2 TIMOTEO 2
2
Ektakmela aptémakxa Jesucristo sẽlpextétamo apagkok
1Xép hatte, etne cha'a apwaskápeykekxoho eñama m'a aksok apxawé naksa axta exchep, ektaha axta apméso m'a Cristo Jesús. 2Eltennés sat yakwánxa etnahagkok apkeltamheykha m'a énxet'ák kélayókxa nak, apmopwána exekmósek apnámokkok, cham'a sektahakxa axta sekpeywa apleg'a exchep nápakta'awo' apyókxoho énxet'ák.
3Yoho kawakxohok xépxa xa nenlegeykegkoho nak, ekhawo m'a ektémakxa nak apkellegeykegkoho Jesucristo sẽlpextétamo apagkok ektakmela nak apkeltémakxa. 4Magwetyehek xama sẽlpextétamo ényók aksa aptamheykha yakwayam elánegwók ma'a apkeltémakxal'a énxet'ák metnaha nak sẽlpextétamo, hakte megkatnehek mepeykesáseykekxa apwáxok Wese' apagkok. 5Hawók nahan ektémakxa m'a énxet apkelteyásamákpohol'a, mopwanchek exkak aksa ekyanmaga, melana enxoho m'a kéltémókxa nak etnehek. 6Enxet ektahakxa enxoho aptamheykha namyep, payhawók etnehek apmonye apmeykekxa nekha aksok apnakxo ekyexna, cham'a ekpehewayam nak yakwayam emekxa'. 7Kaxén apwáxok se'e sektahakxa nak sekpeywa, Wese' egegkok sat ey'ásesagkohok xép ekyókxoho xa.
8Kaxén apwáxok xép Jesucristo, cham'a apxátekhágweykmo axta nepyeseksa énxet'ák apkeletsapma axta, aptaha axta nahan wese' apwányam David aptáwen neptámen; cháxa tásek amya'a seltenneykencha'a nak cha'a ko'o xa. 9Elenmáxamaxkók ko'o seklegeykegkoho eñama xa tásek amya'a nak, weykmók nahan selnaktetcheso emék ekhawo kéltemésesamakxal'a énxet ekmaso aptémakxa, wánxa agkok, akke kólpextetmak ma'a Dios appeywa. 10Ekeso eñamakxa selenmáxexkoho nak ko'o m'a ekyókxoho ektémakxa nak seklegeykegkoho, yakwayam apasmok ma'a énxet'ák ektaha nak Dios apkelyéseykha, yakwayam enxoho anhan elwagkasakpok teyp xa énxet'ák nak, eñama m'a Cristo Jesús, cham'a nelwagkásamáxche teyp megkatnegwayam nak enéxa, ekha nak han eyeymáxkoho.
11Ekmámnaksoho agko' se'e:
Néletsekkek agkok xamo' Cristo
anxek sat nahan xamo';
12nenlegágkok agkok negko'o,
hegwakxohok sat negko'o xa m'a
aptémakxa nak Wese' apwányam Dios;#1 P 5.1.
agkok anxénak apwesey Cristo,
mexének sat nahan negko'o xa negwesey;#Mt 10.33; Lc 12.9.
13Negyensakmek agkok negyetlo Cristo,
meyakmagkasemek eyke Cristo m'a
aptémakxa axta appeywa,
hakte mopwanchek eyakmagkasók ma'a
aptahakxa enxoho appeywa.
Xama énxet ekha aptamheykha ekleklamo kélwáxok
14Elya'asásegwakxoho énxet'ák se'e, eltennés nahan nápakto' Dios, yána elwátésagkok apkelátegmomap apkelxeyenma m'a ektémakxa nak amya'a. Yawanchek hempasmok xa nelátegmomaxche nak. Kanaktawasha aksa cha'a m'a énxet'ák ektahakxa enxoho apháxenmo xa amya'a nak. 15Elenxanmoho sat xép etnehek ma'a aptémakxal'a énxet ekha aptamheykha ekleklamol'a apwáxok Dios, cham'a megkagkésol'a apmegkakto xama aksok apkelané, cham'a aptakmelchesamol'a apkelxekmóso apnámokkok amya'a ekmámnaksoho nak. 16Néwhánekxoho aksa exchep ektémakxa nak apkelpakméteykha aksa énxet'ák, ektaha nak mékoho, hakte kayágwomhok agko' cha'a apteme melya'asáxma énxet apteme nak apkelpakmeyesma xa ektaha nak. 17Hentawasha nahan cha'a ektémakxa apkelxekmóso xa énxet'ák nak, máxa cha'a katnehek ma'a aksok ekyapakmáteykekxal'a ektahapma. Cháxa ektahakxa nak Himeneo xa, tén han ma'a Fileto, 18hakte apkelyetnakhásekmek ma'a amya'a ekmámnaksoho nak, apkelxénchek ekyeykhaya m'a nennakxátekhágwayam nak, aptawasáseyha nahan ektémakxa melya'áseyam nápakha énxet'ák xa apkánet nak. 19Wánxa agkok, appekkenchek axta eyke Dios xama aksok ektaha nak ekyennakwákxexa, ekyetna nak eknaktáxésamaxche s'e: “Ekpelkohok cha'a Wese' egegkok ma'a énxet'ák ektahakxa enxoho apagkok”,#Nm 16.5; Jn 10.14; 1 Co 8.3. “kéméxchek nahan ényók nentémakxa ekmaso apyókxoho énxet ektaha nak apkelwóneykha Wese' egegkok apwesey.”
20Xama tegma apyawe aptakmela enxoho, megkeytek wánxa m'a aksok elánamáxche nak sawo ekyátekto ekmomnáwa, keytek nahan ma'a sawo ekmopé elyenmal'a, keytek nahan ma'a elánamáxche nak yantéseksek, tén han ma'a elánamáxche nak yelpa'; nekha cha'a kóltakmelcheshok kélmeykha, keñe nahan nekha megkóltakmelchesek kélmeykha. 21Kéméxchek negko'o antehek eyáxñeyo nentémakxa, manlanyek ma'a ekyókxoho nentémakxa ekmaso nak, yakwayam enxoho hegmések ektakmela nentamheykha Wese' egegkok, tén han hentemésesek nempagkanamaxche, tén han etnehek segásenneykekxa. Nentemék agkok xa, Dios sat hegasenneykxak yakwayam anlának ekyókxoho ektémakxa nentamheykha ektakmela nak.
22Neytlakxa aksa aksok negyespagko nenteme nak egketkok, etne nahan ekpéwomo aptémakxa, tén han mey'áseyam, tén han apchásekhayo, tén han meyke ektahakxa apwáxok, yetlo m'a apyókxoho énxet'ák apkelwóneykha nak Wese' egegkok eñama eláxñeyo apwáxok. 23Néwhánekxoho aksa exchep ektémakxa nak elenmexamaxche apkelpakmeyesma énxet, cham'a ektaha nak amya'a ekyéháxma, tén han ekteme mékoho; apya'ásegkok xép katekkeshok cha'a nelenmexamaxche xa. 24Enxet apteme nak Wese' egegkok apchásenneykha megkatakmelak etnehek apkelenmexeykha apnámokkok. Wánxa agkok, kéméxchek etnehek ektakmeleykha apwáxok nepyeseksa apyókxoho énxet'ák. Kéméxchek nahan etnehek apmopwána apkelxekmóso apnámokkok; kéméxchek nahan etnehek mepekhésamap, 25tén han egkések appeywa yetlo megkeymáxkoho apwáxok ma'a énxet'ák sẽlenmexeykha nak, eleyxmakha aksa elyakmagkasesek apwáxók Dios, tén han elyekpelchásesamhok ma'a amya'a ekmámnaksoho nak, 26yakwayam enxoho elya'ásegwomhok tén han elántépok ma'a elmomakxa nak kelyekhama' elhanma, ekmáheyókxa nak cha'a katnésesek ekmokókxa enxoho katnésesek xa énxet'ák nak.
Currently Selected:
2 TIMOTEO 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
