2 TIMOTEO 3
3
Yakwánxa sat etnahagkok énxet amonye ektemegwánxa néxa ekhem
1Kéméxchek nahan ey'asagkohok xép peya kawak ekyentaxnakxa amonye ektemegwánxa néxa ekhem. 2Apkelmeyókasamákpoho apagko' apkeltémakxa sat etnahagkok énxet'ák, étsapma apnenyek selyakye, eleymáxkoho apwáxok, tén han etnahagkok megyéso eleykpohok. Kanmexmakha sat apkelpakmeyesma Dios, metnehek sat nahan apkelyaheykekxoho apyepmeyk, mexnésók sat mók ektakmela kéltemésesakxa, metnehek sat nahan apcháyo m'a ektémakxa nak apchayókxa énxet. 3Metnehek sat apchásekhayo pók, megyepyósek sat nahan elanok pók, apkelya'áseyam ekmaso sat etnahagkok, mopwanchek sat elenmaxakpohok ma'a aksok ekmaso apkelyespagko nak, ellegásesagkohok sat nahan apnámokkok, etaknók sat ma'a ekyókxoho aksok ektakmela nak. 4Appelakkaseso esexnenak pók sat etnahagkok, meyke elnawagko sat nahan etnahagkok. Kayeykhágwomhok sat eleymáxkoho apwáxók, yásekhohok sat ma'a aksok apkelyespagkamakxa nak yakwayam eykhe yásekhohok Dios. 5Máxa sat etnahagkok nakso' enxoho apcháyo Dios, aksok apkeláneyak sat eyke kañék ekyekpelchamáxche aptaknagkama m'a ektémakxa nak Dios apmopwána segyakmagkaseso nentémakxa.
Neypáxakwom aksa exchep énxet'ák aptéma nak xa. 6Hakte cha'a anhan apkelxegexma'a m'a énxet'ák apkelántaxnegweykmohol'a aksa kélxagkok, elyexanchesha nahan cha'a m'a kelán'ák ekmanyehe nak keytlakxak kéltemésesakxa, cham'a ekxeyenmol'a awáxok ektaha megkay'asáxma, ekmoma nak awáxok ekyókxoho aksok ekyespagkamakxa nak. 7Keltámesamaxchék eykhe cha'a m'a amya'a ekmámnaksoho nak, akke kalya'ásegweykmok xama enxoho. 8Ekhawo aptamheykegkaxa axta m'a kélyohóxma'a Janes tén han ma'a Jambres apkenmexeykencha'a axta Moisés,#Ex 7.11. yenmexmakha nahan cha'a m'a amya'a ekmámnaksoho nak, hakte énxet ekmaso elchetamso apwáxok ma'a, apnaktawáseykha nahan apteme melya'áseyam. 9Megkawegkók sat eyke xa apkeltémakxa nak, hakte apyókxoho énxet'ák sat elyekpelchágwók aptaha elyéháxma xa énxet'ák nak, ekhawo ektémakxa axta xa apkánet énxet'ák nak, cham'a apkelmexeykencha'a axta Moisés.
Ektemegwánxa néxa apméso appeywa Pablo Timoteo
10Wánxa agkok, tásek axta eyke exchep apyetlo m'a ektémakxa axta cha'a selxekmóso ko'o, apyetlamchek axta anhan ma'a sektémakxa nak, tén han apyetlama m'a ektémakxa nak ko'o sekmáheyo alána', apyetlamchek nahan ma'a ektémakxa nak may'áseyam ko'o, tén han apyetlama m'a ektémakxa nak ko'o mapekhésamaxche, apyetlamchek nahan ektémakxa nak seyásekhayo, tén han ma'a ektémakxa nak ko'o sekwaskápeykekxoho selenmaxamáxkoho 11selyakmáseykha tén han ma'a seklegeykegkoho nak. Apya'ásegkok xép ekyókxoho setnahakxa axta ko'o m'a yókxexma Antioquía,#Hch 13.14-52. Iconio,#Hch 14.1-7. tén han ma'a Listra,#Hch 14.8-20. tén han ma'a seklegágkoho axta ko'o selyakmáseykha; Wese' egegkok axta eyke emyáwak neyseksa ekyókxoho xa. 12Nakso' sat nahan ellegagkohok kélmenxeneykha m'a apyókxoho énxet'ák apmopmenyého nak elpagkanchesakpok Cristo Jesús. 13Kayágwomhok sat ekmaso apkeltémakxa m'a énxet elmasagcha'a nak apkeltémakxa, tén han ma'a énxet'ák sẽlyexancháseykegkohol'a, elyexanchesha sat pók, kólyexanchesha sat nahan.
14Wánxa agkok, ewaskápekxoho étlók xép ma'a nelxekmowásamáxche eltámeka axta exchep, cham'a aptemésesa nak xép ekmámnaksoho. Apya'ásegkok xép ektaha nak elxekmóso xa nelxekmowásamáxche nak. 15Kaxénwakxoho apwáxok, aptémakxa apketkok axta exchep apya'áseykegkoho ektémakxa nak eknaktáxésamaxche tásek amya'a, cham'a ekmowána nak kalxekmósagkok xép tén han kawagkasek teyp eñama apteme mey'áseyam ma'a Cristo Jesús. 16Ekyókxoho ektémakxa nak eknaktáxésamaxche tásek amya'a ekteme aptekkeso m'a Dios, egwanchek agmaha yakwayam ólxekmósek egnámokkok, tén han agmések nempeywa egmók yakwayam enxoho anlánekxések ekyetna enxoho megyakhémo aptahakxa, tén han agmaha yakwayam ólxekmósek egnámokkok ma'a nentémakxa ekpéwomo nak, 17yakwayam enxoho yepwának elának ekyókxoho nentémakxa ektakmela m'a ektaha nak Dios énxet apagkok, tén han epenaksohok agko' ma'a apkeláneykekxa nak aptahakxa.
Currently Selected:
2 TIMOTEO 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
