2 SAN PEDRO 3
3
Wese' egegkok apkexyeyam sat
1Elyáxeg selásekhayo, keso ektaha nak ánet sektáxéseso weykcha'áhak kéxegke s'e seyáphásesa nak. Emenyék axta ko'o agkések sekpeywa kéxegke tén han seyámenyého kapewhok elchetamso kélwáxok, cháxa ánet sektáxéseso nak weykcha'áhak kéxegke. 2Kaxénwakxoho kélwáxok ektémakxa axta apkelxeyenma énxet'ák ektaha axta apkellegaso Dios appeywa apkelpagkanamap nano' axta, kaxén nahan kélwáxok ma'a apkeltémókxa nak antehek Wese' egegkok segwagkasamo nak teyp, cham'a apkelxekmósama axta kéxegke énxet'ák seykha amya'a.
3Akke ekyagwánxa agkok ektakmela kaxénmakha kélwáxok se'e: Chágketwokmek sat agkok néxa ekhem, etyapok sat énxet apkeláneyak nak aksok ekmaso apkelyespagkamakxa nak,#2 Ti 3.1-5; Jud 18. cham'a énxet'ák segya'áseykmohol'a. 4Sat etnehek apkelmaxneyeykha s'e: “¿Háxko ektahakxa m'a appekkeneykekxo axta appeywa Cristo apxeyenma ewatak makham? Apkeletsepmeyk ma'a ẽlyepmeyk nano', makhemek makham ekteme m'a ektémakxa axta sekxo' elánamáxko keso náxop.”#Ez 12.22. 5Mopmenyék elya'asagkohok ektaha nano' elánamáxche néten xa énxet'ák nak tén han keso náxop, cham'a apkeltémo axta Dios katyapok xóp neyseksa yegmen, neyseksa yegmen axta anhan appekkenak.#Gn 1.6-9; Sal 24.2. 6Mámeye ekwányam axta nahan keñamak apmaséseykmo Dios ekyókxoho aksok ekhéyak axta keso náxop.#Gn 7.11. 7Wánxa agkok, táxa ekwányam akke kaxwo' kélpagkanchásak yakwayam kólmasésók néten tén han keso náxop, keso negwet'awo nak ekhágko s'e negwánxa nak, eñama apkeltémo m'a Dios. Kasawhohok sat kamásesók táxa ekyókxoho xa, cham'a ekhem nelyekpelchamáxchexa sat, yakwánxa sat kólmasésók énxet'ák elmasagcha'a nak apkeltémakxa.
8Elyáxeg selásekhayo; nágkalwagkamák aksa aptemésesama Wese' egegkok máxa xama ekhem agko' ma'a mil apyeyam nak, keñe m'a mil apyeyam nak aptemésesa máxa xama ekhem agko' la'a.#Sal 90.4. 9Apkeneykek cha'a nápakha énxet mepekhaksek elának Wese' egegkok ma'a ektémakxa axta appekkeneykekxa appeywa, wánxa agkok, apkeláneykha akke aksa kéxegke Wese' egegkok, hakte mopmenyék kóletsapok kélxama enxoho, wánxa aksa apkepmenyého Wese' egegkok kólsawhaxkohok kéxegke kólyakmagkasek kélwáxok.#Ez 18.23.
10Katlakkasek sat ewatak Wese' egegkok, ektémol'a énxet apmenyexma ekpelakkaso ewa'.#Mt 24.43; Lc 12.39; 1 Ts 5.2; Ap 16.15. Keñe sat kamaskok ma'a néten yetlo ekyennakte extegyawa. Táxa sat kamasesók ekyókxoho aksok ekhéyak nak néten tén han náxop, kasawhaxkohok sat kalmétek ekyókxoho aksok
11Kéméxchek kéxegke kólpagkanchesaxkohok kélagko' ma'a Dios, tén han kóltehek ektakmela kéltémakxa, hakte ekyókxoho aksok sat katnehek kélmaséseyam xa ektaha nak. 12Kólleyx kéxegke kammok ekhem apxeyenmakxa nak Dios, kóllenxanmoho cha'a yakwayam enxoho kañehémhok kawak xa ekhem nak. Táxa sat kamasesók néten ekwa'a sat xa ekhem nak, ekyókxoho aksok sat kalpayhekxak neyseksa táxa eyálewe; 13akke nelhaxnak negko'o m'a apxeyenma axta elának Dios, axnagkok néten tén han xóp axnagkok, cham'a yakwánxa sat exmakha énxet elpéwomo nak apkeltémakxa tén han ma'a eltakmela nak apkeltémakxa.#Is 65.17; 66.22; Ap 21.1.
14Elyáxeg selásekhayo, kóllenxánem cha'a yakwayam enxoho elwetágwatak kéxegke Dios ekyetna meyke ektahakxa kélwáxok, tén han meyke elenchahamaxche kéltémakxa ekmaso, tén han meyke kélsexnánemaxche, neyseksa kélhaxanma katnehek xa. 15Kaxén cha'a kélwáxok senláneykencha'a aksa Wese' egegkok yetlo mepekhésamap, yakwayam enxoho hẽlwagkasek teyp. Aptáxésesegkek axta nahan kéxegke egyáxeg negásekhayo Pablo xa ektéma nak, ekhawo m'a ektémakxa nak apya'ásegwayam ektaha axta apméso Dios. 16Ekyókxoho weykcha'áhak aptáxéso Pablo axta aptáxésesók kéxegke apkeltennasama xa ektéma nak, yetneyk axta eykhe anhan nekha apnaktáxéso Pablo eyáskexa nak kólya'asagkohok ektaha nak cha'a apyetnakháseyam ma'a énxet'ák melya'áseyak nak aksok, tén han ma'a énxet'ák elyelkamáxkoho nak apteme melya'áseyam ekhawo aptamheykegkaxal'a nahan étnakhásók ma'a ekyókxoho eknaktáxésamaxche nak. Sat kañék apkelsexnánemap eñama aptamhéyak xa ektaha nak.
17Elyáxeg selásekhayo, kólawho kéxegke xa, yakwayam enxoho megkalmehek ma'a ektémakxa nak sẽlyexancháseykha énxet'ák elmasagcha'a nak apkeltémakxa, yakwayam enxoho megkaweywenték ma'a ektémakxa nak ekyennakwayam kélteme megkólya'áseyam, hakte nano' kélya'áseyak kéxegke ekmáheyo katnehek xa. 18Wánxa agkok, emenyék ko'o kólya'ásegwomhok ektakmela agko' ma'a Wese' egegkok Jesucristo segwagkasamo nak teyp, tén han seyámenyého kólyánchesagkohok kélma kéxegke m'a segásekhayo eñama nak Wese' egegkok. ¡Apcheymákpoho sat cha'a kóltemésesek Wese' egegkok keso kaxwo' nak, tén han megkatnegwayam enéxa! Katnahagkok sat.
Currently Selected:
2 SAN PEDRO 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
