LOS HECHOS 19
19
Pablo apwayam tegma apwányam Efeso
1Apyeykhágwokmek axta Pablo yókxexma ekxámakxa axta xóp elekhaheyak elyawe, apwákxeyk axta tegma apwányam Efeso, apkelwetágwokmek axta pók xama énxet'ák apteme melya'áseyam Jesús ma'a, cham'a neyseksa apha axta Apolo tegma apwányam Corinto. 2Aptahak axta Pablo apkelmaxneyeyncha'a s'e:
—¿Kélxaweykegkeya kéxegke Espíritu Santo, cham'a kéltéma axta megkólya'áseyam Jesús?
—Manlegeyk negko'o exénakpok Espíritu Santo, axta aptahak apkelátegmowágko xa énxet'ák nak.
3Aptahak axta apkelmaxneyeyncha'a Pablo s'e:
—¿Háxko axta ekteme kélyakpáseso yegmen kéxegke?
—Hawók ma'a ektémakxa axta apyakpasáseyak yegmen énxet Juan, axta aptahak apkelátegmowágko xa énxet'ák nak.
4Aptahak axta apkeláneya Pablo s'e:
—Nakso', eyakpásesagkohok axta cha'a yegmen Juan ma'a énxet'ák ektahakxa enxoho apyakmagkaso apwáxók, wánxa agkok, eltennaksohok axta eyke cha'a Juan énxet'ák apkeltémo etnahagkok melya'áseyam ma'a peya axta ewak neptámen, cham'a Jesús.#Mt 3.11; Mr 1.4,7-8; Lc 3.4,16; Jn 1.26-27.
5Xama axta apkelleg'a énxet'ák xa, kélyakpasásegkek axta anhan yegmen eñama nak Wese' egegkok Jesús apwesey; 6Xama axta anhan apnegkena apmék Pablo, apweywenteyk axta Espíritu Santo apyetseksa'ák xa énxet'ák nak, apkelpakmetchek axta mók ektémakxa apkelpeywa, apkeltennáha axta anhan amya'a eñama nak Dios. 7Doce axta apyókxoho xa énxet'ák nak.
8Apkántanxo pelten axta weykmok apmeyeykekxa cha'a Pablo apchakneykekxexa énxet'ák judíos, cham'a apkeltenneykegkaxa axta cha'a Dios appeywa yetlo megyeye, apkeltennáseykha axta énxet'ák apkelenxáneykmo etnésásekxak melya'áseyam énxet'ák ma'a aptémakxa nak Wese' apwányam Dios. 9Apkelyennaktések axta eyke apwáxók nápakha énxet'ák, apkelya'ásekmek axta, sagkek axta anhan cha'a apxeyenma ámay axnagkok nápakta'awo' énxet'ák. Keñe axta aptepa Pablo nepyeseksa xa énxet'ák nak, apnaklákxeyk axta énxet'ák apteme melya'áseyam ma'a nelxekmowásamáxchexa aphakxa axta xama énxet apwesey axta Tirano. Yókxoho ekhem axta apkeltenneykha m'a. 10Cháxa ektahakxa axta aptamheykha Pablo ekwokmoho apkánet apyeyam xa. Apyókxoho énxet apheykha yókxexma Asia axta apkellegeyk amya'a eñama nak Dios Wese' egegkok, énxet'ák judíos tén han ma'a énxet'ák metnaha nak judíos. 11Apkeláneyak axta cha'a Dios aksok sempelakkaso agko' nak agweta' eñama apchásenneykekxa m'a Pablo. 12Wokmók axta kélsókaso apkelháxamap ma'a Pablo teté yespok apketkók apagkok tén han apkelnakta, cham'a ektaha axta apmeykha Pablo, apkeltakmelweykmek axta anhan apkelháxamap eñama xa, kelánteyepmeyk axta anhan apwáxók énxet'ák kelyekhama'.
13Nápakha judíos axta apkelweynchámeykha nepyeseksa tegma apkelántekkesesama cha'a apwáxók énxet'ák aksok elmasagcha'a nak. Apmenyék axta yásenneykxak ma'a Jesús apwesey nak. Etnohok axta cha'a yának aksok elmaso s'e: “¡Yetlo sekxeyenma Jesús apwesey ko'o eltamhok kólántépok se'e, cham'a apkeltenneykencha'a nak cha'a apwesey Pablo!”
14Cháxa aptamheykegkaxa axta cha'a siete Esceva apketchek xa, cham'a Esceva aptaha axta apkemha apmonye appasmo apkelmaxnéseso Dios énxet'ák apagkok. 15Wánxa agkok, xama ekhem axta eyke chátegmowágkok aksok ekmaso xa énxet'ák nak. Entahak axta eláneya s'e: “Ekya'ásegkok ko'o Jesús, ekya'ásegkok nahan ma'a Pablo; ¿yaksak eyke énxet kéxegke?”
16Yetlókók axta apketámeyak énxet ektaha axta kelyekhama' ektawáseykha xa énxet'ák nak, apmeyhek axta m'a, apkelnápeyha axta apyókxoho nak, apnaktawásegkok axta yetlo apmenxeneykha. Meyke apáwa axta apkenyahágkok apkelántepa xa tegma nak, apkelyensék axta anhan. 17Apyókxoho énxet'ák apheykha tegma apwányam Efeso axta apkelleg'ak amya'a ektahakxa, judíos tén han ma'a metnaha nak judíos. Awanhok agko' axta anhan apkelaye. Cháxa ektahakxa axta ekyágwokmoho ekpayheykekxa apwesey Wese' egegkok Jesús xa.
18Apkelwa'ak axta anhan apxámokma énxet apteme axta melya'áseyam, apkelxénchek axta nápakta'awo' énxet'ák ma'a ekyókxoho aksok ekmaso apkeláneyak axta, 19apxámok axta anhan apkelwokmo m'a énxet'ák aptamheyak axta kelyohóxma'a, apkelsokmók axta weykcha'áhak apagkok, apkelwatneyk axta nápakta'awo' énxet'ák. Xama axta apkelyetsátékxo énxet'ák ekwánxa ekyanmaga xa weykcha'áhak nak, cincuenta mil sawo selyakye elmomnáwa axta egwokmok. 20Cháxa ektahakxa axta ekpayhekxo amya'a eñama nak Wese' egegkok Dios xa, wetáxchek axta nahan ma'a ektémakxa nak Dios apmopwána.
21Apmokók axta epewhok apxega Pablo m'a yókxexma Macedonia, tén han ma'a yókxexma Acaya, ekwokmoho apwokmo m'a tegma apwányam Jerusalén, natámen xa. Apxeyenmék axta anhan emhagkok tegma apwányam Roma natámen apmaheyak ma'a Jerusalén. 22Apkeláphásek axta apkánet apkelxegexma'a m'a yókxexma Macedonia, Timoteo axta m'a, tén han ma'a Erasto, keñe axta Pablo aphákxo yáma ekwenakte m'a yókxexma Asia.
Ekyennamáxma tegma apwányam Efeso
23Chakhawók axta anhan ektepa ekyennamáxma tegma apwányam Efeso ekxénáxko m'a ámay axnagkok nak. 24Xama énxet apwesey Demetrio axta keñamak aptekkeso ekyennamáxma, cham'a aptaha axta apkelané sawo elyenma nak. Elánhok axta cha'a tegma apketkók apheyáseykegkoho m'a kélpeykesamókxa axta diosa kéltéma axta Artemisa. Xámok axta nahan katnehek cha'a apwetaso selyakye m'a énxet'ák ektaha axta apkeleykmasáseykha xamo' Demetrio. 25Apchánchesákxeyk axta apkelxegexma'a, tén han ma'a énxet'ák ekhawo axta ektémakxa apkeltamheykha. Aptahak axta apkeláneya s'e: “Kélya'ásegkok kéxegke eñama ekxákma aksok egagkok se'e ektémakxa nak nentamheykha. 26Kélwet'ak eyke kéxegke, kélleg'awók nahan apxeyenma Pablo megkatnaha dios ma'a kéleykmáseso énxet apkelané nak. Cháxa keñamak apkelyakmagkasesa nak apwáxók énxet'ák xa, háwe ekwánxa agkok se'e Efeso, wákxók nahan ma'a ekyókxoho yókxexma Asia. 27Awanchek hentawásesha nentamheykha xa, hakte kamassegwók katnehek ma'a ektémakxa nak cha'a negkexeykekxa aksok nenlané, kamassegwók nahan ekpayhekxo apxénamap ma'a tegma kélpeykesamókxa nak diosa Artemisa, keñe sat kamaskok kélakawo xa, kánéxchek sat katnahak mékoho, cham'a kélpeykesamo nak cha'a ekyókxoho yókxexma Asia, tén han ekyókxoho yókxexma keso náxop.”
28Xama axta apkelleg'a énxet'ák xa, apkellókek axta. Aptahak axta apkelyennaktésawo apkelpeywa s'e: “¡Méko kaxhok diosa Artemisa ektaha nak apcháyókxa énxet'ák Efeso!”
29Sawhékxók axta ekyennamáxma xa tegma apwányam nak. Kélwakhegwokmek axta Gayo, tén han ma'a Aristarco, cháxa apkánet énxet ektaha axta apkelxegexma'a Pablo xa apkeleñama m'a Macedonia. Kélyenyawásegkakxeyk axta kélya'áseykxo m'a apchakneykekxexa axta cha'a énxet'ák. 30Apmokók axta eykhe etaxnegwók Pablo m'a yakwayam elpakhetchesek énxet'ák, wánxa agkok, axta eyke ya'awok ma'a énxet'ák apteme axta melya'áseyam Jesús. 31Apháha axta anhan nápakha kelwese'e apchásekhayókxa Pablo nepyeseksa kelwese'e m'a yókxexma Asia, apkeltamhok axta kóltennaksek Pablo xa kelwese'e nak yakwayam enxoho metaxnegwomek ma'a aphágkaxa axta énxet'ák. 32Mók aksok axta cha'a apxénak énxet'ák ektaha axta apchakneykekxa m'a, keñe axta anhan nápakha apxéna mók aksok, hakte apyennegkesek axta exma énxet'ák, apxámok axta anhan melya'áseyak ektahakxa apchaknákxo énxet'ák. 33Nápakha énxet'ák axta eyke apkeltennáseyha Alejandro m'a ektahakxa axta, cham'a Alejandro apyegégkakxo axta énxet'ák judíos nápakta'awo' apyókxoho énxet'ák. Apya'ásek axta néten apmek Alejandro apkeltamho elwanmak énxet'ák, peyk axta epakmétek yakwayam elmeyók énxet'ák judíos nápakta'awo' énxet'ák. 34Xama axta apyekpelchágwokmo énxet'ák aptaha judío m'a Alejandro, wegkawók axta apkelyennaktésamo apkelpeywa xa énxet'ák nak. Aptahak axta s'e: “¡Méko kaxhok Artemisa ektaha nak apcháyókxa énxet'ák Efeso!”
35Keñe axta appakmeta xama énxet aptaha axta kélásenneykha xa tegma apwányam nak, cham'a apkelwanmeyáseykxo axta énxet'ák. Aptahak axta appakmeta s'e: “Kéxegke kélheykha nak Efeso. Apyókxoho énxet'ák apkelya'ásegkohok tegma apwányam Efeso eyánémaxko katakmelchesek ma'a tegma kélpeykesamókxa nak diosa meyke ekhémo Artemisa, tén han ma'a kéleykmáseso kélheyaseykegkoho nak, ektéyékmo axta eñama néten. 36Méko kawának kaxének ektaha megkamámnaksoho xa. Ekeso eñamakxa eyéméxko nak kólwanmeyekxak kéxegke. Nágkólpekhés kóllának xama aksok, cham'a megkalchetama enxoho sekxo' kélwáxók. 37Hakte metwáseykha tegma kélpeykesamókxa diosa Artemisa xa énxet'ák kélnaklókmo exchek kéxegke, mexeyenmak nahan ekmaso diosa egagkok nak. 38Yetneyk agkok megkaleklo apwáxok Demetrio aptahakxa aptamheykha xama énxet, tén han ma'a apkeltamheykha xamo' nak Demetrio, apháha m'a énxet'ák segyekpelchémo nak, tén han ma'a énxet'ák appasmeykha nak apkeltamheykha énxet'ák segyekpelchémo nak. Kóllánegwákxa amya'a megkalchakxa enxoho kélwáxok nápakta'awo' ma'a énxet'ák segyekpelchémo nak. Cha'a kélwanchek kóllánekxak amya'a m'a. 39Yetneyk agkok nahan kéxegke mók aksok yakwayam kólxének, kéméxchek kóláneyha kelwese'e apkelxegkesamol'a kélakneykekxa, cham'a kélláneykxo enxoho amya'a. 40Hẽlpehesetak sat negko'o nentaha nelyáteyeykegkoho énxet'ák xa ektahakxa nak kaxwo'. Ẽlmaxneyáha sat agkok negko'o xa ektahakxa nak ekyennamáxma, méko sat antehek negko'o yakwayam agátegmowagkok.” 41Apkeláphásek axta énxet'ák natámen apteme appeywa xa.
Currently Selected:
LOS HECHOS 19: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
