LOS HECHOS 12
12
Santiago apketsapma keñe Pedro apmomap
1Cháxa apcheynamókxa axta anhan apmenxeneykha wese' apwányam Herodes Dios énxet'ák apagkok ektéma axta xa. 2Apkeltamhok axta Herodes kólyetxak sawo ekwenakte kólakhek ma'a Santiago, aptaha axta Juan apyáxeg. 3Xama axta apwet'a Herodes ekleyawo apwáxók énxet'ák judíos xa, keñe axta apkeltamho nahan emakpok Pedro. Cháxa ektahakxa axta m'a ekhem aptámákpexa axta kelpasmaga meyke kempáseyak. 4Apmákpek axta Pedro, keñe axta wese' Herodes apchakxegkesa kañe' sẽlpextétamakxa. Hawók nekha axta apchakneykha sẽlpextétamo apkeláneykha, hawók nápakha sẽlpextétamo axta cha'a xama nápakha tegma, hakte xeyenmék axta apwáxok Herodes exekmósek énxet'ák natámen ekyeykhe m'a ekhem melwagkayam axta cha'a énxet'ák judíos kéltéma nak Pascua.#Ex 12.1-27. 5Kélhésekmek axta Pedro sẽlpextétamakxa. Apwakheykxók axta anhan sẽlpextétamo apkeláneykha, keñe axta m'a énxet'ák apkeleñama nak kélakneykekxexa apkelenxáneykmoho apkelmaxnéseso Pedro yetlo apméso ekxeyenma apwáxok Dios.
Dios aptekkeso Pedro sẽlpextétamakxa
6Aptenchek axta Pedro nepyeseksa apkánet sẽlpextétamo, ánet cadenas axta nahan kélpexteté, keñe axta nápakha sẽlpextétamo apchakneyncha'a m'a átog, chakhawók axta m'a axta'a amonye ekwayam ekhem yakwánxa axta exekmósek Herodes énxet'ák ma'a Pedro. 7Pelakkasek axta apwokmo xama Dios apchásenneykha m'a, apkelsásek axta exma kañe' negmomaxchexa. Appaknegwokmok axta Dios apchásenneykha nápakha Pedro aptenakxa, apxátekhásek axta nahan. Aptahak axta apcháneya s'e: “¡Yempekxa heykxa néten!” Yetlókók axta elhexyawásamáxche kélnaktetcheso apmék Pedro. 8Aptahak axta Dios apchásenneykha apcháneya Pedro s'e: “Etaxnekxa aptaxno, elatchásekxa nahan apkeltéto apmagkok.” Aptemék axta Pedro xa, keñe axta aptaha nahan apcháneya Dios apchásenneykha s'e: “Yaklakpekxa apchaklamap, hetlogma.”
9Aptekkek axta Pedro neptámen Dios apchásenneykha neyseksa mey'áseyak, nakso' kexaha m'a aptemésesakxa axta Dios apchásenneykha, apkeneykek axta aksa ét'ak aksok kélxekmósamo. 10Apyeyk'ak axta Pedro yetlo apxegexma Dios apchásenneykha m'a eyeynókxa apchakneykha axta sẽlpextétamo, keñe axta nahan apyeyk'a m'a mók apchakneykegkaxa axta sẽlpextétamo. Xama axta apkelwákxo m'a átog elánamáxche axta sawo, amonye nenteyapma ámay axta m'a, ekmayheykekxa agko' axta entahak átog, keñe axta aptepa Pedro tén han ma'a Dios apchásenneykha. Neyseksa apkelxega ámay axta apyensakmok apxakko' Dios apchásenneykha Pedro.
11Apya'ásegwokmek axta Pedro xa, aptahak axta appakmeta s'e: “Ekya'ásegwokmek kaxwo' eyámnaksoho apcháphasa Dios apchásenneykha yakwayam hemyók nápakto' Herodes tén han ma'a ekyókxoho yakwánxa neykhe hetnésesek énxet'ák judíos.”
12Xama axta apya'ásegwokmoho agko' Pedro xa, apmeyákxeyk axta María axagkok, ektaha axta Juan egken, apkeltamhomakpo axta nahan Marcos, cham'a apchaknákxexa axta apxámokma énxet'ák aptamhágko nempeywa nelmaxnagko. 13Nekha átog axta appakmeswákxak Pedro ekpayho axta nekha ámay. Xama kelán'a étkok ekwesey Rode axta teyánegwokmohok eltamho kótak aptémakxa. 14Xama axta ekyekpelchawo appeywa Pedro, takháwok axta aksa yetlo ekyawe ekpayheykekxa awáxok. Axta kameykásak átog. Ketchagkakxók axta aksa eltennáseykxo énxet'ák apkenmeyncha'a Pedro m'a átog. 15Entahak axta amya'a eyáneyáxko s'e:
—¡Yéhayaxma'
—Nakso' axta eyke temesásak xa kelán'a étkok nak.
—Háwe Pedro; cham'a Dios apchásenneykha apxegexmal'a m'a, —axta aptahak énxet'ák.
16Appakmétekxeyk axta eyke makham Pedro m'a nekha átog. Xama axta apmeykesa átog xa énxet'ák nak, apwet'ak axta apkenmeyncha'a Pedro nekha átog, kexegawók axta apnenya'ák. 17Wánxa agkok apmek axta eyke aptahak Pedro apkeltamho elwanmak xa énxet'ák nak, apkeltennáseyha axta ektahakxa aptekkesa Dios apchásenneykha m'a sẽlpextétamakxa. Aptahak axta nahan apkeláneya s'e:
—¡Kóltennasha sat nahan Santiago xa, tén han ma'a apkelyáxeg.
Keñe axta aptepa m'a, apmeyákxeyk axta mók yókxexma.
18Xama axta elsaka, yennegkek axta exma nepyeseksa sẽlpextétamo, axta elya'ásegkok agko' ektahakxa Pedro. 19Apkeltamhok axta Herodes ektamakpok Pedro, wánxa agkok, axta eyke kólwetákxak, keñe axta appehesákxo aptamheyak ma'a sẽlpextétamo ektaha axta aptakmelcheso, apkeltamhok axta etekyók Herodes xa sẽlpextétamo nak. Aptekkek axta Herodes yókxexma Judea natámen xa, tegma apwányam Cesarea axta aphakmok.
Wese' Herodes apketsapma
20Apkeltaknagkamók apagko' axta wese' Herodes énxet'ák apheykha tegma apwányam Tiro tén han ma'a Sidón, wánxa agkok, hawók axta eyke mók apkelpakmeyesma xa énxet'ák nak yakwayam elmahagkok aphakxa Herodes, aplekwokmók axta apkeltamho epasmok ma'a énxet apwesey axta Blasto, apkemha apmonye aptakmelcheso Herodes aksok apagkok axta m'a. Blasto axta kélásenneykxak kélmaxné Herodes yakwayam elásekhekxohok makham, hakte elxawagkohok axta cha'a nento eñama aphakxa wese' apwányam Herodes xa énxet'ák apheykha nak Tiro tén han ma'a apheykha nak Sidón. 21Wokmek axta ekhem apxeyenmakxa axta wese' Herodes, aptaxneykxeyk axta aptaxno aptakmalma, aphákxeyk axta néten aptaháno ektakmalma segyekpelchémókxa, keñe axta apkelpakhetchesa énxet'ák. 22Aptahak axta apkelyennaktésawo apkelpeywa énxet'ák se'e: “¡Háwe énxet xa appakmeta nak, xama dios xa!” 23Keñe axta apmésa apháxamap Dios apchásenneykha xa wese' apwányam Herodes, axta ñokxa metnaha apcháyo m'a Dios. Askok axta nahan táwak apketsapa.
24Wánxa agkok, payhekxeyk axta eyke Dios appeywa, ekyókxoho yókxexma axta anhan kéltenneykha.
25Xama axta appenchásegko apkeltamheykha Bernabé tén han ma'a Saulo, apkeltakháwok axta apkelenyekto m'a Jerusalén, apyentamákxók axta nahan Juan, cham'a apkeltamhomakpo axta anhan Marcos.
Currently Selected:
LOS HECHOS 12: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
