2 SAN PEDRO 2
2
Enxet'ák ektaha nak apkelxekmóso megkamámnaksoho
1Yetneyk axta anhan énxet'ák Dios appeywa apkellegaso apkelmopwána amya'a nepyeseksa énxet'ák Israel. Sat nahan katnehek kélnepyeseksa kéxegkáxa, etyapok sat kélnepyeseksa kéxegke énxet'ák apkelxekmóso apnámokkok megkamámnaksoho nak. Etakmelcheshok sat elyexakpohok elxekmósek énxet'ák ma'a ektémakxa nak elchetamso apwáxok sẽtsagkasamo nak, mexének sat Jesús aptaha Wese' apagkok, aptaha axta apkelwagkaso teyp xa énxet'ák nak, eñama aptamhéyak xa ektaha nak. Cháxa peya nak kañék ekmanyehe kélmaséseyam xa énxet'ák nak. 2Apxámok sat nahan etnehek énxet apwehéneykekxoho m'a apkeltémakxa segmegkasamo nak. Sat nahan kañék ekxénamaxche ekmaso m'a ámay ekmámnaksoho nak eñama xa énxet'ák nak. 3Apmopmenyého selyakye sat nahan kañék apteme apkelásenneykekxa kéxegke yetlo m'a ektémakxa nak apkelxekmóso megkamámnaksoho; nano' axta eyke kélleyxcheso yakwayam kóllegásesagkohok xa énxet'ák nak, hakte nano' kélyetsáteyak apkeltémakxa.
4Apkellegasáseykegkók axta Dios ma'a apkelásenneykha apkeleñama nak néten apkeláneykegko axta melya'asáxma, megkaspóneykxa táxa axta apkexeyk, neyseksa ekyaktésakxaxma axta nahan apkekhésekmok yetlo apkelpexteté, apkeleyxchesa m'a ekhem nelyekpelchamáxchexa sat. 5Apkellegasáseykegkók axta anhan Dios ma'a énxet'ák apheykencha'a axta nano' keso náxop, apcháphásek axta Dios mámeye ekwányam eyahapwa'a xa énxet'ák elmasagcha'a axta apkeltémakxa, Noé axta aksa apxakko' kélwagkasa teyp, cham'a Noé apkeltenneykencha'a axta apxeyenma m'a nentémakxa ekpéwomo nak, siete axta anhan apyókxoho énxet apkelwagkasa teyp Dios.#Gn 6.1—7.24; 8.18. 6Apmasésekmek axta nahan Dios ma'a tegma apwányam Sodoma tén han ma'a Gomorra, apwatneykxeyk axta ekwokmoho aptamhákxo tahap#Gn 19.24. yakwayam enxoho nahan yeyk yakwánxa kóltemésesek ma'a énxet'ák elmasagcha'a nak apkeltémakxa, cham'a egmonye sat. 7Wánxa agkok, apwagkasek axta eyke teyp Dios xama énxet apwesey axta Lot, aptaha axta énxet appéwomo, cham'a ekyentaxnésesamo agko' axta cha'a apwáxok étak apkeltémakxa ekmaso m'a énxet'ák elmasagcha'a nak apkeltémakxa.#Gn 19.1-16,29.
8Cháxa énxet appéwomo apha axta nepyeseksa énxet'ák elmasagcha'a apkeltémakxa xa, legeykegkók axta anhan apwáxok eñama m'a ektémakxa axta cha'a apweté apkeltémakxa ekmaso énxet'ák, tén han ma'a ektémakxa axta cha'a aplegayo ekyókxoho ekhem. 9Ey'asagkohok cha'a aptemésesakxa Wese' egegkok emyók ma'a énxet ektaha nak appagkanchásamap Dios, ey'asagkohok nahan cha'a yakwánxa etnésesek ellegásesagkohok ma'a énxet'ák elmasagcha'a nak apkeltémakxa, ekweykmoho ekhem nelyekpelchamáxchexa sat. 10Sat ekyagwánxa agkok apkellegasáseykegkoho Dios ma'a énxet'ák apkelenxáneykmo nak apkelané apkeltémakxa ekmanyása, cham'a aptaknagko nak han ektémakxa nak kélyaheykekxoho Wese' egegkok. Kalyéha'ak nahan apwáxók xa énxet'ák nak, melyexnegwomek nahan, megyekyek nahan ewanyohok ma'a ekha nak elmowancha'a eleymáxkoho nak; 11keñe m'a Dios apkelásenneykha ekyetna neykhe ekyawe apmopwancha'a tén han kélyaheykekxoho, akke elwanyeykha nápakto' Dios apkeltémo elsexnenak xa ekha nak elmowancha'a.
12Melya'ásegkok aksok xa énxet'ák nak, máxa aksok nawha'ák, elanagkok aksa m'a apmokókxa enxoho elanagkok, yakwayam elmakpok nahan cha'a appaleykmok, tén han yakwayam etekyók. Asagkek nahan cha'a katnehek apxeyenma m'a aksok melya'áseykegkaxa nak; wánxa agkok, kaxhok sat eyke apkeletsapma m'a ektémakxal'a kamaskok aksok nawha'ák. 13Ellegagkohok sat eñama apkellegasáseykegkoho apnámokkok. Yának nahan cha'a kañamak ekméso ekpayheykekxa apwáxok ma'a aksok apkelyespagkamakxa nak, ekhakxoho ekhem cha'a elanagkok xa. Hegmegkaksohok nahan cha'a negko'o negwet'a enxoho kélpasma aptéyak kéxegke xa énxet'ák nak, henlókashok nahan cha'a anlanha aptamhágkaxa. Elmok cha'a elpayheykekxa apwáxok yetlo m'a apkeltémakxa ekmaso nak.
14Ñohok nahan cha'a katsapok apnenyek apwet'a enxoho kelán'a; megkalleklámeykegkok nahan apkeláneyak melya'asáxma, ñohok nahan cha'a ellekwomhok ma'a énxet'ák elyelkamáxkoho nak apteme melya'áseyam; elya'asagkohok nahan cha'a aptamhágkaxa yepmenyéhok selyakye; appagkanchesegkek nahan Dios yakwayam ellegásesagkohok xa énxet'ák nak. 15Apkelxegáneykmek xa énxet'ák nak hakte apkelyetnakhágweykmek apkelyetlo m'a ámay ekpéwomo nak. Apkelyetleykekxeyk aptémakxa m'a Balaam aptaha axta Dios appeywa aplegaso ekmaso aptémakxa, cham'a aptaha axta Beor apketche, apmenyék axta Balaam étak selyakye eñama apkelané aksok ekmaso, 16kélmések axta kélpeywa ekyennakte eñama m'a mey'asáxma axta: xama yámelyeheykok meykexho ekpeywa axta pakhetchásak ektémol'a hempakhetchesek énxet, axta kaltamhok elenxanmohok apyeykesamakpohoxma.#Nm 22.4-35.
17Máxa yámelchet meyke yegmenla'a xa énxet'ák apkelxekmóso nak apnámokkok, máxa nahan ma'a yaphopé eksól'a exchahayam; Kélpagkanchesegkek nahan yakwayam kólhésók ma'a ekyaktésamakxa agko' nak exma. 18Máxa cha'a katnehek ektakmela enxoho aksok apkelxeyenma xa énxet'ák nak, cham'a ektaha nak mékoho, ellekwomhok nahan cha'a m'a énxet'ák eyáskexho nak apkelwáteséyak appaxkeykha m'a énxet'ák megyakhémo nak apkeltémakxa, eñama m'a ektémakxa nak aksok negyespagko nenteme nak énxet. 19Eltennaksek cha'a kéxegke kélewagko kóllának kélmokókxa enxoho kóllának xa énxet'ák nak, kelmomchek eyke anhan apwáxók aksok apkelyespagkamakxa xa énxet'ák nak, cham'a apkeltémakxa segmaséseykmohol'a;#Jn 8.34; Ro 6.6,16. apyókxoho énxet cha'a kamok apwáxok ma'a aksok ekmomakxa enxoho apwáxok. 20Hakte apcha'awók agkok makham ekmákxo apwáxok aksok ekmaso m'a énxet apkelya'áseykegkoho axta Wese' egegkok Jesucristo aptaha segwagkaso teyp, cham'a énxet'ák apkelwáteséyak axta apkeláneyak nentémakxa ekmanyása ekyetna nak keso náxop, kayágwomhok agko' nahan apkeláneykekxa apkeltémakxa ekmaso, megkaxók ma'a sekxo' axta.#Mt 12.45; Lc 11.26. 21Tásek axta kexaha eykhe melya'asagkek ámay ekpéwomo xa énxet'ák nak, megkaxnawok énsók ma'a apkeltémókxa nak antehek Dios ektaha nak ekpagkanamaxche apxawáya axta xa énxet'ák nak, cham'a natámen apkelya'ásegwayam enxoho. 22Wánxa agkok, temék eyke ektémakxa nak amya'a xa énxet'ák nak, ektéma nak amya'a s'e: “Tawékxeyk ekyekxo semheg”,#Pr 26.11. tén han ektéma amya'a s'e: “Apyetnákxeyk makham neyseksa yelpa' yátapomap kaxwé kélyakpáseso yegmen.”
Currently Selected:
2 SAN PEDRO 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
