xa, hakte axta emokók emhagkok Pablo m'a tegma apwányam Efeso, yakwayam enxoho megkawegkók apha m'a yókxexma Asia; apmenyék axta kañehémhok ewakxak ma'a tegma apwányam Jerusalén, apmenyék axta kawomhok apha Pablo ekhem Pentecostés apweykxa axta Espíritu Santo m'a, cham'a ektepa enxoho.
Pablo apkeltennáseykha énxet'ák apkelámha apmonye'e tegma apwányam Efeso
17Apkeltamhok axta Pablo kóltennásekxak énxet'ák apkelámha apmonye'e nak kélakneykekxexa tegma apwányam Efeso, cham'a neyseksa apha axta tegma apwányam Mileto. 18Xama axta apkelwokmo Mileto xa énxet'ák nak, aptahak axta Pablo apkeláneya s'e: “Kélya'ásegkok kéxegke sektémakxa axta ko'o sekxo' sekwaya keso yókxexma Asia. 19Eláneyak axta cha'a ko'o kélnepyeseksa kéxegke sektamheykha eñama nak Wese' egegkok yetlo megkeymáxkoho ewáxok, tén han yetlo selekxagweykha cha'a neyseksa ekyóxoho aksok seyahapwayól'a cha'a eñama apmopmenyého hetnésesek ma'a énxet'ák judíos. 20Axta eyke alwateseykmok seltennáseykha kéxegke m'a ekyókxoho ektémakxa nak amya'a yakwayam enxoho kapasmok kéxegke, elxekmósegkek axta anhan kéxegke nápakta'awo' énxet'ák, tén han ma'a kélxanák. 21Eltennasegkek axta ko'o énxet'ák judíos seltémo elyakmagkasek apwáxók, tén han ma'a énxet'ák metnaha nak judíos, tén han seltémo etnehek melya'áseyam ma'a Wese' egegkok Jesús. 22Tegma apwányam Jerusalén peyk amyekxak kaxwo' ko'o eñama seyáteyeykegkoho amhagkok ma'a Espíritu Santo, neyseksa may'áseyak yakwánxa hetnehek ko'o m'a. 23Wánxa aksa ko'o sekya'ásegkoho Espíritu Santo seltennaso selhaxna cha'a ko'o sekmomaxche, tén han ekyawe seklegeykegkoho, cham'a ekyókxoho tegma apwányam sekmahágkaxa enxoho. 24Wánxa agkok, megkaxeyenmak ko'o ewáxok se'e ektémakxa nak sekyennakte, akke enxéneykha cha'a ko'o ewáxok alenxanmohok ma'a ektémakxa nak selteyásamáxche yetlo ekpayheykekxa ewáxok ekwokmoho sekwokmo néxa,#2 Ti 4.7. tén han asawhohok alának ma'a Wese' egegkok Jesús axta seyásennagko altennaha amya'a ektakmela eñama nak Dios segásekhayo.
25“Nakso' ektemesásak ko'o peya mehelwetekxók kaxwo' kélxama kéxegke cham'a seklegasa axta amya'a aptémakxa nak Wese' apwányam Dios. 26Ekeso eñamakxa seltennasa nak kaxwo' kéxegke megkeytnakha'awo ko'o ewáxok kéxegke eñamakxa, 27hakte eklegásek axta kéxegke ekyókxoho apmaheyókxa nak elának Dios, meyke sekpóso xama enxoho. 28Kólleyxmakha kéxegke, kóltakmelches ma'a ekyókxoho apchakneykekxexa nak, cham'a aptemésesamakxa nak kéxegke Espíritu Santo kélláneykegkaxa, yakwayam enxoho kóltakmelchesek Dios énxet'ák apagkok, aptaha axta anhan apkelma eñama m'a apyenkenma axta éma apagkok. 29Ekya'ásegkok ko'o m'a sekxega sat peya elwak pók énxet'ák, emawhok sat emasésak ektémakxa nak apchakneykekxa énxet, máxa sat etnahagkok ma'a aksok nawha'ák ellól'a. 30Kawomhok sat nahan apkelánteyapma kélnepyeseksa kéxegke énxet'ák peya sat elxekmósek apnámokkok ma'a megkamámnaksoho nak, yakwayam enxoho elyetlakxak ma'a énxet'ák apteme nak melya'áseyam Jesús. 31Kólleyxmakha; kaxénwakxoho cha'a kélwáxok mayenseykmo axta seltennáseykha kélyókxoho kéxegke yetlo selekxagweykha ekweykmoho apkántanxo apyeyam, axta ayenseykmok cha'a ekyókxoho ekhem tén han ekyókxoho axta'a.
32“Elyáxeg, kaxwo' eltamhok ko'o eltakmelchesek kéxegke Dios tén han kaltakmelchesek kéxegke m'a appeywa sẽltennasama nak ektémakxa Dios segemleyam. Yetneyk apmopwána Dios yakwayam ewánegkesesek kéxegke xa ektémakxa nak megkólya'áseyam, yetneyk nahan apmopwána elmésagkok kéxegke m'a aksok apxeyenma axta elmésagkok ma'a ektaha nak Dios énxet'ák apagkok apkelpagkanamap. 33Axta ko'o katsapmak egkenyek selyakye xama enxoho tén han ma'a émók nak aksok apagkok; 34kélya'ásegkok ektakmela kéxegke sektamheykencha'a axta ko'o yakwayam enxoho ótak ma'a aksok eyéméxchexa nak, yakwayam enxoho nahan ótaksek aksok eyéméxchexa m'a selxegexma'a nak ko'o. 35Alxekmóshok axta cha'a kéxegke eyéméxko antehek nentamheykha xa, ampasmok ma'a énxet'ák ekha nak eyéméxchexa aksok yetlo ekxeyenma egwáxok aptémakxa axta appeywa Wese' egegkok Jesús se'e: ‘Kapayhekxak cha'a egwáxok negmésa enxoho aksok egmók, kaxnók ma'a nenxawé nak aksok.’ ”
36Apkeltekxekkek axta aptapnák xóp Pablo natámen apteme appeywa xa, aptemék axta nempeywa nelmaxnagko yetlo xa énxet'ák nak. 37Apyókxoho axta apkellekxagweyha xa énxet'ák nak, kélpathetchek axta Pablo, kélpetsesek axta anhan. 38Kellapwámegkók agko' axta xa énxet'ák nak, hakte apkeltennásek axta Pablo peya melwetekxók cha'a. Keñe axta kélyetlákxo Pablo ekweykmoho m'a ekyetnakxa axta yántakpayhe.
Currently Selected:
LOS HECHOS 20: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
