LOS HECHOS 14
14
Pablo tén han Bernabé apkelwayam tegma apwányam Iconio
1Apkelántaxnegwokmek axta apchakneykekxexa judíos Pablo tén han Bernabé m'a tegma apwányam Iconio. Aptakmelchások axta apkeltenneykha, apxámok axta énxet'ák judíos apteme melya'áseyam, tén han ma'a énxet'ák metnaha nak judíos. 2Wánxa agkok, apkelenxanakmek axta eyke énxet'ák judíos apteme axta apkelya'áseyam apmoko ellókasek ma'a énxet'ák metnaha nak judíos yakwayam enxoho kasók ekxeyenma apwáxók ma'a apkelyáxeg'a aptémo xamo' nak melya'áseyam. 3Ekeso eñamakxa ekwegkawo axta apheykha énxet'ák seykha amya'a m'a, apchekawók axta Wese' egegkok, apkeltennáha axta anhan yetlo meyke apchéseykekxa; ekmámnaksoho axta nahan aptemesásak Wese' egegkok apkeltenneykha xa énxet'ák nak, apkelxeyenma m'a ektémakxa nak Dios segásekhayo. Apmések axta anhan Dios apkelmopwancha'a yakwayam elanagkok ma'a aksok magkenatcheso nak agweta', tén han ma'a sempelakkaso nak agweta'. 4Wánxa agkok, apkexpancháseykpek axta eyke énxet'ák ma'a tegma apwányam nak, nápakha énxet'ák axta leyawok apwáxók apkeltémakxa m'a énxet'ák judíos, keñe axta nápakha énxet'ák ekleyawo apwáxók apkeltémakxa m'a énxet'ák seykha amya'a. 5Keñe axta ekhawo mók apkelpakmeyesma énxet'ák judíos, tén han ma'a énxet'ák metnaha nak judíos yetlo m'a apkelámha apmonye'e nak nepyeseksa tegma apwányam, yakwayam enxoho enaktawasagkohok énxet'ák seykha amya'a, tén han elyetnak meteymog. 6Xama axta apkelleg'a amya'a Pablo tén han Bernabé, tegma apwányam Listra axta apkelmahágkok apkenyahágko, tén han ma'a tegma apwányam Derbe, yókxexma Licaonia axta payhok xa, axta nahan apkelmahágkok ma'a neyáwa nak xa yókxexma nak, 7cham'a apkellegasámxa axta anhan amya'a ektakmela.
Pablo kélyetné meteymog ma'a tegma apwányam Listra
8Apheyk axta xama énxet megkamopwána axta exog ma'a tegma apwányam Listra. Axta exñák xama enxoho, hakte meyke aptapnák axta eyeynamo sekxo' apteyékmo. Apheyk axta aksa xa énxet nak, 9Pablo apkeltenneykha axta aphaxnawo'. Apkelanawók axta Pablo xa énxet nak, apwet'ak axta ekyetna mey'áseyam yakwayam enxoho etakmelwók. 10Keñe axta aptaha apyennaktésawo appeywa Pablo appakhetchesa s'e:
—¡Exnekxa néten, epewho etnamha!
Apnextegawók axta néten apkenmeyncha'a xa énxet nak. Apxegákxeyk axta anhan. 11Xama axta ekwetáxko apkelana Pablo xa, apkelyennaktésawók axta apkelpeywa apkelpakmeta apkelpeywa apagko' ma'a énxet'ák apheykha axta Licaonia. Aptahak axta s'e:
—¡Apkelweywenteyk negyeseksa negko'o dios apkelyetchesamakpoho énxet!
12Kélaneykek axta Bernabé etnahak dios Zeus, keñe axta Pablo kéláneya etnahak dios Hermes, hakte Pablo axta m'a ektaha axta apkeltenneykha. 13Apyentamokmek axta weyke kennawók étkók ma'a énxet aptaha axta apcháyókxa dios Zeus, pánakte exnók axta anhan apsókmok. Yetneyk axta tegma apkelpeykesamókxa dios Zeus ma'a keto' nentaxnamakxa axta nepyeseksa tegma apwányam; apmokók axta eykhe elpeykeshok énxet'ák seykha amya'a xa énxet nak yetlo m'a apyókxoho énxet'ák; apmokók axta anhan ennápok weyke kennawók étkók yakwayam elpeykeshok énxet'ák seykha amya'a xa énxet'ák nak. 14Xama axta apyekpelchágwokmo Bernabé tén han Pablo, apkelyepteyk axta apkelántaxno magkenatcheso megkalcha apwáxók kéltemésesakxa, apchánwokmek axta nepyeseksa énxet. Aptahak axta anhan apkelyennaktésawo apkelpeywa s'e:
15—Enxet'ák, ¿Yaksak ektaha kéltaha nak xa? Enxet negko'o, neghawo negko'o kéxegke. Axta keñamak nelwa'a negko'o neltamho kólyenyók xa ektémakxa nak kélpeykesamo ektaha nak mékoho, neltamhok negko'o kóltemekxa megkólya'áseyam Dios aptaha nak memassegwayam, aptaha axta apkelané néten, tén han keso náxop, tén han ma'a wátsam ekwányam, tén han ekyókxoho aksok ekheykegko nak. 16Apchahayók axta eykhe Dios antehek negmáheyo egagko' antehek, cham'a nano' axta, 17axta eyke elwáteseykmok apxekmóso aptémakxa aptaha Dios eñama m'a aksok eltakmela axta apkelané; cham'a Dios apcháphásesamol'a cha'a kéxegke mámeye, tén han ma'a ektakmela eknakxamáxche nak ekyexna, cham'a apmésamol'a anhan cha'a kéxegke kélto yakwayam kóltók, keñe kalpayhekxak cha'a kélwáxok.
18Apkeltennásek axta eykhe Pablo tén han Bernabé énxet'ák xa ekyókxoho nak, xegkásók axta eyke memagkek aptamhágkaxa énxet'ák apmoko yakhek weyke kennawók étkok yakwayam elpeykesho.
19Chakhawók axta nahan apkelwokmo nápakha judíos apkeleñama Antioquía tén han apkeleñama m'a Iconio, apyakmagkásesek axta ektahakxa elchetamso apwáxók énxet'ák. Keñe axta kélyetna'a meteymog Pablo. Xama axta apcháneya yetsapak Pablo xa énxet'ák nak, nepyáwa tegma apwányam axta kélyensakmok. 20Xama axta apchaknákxo énxet'ák melya'áseyam Dios apyetnakxa Pablo, keñe axta aphákxo néten Pablo, apmeyákxeyk axta makham nepyeseksa tegma apwányam; mók ekhem axta entahak aptépékxo makham ma'a, yetlo apxegexma Bernabé axta apmeyákxo m'a tegma apwányam Derbe.
21Apkeltakháwok axta makham tegma apwányam Listra natámen aplegaso énxet'ák amya'a ektakmela m'a tegma apwányam Derbe, cham'a apxámásekxexa axta énxet'ák apteme melya'áseyam Dios ma'a. Iconio axta anhan apkelmeyákxak, tén han ma'a Antioquía. 22Apkelwaskakkásekxók axta énxet'ák apteme axta melya'áseyam xa yókxexma nak, apkeltennásek axta apkeltamho elenxanmohok apkelyennaktésamo apteme melya'áseyam. Apkeltennásek axta anhan megkatnehek manlegeykegkoho ekyókxoho aksok negmoko enxoho antexek ma'a aptémakxa nak Wese' apwányam Dios. 23Apkelyésáha axta anhan cha'a xama apkemha apmonye m'a ekyókxoho apchakneykekxexa nak. Apkeltamhok axta eltakmelchesek Wese' egegkok Jesús énxet apteme axta melya'áseyam cham'a natámen aptamheyak axta nempeywa nelmaxnagko yetlo metéyak aptéyak.
Pablo tén han Bernabé apkeltakhémo Antioquía
24Apkelyeykhágwokmek axta yókxexma Pisidia apkelwákxo axta m'a yókxexma Panfilia. 25Apkeltennáha axta Dios appeywa m'a tegma apwányam Perge, keñe axta apkelmeyákxo m'a tegma apwányam Atália. 26Axta apkelchenátwomhok yántakpayhe apkelmahágko m'a Antioquía, cham'a tegma apwányam kéltamhókxa axta eltakmelchesek Dios Pablo tén han Bernabé, yakwayam elanagkok ma'a apkeltamheykha apsawhegwokmo nak kaxwo'. 27Xama axta apkelwákxo tegma apwányam Antioquía Pablo tén han Bernabé, apchánchesakxeyk axta m'a énxet'ák ektaha nak apkeltamheykha kélakneykekxexa, apkeltennáseyha axta ekyókxoho aptemésesamakxa Dios Pablo tén han Bernabé, apkeltennáseyha axta anhan ektahakxa apkelya'asásegwokmo Wese' egegkok ma'a énxet'ák metnaha nak judíos, yakwayam enxoho nahan etnahagkok melya'áseyam. 28Néwomók axta apheykha Pablo tén han Bernabé m'a, appaxkeykha axta m'a énxet'ák apteme nak melya'áseyam Wese' egegkok Jesús.
Currently Selected:
LOS HECHOS 14: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
