LOS HECHOS 15

Apchakneykekxa énxet tegma apwányam Jerusalén

1Apkelwokmek axta nápakha énxet'ák Antioquía apkeleñama m'a Judea. Apkelxekmósek axta anhan ẽlyáxeg'a megkalepwagko axta elwagkasakpok teyp melánegko enxoho m'a eltémókxa nak antehek Moisés segánamakxa apagkok,#Lv 12.3. cham'a sẽlkahaso kélyenyekhayol'a egyempehek. 2Kayhek axta apkelátegmomap Pablo tén han Bernabé xa énxet'ák nak, keñe axta kélyéseyncha'a Pablo tén han Bernabé, tén han ma'a pók énxet'ák nak, yakwayam elmahagkok tegma apwányam Jerusalén, yakwayam elánekxak amya'a xamo' énxet'ák seykha amya'a xa énxet'ák nak, tén han ma'a apkelámha apmonye'e nak kélakneykekxexa xa tegma apwányam nak.

3Kéláphásek axta Pablo tén han Bernabé. Apchakneykekxexa énxet tegma apwányam Antioquía axta keñamak kéláphaso. Xama axta apkelwokmo m'a yókxexma Fenicia tén han ma'a Samaria, apkeltennáseyha axta énxet'ák ektémakxa apkexeykegko nano' apcháyókxa m'a énxet'ák metnaha nak judíos yakwayam elyetlakxak ma'a Dios. Apyókxoho énxet'ák melya'áseyam Wese' egegkok axta kelpayhekxak apwáxók apkelleg'a xa amya'a nak.

4Xama axta apkelwákxo Pablo tén han Bernabé m'a tegma apwányam Jerusalén, apkelmeyk axta takha' m'a énxet'ák apteme axta melya'áseyam Wese' egegkok, tén han ma'a énxet'ák seykha amya'a nak, tén han ma'a énxet'ák apkelámha apmonye'e nak kélakneykekxexa. Apkeltennáha axta Pablo tén han Bernabé m'a ekyókxoho aptemésesakxa axta Dios. 5Wánxa agkok, apchaknákxeyk axta néten nápakha fariseos ektaha axta apteme melya'áseyam. Aptahak axta anhan apkelpakmeta s'e:

—Kéméxchek nahan anlanaksek sẽlkahaso kélyenyekhamol'a egyempehek ma'a énxet'ák metnaha nak judíos, kéméxchek nahan agának elának ma'a eltémókxa nak antehek Moisés segánamakxa apagkok.

6Apchaknákxeyk axta énxet'ák seykha amya'a, tén han ma'a apkelámha apmonye'e nak kélakneykekxexa yakwayam enxoho elánekxak xa amya'a nak. 7Apkempákxeyk axta néten Pedro ekwegkawo megkaxnémo mók apkelpakmeyesma énxet'ák. Aptahak axta apkeláneya s'e:

—Elyáxeg, kélya'ásegkok kéxegke selyeseykencha'a axta ko'o Dios kélnepyeseksa kéxegke yakwayam atnehek seklegaso amya'a segwagkasamo teyp ma'a énxet'ák metnaha nak judíos, yakwayam enxoho etnahagkok nahan melya'áseyam xa énxet'ák nak.#Hch 10.1-43. 8Apxekmósek axta Dios ekleyawo apwáxok xa énxet'ák nak, cham'a Dios aptaha nak apya'áseykegkoho elchetamso egwáxok, hakte apkelmeyásegkek axta Espíritu Santo xa énxet'ák nak#Hch 10.44. ekhawo sentemésesamakxa nak han negko'o xa.#Hch 2.4. 9Axta etnésesók apyeykhamap pók énxet Dios, ekhawo sentemésesamakxa nak han negko'o xa, hakte apchaxñásesek axta nahan apwáxók Dios xa énxet'ák nak eñama m'a melya'áseyam nak. 10¿Yaksak ektaha kélmoko nak kéxegke kólyekkónek Dios kélmoko nak kólyeykhásesagkohok kéltemo elanagkok énxet'ák apteme nak melya'áseyam Wese' egegkok ma'a kéltémókxa nak antehek, cham'a magkegwagko nak anlának negko'oxa, mopwancha'ak nahan ma'a ẽlyepmeyk nano' nak. 11Wánxa agkok, akke agya'ásekmok negko'o nenxaka aksa nelwagkásamáxche teyp eñama m'a segásekhayo nak Wese' egegkok Jesús, ekhawo nahan xa énxet'ák nak.

12Apyókxoho énxet'ák axta apkelwanmeyágkok aphaxno apkeltenneykha Pablo tén han Bernabé apxéna m'a aksok magkenatcheso nak agweta', tén han ma'a aksok sempelakkasamo nak agweta', cham'a apkelana axta Dios eñama apkelané xa Pablo tén han Bernabé nepyeseksa m'a énxet'ák metnaha nak judíos. 13Xama axta apkelwáteságko apkeltenneykha, aptahak axta anhan appakmeta Santiago s'e:

—Elyáxeg, heleyxho sekxo'. 14Ẽltennáseyha exchek negko'o Simón appehewákxo kaxwo' apkelásekhayo Dios ma'a énxet'ák metnaha nak judíos yakwayam enxoho etnésásekxak apkelánamákpoho énxet'ák apagkok xa énxet'ák nak. 15Hawók ma'a ektémakxa axta apnaktáxeseyak énxet'ák ektaha axta Dios appeywa apkellegaso, ektéma nak eknaktáxésamaxche s'e:

16‘Awatak sat ko'o makham natámen xa,

alánekxak sat ma'a David apxagkok

aptéyam axta;

alánekxak sat makham ma'a

nápakha apketkók apkeleymomap nak,

axátekhásekxak sat nahan,

17yakwayam enxoho ektamok Dios ma'a

énxet'ák apkeleymomap nak,

yetlo nahan ma'a apyókxoho

pók aptémakxa énxet'ák nak

ektaha axta kélteméseso apkelpagkanamap

eñama ko'o sekwesey.#Am 9.11-12.

18Cháxa aptémakxa nak appeywa Wese' egegkok xa,

aptaha nak nano' segya'asásegwayam negko'o xa.’

19“Xénche' nak ko'o ewáxok megkapayhawo agyeykhásesagkohok neltemo elanagkok énxet'ák metnaha judíos ma'a kéltémókxa nak antehek, cham'a apkelwáteságko nak nano' apcháyókxa yakwayam elyetlakxak Dios. 20Wánxa aksa ko'o seltamho kóltáxésesek énxet'ák yakwayam kóltennaksek eyéméxko metawagkok ma'a ekyókxoho aksok ekteméseso nak ekmanyása eñama kélméso m'a aksok kéleykmáseso,#Ex 34.15-17. tén han melanagkek ma'a ekmaso nak nentémakxa mansexta,#Lv 18.6-23. tén han metawagkek ápetek ma'a aksok kélnaktóso kélyakhakkaso nak ayespok ekmatña, cham'a megkóltekkeseso nak éma agkok ekmatña enxoho, tén han metawagkek ma'a éma.#Lv 17.10-16. 21Hakte yetneyk makham énxet'ák apkeltenneykha nak ma'a segánamakxa eñama nak Moisés eyeynamókxa m'a nano' axta, cham'a apkelyetsetmo nak cha'a apchakneykekxexa judíos ekyókxoho ekhem nellókasamakxa nelyampé, cham'a ekyókxoho nátegma nak.”

Weykcha'áhak kélápháseso énxet'ák metnaha nak judíos

22Kélmokók axta kólyésha nápakha énxet'ák yakwayam kóláphaksek xamo' Pablo tén han Bernabé m'a tegma apwányam Antioquía, apkeleñama nepyeseksa xa énxet'ák nak. Axta apmáheyo elyésha m'a énxet'ák seykha amya'a nak, tén han ma'a apkelámha apmonye'e nak kélakneykekxexa. Judas axta kélyésáha m'a apkeltamhomakpo axta anhan Barsabás, Silas axta anhan kélyésáha, cham'a énxet aptaha axta kéláyo nepyeseksa m'a aptémo xamo' nak melya'áseyam. 23Kélmések axta anhan weykcha'áhak kéláphaso xa énxet'ák nak. Axta entemék kéltáxéso s'e:

“Negko'o nenteme nak seykha amya'a, yetlo nahan ma'a apkelámha apmonye'e nak, negko'o nenteme nentémo xamo' magya'áseyam kéxegke. Negmések negko'o ekxeyenma egwáxok kéxegke megkóltaha nak judíos kélheykha nak tegma apwányam Antioquía, tén han ma'a yókxexma Siria, tén han ma'a Cilicia. 24Nenleg'ak axta negko'o amya'a apkelxega aksa nápakha énxet meyke neltémo negko'o apkeleñama s'e, tén han nenleg'a amya'a ekyentaxnésawo kélwáxok kéxegke apkeltenneykha xa énxet'ák nak, héxta nahan kólya'ásegkok kéltahakxa kéxegke. 25Ekeso eñamakxa ekxéna axta negko'o egwáxok ektakmela ólyesha nápakha énxet apkeleñama negyeseksa negko'o, yakwayam enxoho elteyánegwakxohok kéxegke yetlo nahan ma'a ẽlyáxeg'a nelásekhayo nak, cham'a Pablo tén han Bernabé, 26cháxa énxet'ák megyésa axta apyókxa eyesagkexa apkeláneya m'a nentamheykha eñama nak Wese' egegkok Jesucristo. 27Nelaphásek axta negko'o Judas tén han Silas: Apkeltennáseykha apancha'awók sat etnahagkok eltennaksek kéxegke ekyókxoho xa nentahakxa nak nentáxéseso. 28Xénchek apwáxok Espíritu Santo megkeyméxko agyeykhásesagkohok kéllané kéxegke m'a kéltémókxa nak antehek, wánxa aksa eyéméxko kóllának ma'a eyéméxko nak anlána', hawók nahan ekxeyenma egwáxok negko'oxa; 29nágkóltaw aksa ápetek kélméso nak kéleykmáseso, nágkóltaw nahan éma, nágkóltaw nahan ápetek ma'a aksok kéltóso kélyakhakkaso nak ayespok ekmatña, nágkóllána nahan ma'a ekmaso nak nentémakxa mansexta. Agkok kóllanak kéxegke xa, tásek sat katnehek kéltahakxa kéxegke. Tásek sat katnehek kélxega.”

30Natámen apkelpeykáseykegkakxoho axta apkelmeyákxo m'a tegma apwányam Antioquía. Apchánchesákxeyk axta énxet'ák, keñe axta apmésa weykcha'áhak kélápháseso xa énxet'ák nak. 31Xama axta apkelyetsátegko ẽlyáxeg'a xa weykcha'áhak nak, kelpayhekxók agko' axta apwáxók eñama m'a kélméso axta eltakmelwayam apwáxók. 32Dios appeywa apkellegaso axta anhan ma'a Judas tén han ma'a Silas, ékeso eñamakxa apkelpeykesásékxo axta apwáxók ẽlyáxeg'a eñama m'a apkelpeywa, apkelwaskakkáseykxók axta anhan. 33Néwomók axta apheykha m'a, keñe axta apkelpeykásegkakxoho énxet'ák aptémo xamo' nak melya'áseyam yetlo apkelmopmenyého katakmelhok apkelxega, yakwayam enxoho eltakhohok aphágkaxa m'a énxet'ák ektaha axta apkeláphaso. 34Apmokók axta eyke exnekxak Silas. 35Wánxa agkok, aphákxeyk axta Pablo tén han Bernabé m'a tegma apwányam Antioquía, apkelenxanakmók axta apkelxekmóso énxet'ák tén han apkeltennáseyncha'a m'a amya'a eñama nak Wese' egegkok, yetlo nahan ma'a énxet apxámokma axta.

Pablo apxegeykekxa makham yakwayam etneykha nepyeseksa énxet'ák

36Nano' axta entemék aptaha apcháneya Pablo Bernabé s'e:

—Antemekxak sat makham meyk'a ẽlyáxeg'a apheykha nak ekyókxoho tegma apwányam, cham'a nenlegasámxa axta amya'a eñama nak Wese' egegkok, yakwayam enxoho agya'asagkohok ektahakxa apkelenxanyam.

37Apmokók axta anhan éntamok Bernabé m'a Juan, cham'a apkeltamhomakpo axta Marcos; 38apxénchek axta eyke Pablo megkapayhawo kólyentamok Marcos, hakte apkexakhagwokmek axta Marcos ma'a yókxexma Panfilia,#Hch 13.13. axta elenxáneykmohok aptamheykha xamo' xa apkánet nak, Pablo, tén han Bernabé. 39Yentexek axta ektahakxa megkaxnawo mók apkelpakmeyesma, apkexpancháseykpek axta anhan. Apxegkek axta Bernabé apyentama Marcos, apkelchánteyk axta yántakpayhe apkelmahágko m'a Chipre, 40keñe axta Pablo aptamhákxo apxegexma Silas, apkelmaxnésesek axta ẽlyáxeg'a apkeltamho eltakmelchesek Wese' egegkok xa apkánet nak eñama apkelásekhayo, keñe axta apkelántepa m'a, apkelxegákxeyk axta makham. 41Apkelwokmek axta yókxexma Siria, tén han ma'a Cilicia, apkelwaskakkáseykxók axta ẽlyáxeg'a apkeleñama nak kélakneykekxexa.

Currently Selected:

LOS HECHOS 15: LEGN

Highlight

Compare

Copy