LOS HECHOS 16

Timoteo apteme apxegexma Pablo tén han Silas

1Apwokmek axta Pablo tegma apwányam Derbe, tén han ma'a tegma apwányam Listra. Axta apwetágwomhok xama énxet apteme axta mey'áseyam Wese' egegkok ma'a apwesey axta Timoteo, xama judía kelán'a ekha megkay'áseyam étche axta m'a, keñe axta apyap griego. 2Tásek axta nahan katnehek cha'a apxeyenma Timoteo m'a énxet'ák apteme nak melya'áseyam Wese' egegkok apheykha m'a tegma apwányam Listra, tén han ma'a apkeleñama axta tegma apwányam Iconio. 3Apmenyék axta Pablo etnehek apxegexma Timoteo, wánxa agkok, apkeltamhok axta eyke sekxo' Pablo kólkahaksek Timoteo, cham'a sẽlyenyekhásesamol'a egyempehek, amonye apma aptamheykha, yakwayam enxoho metaknókehek énxet'ák judíos apheykha axta xa yókxexma nak, hakte apyókxoho énxet'ák axta apkelya'ásegkohok Timoteo aptaha apyap griego. 4Ekyókxoho apkelókxa apkelwánxa axta cha'a apkeltennáseyha énxet'ák apteme axta melya'áseyam, cham'a apkeltamhókxa axta etnahagkok énxet'ák seykha amya'a, tén han ma'a apkelámha apmonye'e nak kélakneykekxexa tegma apwányam Jerusalén. 5Kelyennakwokmek axta aptamheyak melya'áseyam xa énxet'ák apkeleñama nak kélakneykekxexa, ekyókxoho ekhem axta cha'a apxámágkok.

Pablo apweté máxa apwanmagko énxet apkeñama Macedonia

6Apkelyeykhágwokmek axta yókxexma Frigia tén han ma'a Galacia Pablo tén han ma'a apkelxegexma'a, hakte axta eltamhok kóltennaha amya'a eñama Dios Espíritu Santo m'a yókxexma Asia. 7Apkelwokmek axta anhan ma'a néxa yókxexma Misia. Axta xénwomhok apwáxók elántaxnegwók yókxexma Bitinia m'a, wánxa agkok, Jesús Espíritu apagkok axta eyke megya'awo. 8Apkelyeykhágwokmek axta yókxexma Misia, keñe axta apkelmahágko tegma apwányam Troas, neyáwa wátsam axta m'a. 9Axta apwetágwomhok Pablo aksok kélxekmóso axta'a m'a; apwet'ak axta apkenmeyncha'a xama énxet apkeñama Macedonia keñe exnek aptaha apcháneya s'e: “Emyogma s'e Macedonia, hempásegwata negko'o.” 10Nenláneykxeyk axta negko'o nentahakxa negmoko ólmahagkok ma'a Macedonia natámen apweté axta Pablo xa aksok kélxekmósamo nak, nakso' axta nentemesásak sẽlwoneyncha'a negko'o Dios ma'a, yakwayam enxoho anlegaksek amya'a ektakmela xa énxet'ák nak.

Pablo tén han Silas apkelwayam tegma apwányam Filipos

11Nelchenátwokmek axta negko'o yántakpayhe m'a tegma apwányam Troas, nelwákxók axta m'a egkexe étkok ekwesey axta Samotracia, mók ekhem axta entahak nelwákxo m'a Neápolis. 12Axta nelchempágwomhok nelmahágko tegma apwányam Filipos ma'a, cham'a apheykegkaxa axta énxet'ák romanos, apyawakxa tegma yókxexma Macedonia axta m'a. Axta neghakmok yakwatakxoho m'a. 13Ekhem nellókasamakxa nelyampé axta nelántepa negko'o nepyáwa tegma apwányam, nekha wátsam axta m'a negánamakxa axta negko'o keytnók aptémakxa nempeywa nelmaxnagko énxet'ák judíos. Neghakmek axta negko'o m'a, neltennáseyha axta Dios appeywa kelán'ák eyaknákxo axta m'a. 14Lidia axta ekwesey xama xa kelán'ák nak, tegma apwányam Tiatira axta keñamak. Apáwa hómáyok apkeltakmalma axta exeykekxa. Kalpeykeshok axta cha'a Dios xa kelán'a nak, haxnawók axta kéltenneykha, keñe axta aptemésesa Wese' egegkok yakwayam katakmelcheshok agko' ekháxenmo ektahakxa apkeltenneykha Pablo. 15Kélyakpásesek axta yegmen xa kelán'a nak, tén han ma'a ekyókxoho ekheykha nak axagkok. Keñe axta ektaha sẽláneya s'e:

—Nakso' agkok kélyekpelchawo kéxegke sektaha ko'o may'áseyam Wese' egegkok, kólhem exagkok.

Keltamhok axta anhan aghók ma'a.

16Nelmahágkek axta negko'o yókxexma ektamhomaxchexa axta nempeywa nelmaxnagko, negwetágwokmek axta xama kelán'a étkok ekha axta awáxok espíritu ekmaso ekha ekya'áseykegkoho, ekxeyenma axta cha'a yakwánxa katnehek egmonye. Kelán'a étkok ekmomaxche axta xa, kaxénhok axta cha'a yakwánxa katnehek egmonye, kótaksohok axta nahan cha'a selyakye ekxámokma kelwese'e agkok. 17Ẽlyetlókha axta negko'o xa kelán'a étkok nak, Pablo tén han negko'o. Entahak axta cha'a ekyennaktésawo ekpeywa s'e:

—¡Cháxa énxet'ák aptaha nak Dios Wese' néten apkeláneykha xa, aplegásek kéxegke amya'a ekxeyenma nak ámay segwagkasamo nak teyp!

18Wegkak axta anhan ekteme xa ekwokmoho ekleklágwokmo Pablo, appeynchakpok axta, aptahak axta apcháneya espíritu ekmaso s'e:

—Yetlo sekxeyenma Jesucristo apwesey eltamhok katyapok xa kelán'a awáxok nak.

Ñohok axta anhan ektepa espíritu ekmaso awáxok xa kelán'a étkok nak.

19Wánxa agkok, xama axta apkelwet'a kelán'a étkok kelwese'e agkok megkawagko kaxwo' kótaksek selyakye, apmeyk axta Pablo tén han Silas, apnaklákxeyk axta aphágkaxa kelwese'e segyekpelchémo m'a ekyawakxa axta exma apheykegkaxa axta cha'a énxet'ák. 20Kélxekmósek axta énxet'ák segyekpelchémo xa, entahak axta amya'a apkelxénákpo s'e:

—Keso énxet'ák judíos aptekkesa nak ekyennamáxma nepyeseksa tegma apwányam se'e. 21Apkelxekmósek nahan énxet'ák nentémakxa megkeyméxko nak negko'o agyetlakxak, hakte negko'o nenteme romanos.

22Keñe axta apkellawa apyókxoho énxet'ák aptaknawe m'a énxet'ák seykha amya'a, apkeltamhok axta énxet'ák segyekpelchémo kólhexyawásesek apkelnakta xa, apkeltamhok axta anhan kóltekpagmakha yámet. 23Kélxatmeyk axta kañe' sẽlpextétamakxa natámen ekxámokma kéltekpageykha. Apkeláneyakpek axta etakmelcheshok apkeláneykha m'a sẽlpextétamo ektaha axta apkeláneykha. 24Xama axta ektaha amya'a apcháneyákpo sẽlpextétamo xa, apxatmeyk axta kañók agko' apwáxok tegma negmomaxchexa. Apkelatchesesek axta apmagkok yámet elméyak axta egmagkok.

25-26Axta'a eysekso' axta entahak ekpelakkasa ekwa'a ekpexyennama xóp ekyennakte agko', kelyawhéseyha axta tegma apowhak negmomaxchexa neyseksa apteme nempeywa nelmaxnagko Pablo tén han Silas, tén han neyseksa apkelmeneykmaso m'a negmeneykmaso eñama nak Dios, aphaxnawók axta anhan énxet'ák ektaha axta apkelmomap. Sawhéxkók axta anhan elmayhékxo atña'ák. Apyókxoho énxet'ák apkelmomap axta anhan kelhexyawaseyxchek kélnakteté cadenas. 27Xama axta apxatakha'a m'a sẽlpextétamo ektaha axta apkeláneykha apkelmomap, apwet'ak axta elmayhékxo atña'ák negmomaxchexa, keñe axta apleya sókwenakte apagkok apmoko yakhakpekxa', hakte apkeneykek axta elxeganakmok ma'a énxet'ák ektaha axta apkelmomap. 28Aptahak axta apkelpáxegkásencha'a Pablo s'e:

—Neygyakhap aksa, nenlánexkók negheyncha'a s'e:

29Keñe axta apkeltamho kóltegyesha chálewaso xa sẽlpextétamo nak, apketchagkakxók axta aptaxnegwákxo kañe', apkelpexyenegkek axta apcheka, apkelpólegwokmek axta apchaknágkaxa Pablo tén han Silas. 30Keñe axta apkelántekkesa yókxexma. Aptahak axta apkelmaxneyeyncha'a s'e:

—¿Yaksak eyéméxko ko'o alának yakwayam awagkasaxchek teyp?

31Etne mey'áseyam Wese' egegkok Jesús, ewagkasakpok sat teyp xép tén han ma'a ekheykha nak apxagkok, axta aptahak apkelátegmowágko Pablo tén han Silas.

32Kéltennáseyha axta amya'a eñama Wese' egegkok Jesús xa sẽlpextétamo nak, tén han ma'a énxet'ák ektaha axta apheykha apxagkok. 33Axta'a axta anhan apkelyenyésesa sẽlpextétamo apkelyense Pablo tén han Silas, keñe axta kélyakpásesa yegmen xa sẽlpextétamo nak, tén han ma'a ekyókxoho ekheykha axta apxagkok. 34Apnaklákxeyk axta apxagkok sẽlpextétamo natámen kélyakpáseso yegmen, apkelágkek axta anhan aptéyak. Payhekxeyk axta apwáxok xa sẽlpextétamo nak tén han ma'a ekheykha axta apxagkok ñokxa aptaha axta mey'áseyam Dios.

35Axto'ok axta apkeláphasa sẽlpextétamo m'a énxet segyekpelchémo nak, apkeltamhok axta kólyenyekxak Pablo tén han Silas. 36Aptahak axta sẽlpextétamo apcháneya Pablo s'e:

—Apkeltamhok xeyk ko'o akxeykxak kéxegke m'a énxet'ák segyekpelchémo nak, kélwanchek kaxwo' kóltakhekxak yetlo meyke ektamheykha kélwáxok.

37Wánxa agkok, aptahak axta Pablo apkeláneya sẽlpextétamo ektaha axta kéláphaso s'e:

—Negko'o nentaha nak neghawo énxet'ák apkeleñama nak Roma, nápakta'awo' énxet'ák axta ẽltekpagáha negko'o neyseksa megkólteme sẽlyekpelchémo, ẽlxatmeyk axta aksa anhan sẽlpextétamakxa. ¿Kélmokóya kaxwo' kólyexaxkohok hẽlchexeykxak negko'o? Megkapayhawok xa. Tásek hẽlántekkesetámhok apancha'awók ma'a énxet'ák segyekpelchémo nak.

38Apkeltennásekxeyk axta sẽlpextétamo m'a énxet'ák segyekpelchémo nak, apkelyegwakkek axta anhan apkelleg'a aptaha Pablo tén han Silas aphémo m'a énxet'ák apkeleñama nak Roma. 39Apkelxegkek axta énxet'ák segyekpelchémo apkelmahágko m'a aphágkaxa axta Pablo tén han Silas, apkeltamhok axta yemlekxoho. Apkelántekkesek axta anhan, apkeltamhok axta anhan elántépok xa tegma apwányam nak. 40Xama axta apkelántepa sẽlpextétamakxa Pablo tén han Silas, apkelmeyákxeyk axta m'a Lidia axagkok. Apkelxegákxeyk axta makham natámen apteyánegweykekxoho axta apkelyáxeg aptémo xamo' nak melya'áseyam, cham'a natámen apkelwaskakkásekxoho axta.

Currently Selected:

LOS HECHOS 16: LEGN

Highlight

Compare

Copy