2 SAN PEDRO 1
1
Pedro apcháphaso ekxeyenma apwáxok
1Ko'o Simón Pedro sekteme Jesucristo apchásenneykha sekteme nahan seykha amya'a apagkok. Kéxegke ektáxesásak se'e weykcha'áhak nak, kéxegke ekyetna nak megkólya'áseyam ektakmela agko', ekhawo s'e ekyetna nak han negko'oxa, hakte ekpéwomo aptémakxa m'a Jesucristo#Tit 2.13. segwagkasamo nak teyp, aptaha nak Dios egagkok. 2Kólyánchesho kélma kéxegke m'a segméso naksa nak Dios ektémakxa nak segemleykekxoho, tén han ma'a meyke ektahakxa egwáxok eñama nak kélya'ásegwayam Dios, tén han ma'a kélya'ásegwayam nak Jesús, aptaha nak Wese' egegkok.
Ektakmela nentémakxa nenteme nak negyetlo Cristo
3Egmések axta negko'o Dios ekxámokxoho aksok eyéméxchexa nak negko'o yakwayam enxoho antehek negyetlo Cristo tén han antehek nempagkanchásamáxche Dios eñama m'a apmopwána nak, cham'a segyekpelchásesakmo axta Dios ma'a Jesucristo, cham'a Jesucristo aptaha axta segwóneykha negko'o eñama m'a ektémakxa nak apcheymákpoho, tén han eñama m'a ektémakxa nak ektakmela aptamheykha. 4Axta keñamak sempekkencháseykekxo appeywa Dios xa, cham'a ektaha nak ekyawe agko', ektaha nak han ekmomnáwa agko', yakwayam enxoho kawakxohok kéxegkáxa m'a aptémakxa nak Dios, tén han kólántépok neyseksa m'a aksok ekmaso negyespagko ekmaseseykmohol'a énxet ekyetna nak keso náxop. 5Ekeso eñamakxa eyéméxko nak kólwaskápekxohok kólyepetchesek megkólya'áseyam ma'a nentémakxa ektakmela nak; keñe m'a nentémakxa ektakmela nak, kólyepetchesek ma'a negya'ásegwayam nak; 6keñe m'a negya'ásegwayam nak, kólyepetchesek ma'a negmowána nak anlanagkohok nentémakxa; keñe m'a negmowána nak anlanagkohok nentémakxa kólyepetchesek ma'a mampekhésamaxche nak; keñe m'a mampekhésamaxche nak, kólyepetchesek ma'a nempagkanchásamáxche nak Dios; 7keñe m'a nempagkanchásamáxche nak Dios kólyepetchesek ma'a ektémakxa nak nelásekhamaxkoho nenteme nak magya'áseyam Cristo; keñe m'a ektémakxa nak nelásekhamaxkoho nenteme nak magya'áseyam Cristo, kólyepetchesek ma'a negásekhayo nak.
8Kéltemegkek agkok kéxegke xa ektaha nak, tén han ma'a kélyanchásegkoho enxoho kélteme xa, megkatnehek sat eyakhémo m'a kéltémakxa nak kéxegke, megkatnehek sat nahan eyakhémo kélyekpelchágwayam ma'a Wese' egegkok Jesucristo. 9Agkok etnék xama énxet xa ektaha nak, máxa etnehek ma'a énxet meyke apakta'ák la'a esenhan ma'a megkawegkepma nak apkelyaheykha; kalwagkámak ma'a ektémakxa axta kélmaséseso mey'asáxma, apkeláneya axta cha'a nano'. 10Elyáxeg kólenxánem keytek kélwáxok kéxegke xa hakte apkelwóneyha axta kéxegke Dios, apkelyésáha axta anhan kéxegke. Kéltemék agkok xa ektaha nak, megkóltemekxék sat cha'a. 11Sat kañék kélhayo kólántexek kéxegke yetlo kélapeykha m'a aptémakxa nak wese' apwányam megkatnegwayam enéxa m'a Wese' egegkok Jesucristo segwagkasamo nak teyp.
12Ekeso eñamakxa peya nak alenxanmohok seltennáseykekxoho cha'a kéxegke xa ektéma nak, neyseksók eykhe kélya'áseyak xa, neyseksók eykhe anhan kéllenxányam ma'a amya'a ekmámnaksoho kélxekmówásamáxko axta kéxegke. 13Xénchek ko'o ewáxok eyéméxko altennásekxohok cha'a kéxegke xa sektahakxa exchek seláneya neyseksók sekha makham. 14Ey'asásegwokmek axta ko'o Wese' egegkok Jesucristo peya kañehémhok kamassegwók sekha keso náxop. 15Wánxa agkok, alenxanmohok sat eyke ko'o seláné xa, yakwayam enxoho kaxénwakxohok cha'a kélwáxok kéxegke xa sektahakxa exchek seláneya, cham'a sétsapa enxoho ko'o.
Enxet'ák ektaha axta apwetayo Cristo apcheymákpoho
16Hakte ekmámnaksoho agko' ma'a ektahakxa axta nelxekmóso negko'o kéxegke, cham'a ektémakxa nak Dios apmopwána tén han ma'a Jesucristo Wese' egegkok apkexyeyam sat, háwe m'a amya'a kéltenneykha naksal'a, cham'a apyeykháseykegkohol'a ektémakxa apkeltenneykha énxet. Hakte negweté egagko' axta negko'o m'a ektémakxa nak apcheymákpoho Wese' egegkok Jesús. 17Axta negwethok negko'o m'a apmésa axta Dios Egyap ekyawe kéláyo tén han apcheymákpoho, cham'a nenleg'a axta anhan aptaha appeywa Dios se'e: “Keso hatte seyásekhayo nak ko'o s'e, aptaha nak selyéseykha ahagko' ko'o.” 18Negko'o egagko' axta nahan nenlegé xa Dios appeywa eñama nak néten, nenxegexma axta nentahak negko'o Wese' egegkok Jesús ma'a egkexe ekpagkanamaxche nak.#Mt 17.1-5; Mr 9.2-7; Lc 9.28-35.
19Cháxa ektaha nak ekteméseso ekmámnaksoho m'a amya'a apkeltenneykha axta énxet'ák apkellegaso axta Dios appeywa, cham'a megkatnama nak eyakhémo kélháxenmo kéxegke. Hakte máxa chálewaso xa amya'a nak, cham'a elsáseykmohol'axma neyseksa ekyaktesakxaxma, yakwayam kalsásesek exma kélwáxok kéxegke, ekwokmoho m'a axto'o apteyapmakxal'a yaw'a apwányam. 20Akke ektakmela agko' kólya'ásegwomhok se'e: mopwanchek xama énxet etnehek appékáseykekxoho apagko' ektémakxa m'a amya'a eñama Dios ekxeyenma nak yakwánxa katnehek ekyetnama nak eknaktáxésamaxche, cham'a eñama enxoho m'a ektémakxa nak elchetamso apwáxok énxet, 21hakte háwe axta apkelpeywa apancha'awo' énxet'ák apkellegaso Dios appeywa m'a ektémakxa axta cha'a apkeltenneykha; wánxa agkok, Dios axta eyke keñamak ma'a ektémakxa axta cha'a apkeltenneykha xa énxet'ák nak, eñama appékesáseyak ma'a Espíritu Santo.
Currently Selected:
2 SAN PEDRO 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.