2 TIMOTEO 1
1
Pablo ekxeyenma apwáxok
1Ko'o Pablo, sekteme Jesucristo seykha amya'a apagkok. Dios apmopmenyého axta keñamak selapháseykencha'a ko'o, ekhawo m'a ektémakxa axta sempekkencháseykekxa appeywa Dios apxeyenma hegmések ekyennakte egnenyek ekyetna nak negko'o, eñama negyepetcheyo Cristo Jesús. 2Xép Timoteo,#Hch 16.1; 1 Ti 1.2. aptaha nak hatte seyásekhayo, ektáxésesek xép se'e weykcha'áhak nak, seltamho etnehek apméso naksa Dios Egyap tén han Wese' egegkok Jesucristo m'a ektémakxa nak segemleykekxoho, tén han ma'a ektémakxa nak ektakmeleykha apwáxok henlano', tén han meyke ektahakxa apwáxok.
Cristo neltenneykha apwesey
3Ekmések cha'a ko'o ekxeyenma ewáxok Dios ekxéna enxoho cha'a ewáxok xép neyseksa sekteme nempeywa nelmaxnagko, ekyókxoho ekhem tén han ekyókxoho axta'a, cham'a Dios sektamheykencha'a nak ko'o selánésama aksok yetlo ekya'áseykegkoho ewáxok ektakmela sektahakxa, ekhawo ektémakxa axta apkeltamheykha m'a elyepmeyk nano' ko'o apkelánésama aksok Dios. 4Kaxénhok cha'a ko'o ewáxok apkelekxagweykencha'a axta exchep, emenyék kaxwo' ótak xép yakwayam enxoho kayawhok agko' ekpayheykekxa ewáxok. 5Hakte xénwákxók ko'o ewáxok ekyetna exchep ekmámnaksoho apteme mey'áseyam. Apyáma Loida axta sekxo' ekteme ekma amonye megkay'áseyam, keñe axta m'a xép egken Eunice,#Hch 16.1. nakso' nahan ektemesásak ekyetna exchepxa xa magya'áseyam nak.
6Ekeso eñamakxa seltennasa nak xép seltamho eyánchesagkohok ma'a apmopwána apxawé axta exchep eñama Dios apméso, cham'a seknegkena axta emék apkátek xép. 7Hakte axta hegmesók negko'o Dios yakwayam antehek eyeye egwáxok, wánxa axta segmésama m'a negmowána, negásekhayo, tén han ma'a negmowána nak anlanagkohok nentémakxa. 8Neymegké' aksa eltennaha apwesey Wese' egegkok, neymegké' aksa hélanok ko'o keso sekmáxko nak eñama Wese' egegkok. Yoho kawakxohok xép xa nenlegeykegkoho nak eñama m'a ektémakxa nak nenlegaso amya'a ektakmela, yetlo m'a apwaskápeykekxoho apmésamol'a cha'a exchep Dios. 9Ẽlwagkasek axta negko'o teyp Dios, ẽlwóneyha axta nahan yakwayam ampagkanchesaxchek neyseksa negha makham, háwe eñama m'a aksok nenlané axta negko'o, wánxa agkok, akke keñamak ma'a ektémakxa axta apmopmenyého elának Dios, tén han eñama m'a segásekhayo nak neyseksa negyepetcheyo Cristo Jesús. Dios, aptaha nak segásekhayo eyeynamókxa axta sekxo' apkeláneya keso náxop, 10enxekmósek kaxwo' negko'o m'a segásekhayo nak, cham'a apwa'a axta Wese' egegkok Jesucristo aptaha nak segwagkaso teyp, aptaha nak han apmaséso m'a ektémakxa axta ekmowána nétsapma, cham'a appekkenákxo axta yáxñakxoho m'a ekyennakte egnenyek megkatnegwayam enéxa nak, eñama m'a amya'a ektakmela nak.
11Egkések axta ko'o Dios yakwayam atnehek seklegaso s'e amya'a nak, eyáphásek axta nahan yakwayam atnehek seykha amya'a, tén han atnehek selxekmóso enámokkok.#1 Ti 2.7. 12Cháxa keñamak seklegágkoho nak ko'o kaxwo' ekyókxoho xa aksok nak, wánxa agkok mamegkayhek eyke ko'o axének, hakte ekya'ásegkok ko'o m'a aptaha nak seyayókxa; nakso' nahan ektemesásak ko'o ekyetna apmopwána hetakmelchesesek ekweykmoho néxa ekhem ma'a sektamheykha apkeltamho axta alána'.
13Etlaw xép ma'a nelxekmowásamáxche ektakmela apxaka axta eñama ko'o, neylwatés nahan apteme mey'áseyam, tén han ma'a ektémakxa nak nelásekhamaxkoho ekyetna nak negko'o eñama negyepetcheyo Cristo Jesús. 14Etakmelches xép ma'a nelxekmowásamáxche ektakmela apxaka axta exchep eñama apméso Dios, yetlo appasmo Espíritu Santo apha nak egwáxok negko'o.
15Apyókxoho énxet apheykha yókxexma Asia massak selano ko'o, ekhawo ektahakxa nak apya'áseykegkoho exchep, wákxók nahan mehelanyo m'a Figelo tén han ma'a Hermógenes nepyeseksa xa énxet'ák nak. 16Emenyék ko'o meyakmagkásekxék Wese' egegkok aptamhágkaxa m'a apheykha nak Onesíforo apxagkok, hakte hepeykesásekxohok axta cha'a ewáxok, axta emegkaktók selhéseykmo ko'o sẽlpextétamakxa. 17Xama axta apwakto Roma, axta elwáteyásak sektamso ekwokmoho seteyákxo. 18Wese' egegkok sat yemlekxohok ma'a ekhem nelyekpelchamáxchexa sat. Apya'ásegkok xép ma'a ektahakxa axta ekyawe sẽlpasmo negko'o m'a tegma apwányam Efeso.
Currently Selected:
2 TIMOTEO 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
