1 SAN PEDRO 5
5
Pedro apméso appeywa énxet'ák apteme nak melya'áseyam
1Emenyék ko'o agkések kaxwo' sekpeywa m'a énxet'ák apkelámha apmonye'e nak kélakneykekxexa kéxegke, ko'o sektaha nak han sémha emonye sekhawo xa énxet'ák nak, sektaha nak han sekweteykegkoho m'a ektémakxa axta aplegeykegkoho Cristo, hewatámhok sat nahan ko'o xa Cristo apcheymákpoho, cham'a peya nak hẽlxekmósho', ekhawo nak han xa énxet'ák nak. 2Kóltakmelches Dios apnaktóso nekkések,#Jn 21.15-17. cháxa kélásennagkama nak kéxegke yakwayam kóltakmelchesek xa; kóllána' cha'a yetlo kélmáheyo kélagko' ekhawo m'a ektémakxa nak Dios apmopmenyého, háwe m'a kélyáteyeykegkohol'a, háwe nahan ma'a eñama nak kélmámenyého selyakye, wánxa agkok kóllána kéltamheykha yetlo kélmáheyo kélagko'. 3Nágkólteme aksa kélyennaktésamaxkoho kóllának ma'a énxet'ák ektaha nak kéltakmelcheso kéxegke, wánxa agkok, kólxemósho aksa kéltémakxa ektakmela, yakwayam enxoho elyetlakxak xa énxet'ák nak. 4Kéltemék agkok xa, kólxawak sat kéxegke aksok kélxawé naksa ekha nak eyeymáxkoho, cham'a aksok nenxawé naksa ektaha nak megkatsagkásamáxche, cham'a senxekmowáseykpoho sat ma'a aptaha nak apkemha apmonye keláneykha nekkések.#He 13.20.
5Hawók nahan kéxegkáxa wokma'ák nak, kólteme cha'a kélyaheykekxoho m'a apkelwányam kélagkok nak. Negyókxoho cha'a kéméxchek antehek nelyaheykekxoho egmók, yetlo megkeymáxkoho egwáxok, hakte:
“Apkelmexchek cha'a Dios ma'a
énxet'ák apkeleymákpoho nak,
wánxa agkok, appasmeyk eyke cha'a
yetlo apchásekhayo m'a énxet'ák
meleymákpoho nak.”#Pr 3.34; Stg 4.6.
6Kólteme cha'a megkóleymáxkoho nápakto' Dios, ekha nak apmopwána hegmeyók, yakwayam enxoho etnésesek kéxegke ekha kéláyo Dios, cham'a ekwokmo enxoho ekhem#Mt 23.12; Lc 14.11; 18.14; Stg 4.10. ekxénakxa apwáxok etnésesek. 7Kólásenneykxa cha'a Dios yakwayam elánésekxak ma'a ekyókxoho ektémakxa nak ekyentaxnamo kélwáxok, hakte apkeltakmelchesegkek kéxegke Dios.#Sal 55.22; Mt 6.25-34.
8Kólteme ekha kélya'áseykegkoho, kólleyxmakha cha'a, hakte máxa entahak aksok nawhak eklo ekyexweweyncha'a ektegyeyncha'a ekyógkexma m'a kelyekhama' ektaha nak megkatnaha egmók. 9Nágkólhaxkoho aksa yakwánxa katnésesek kelyekhama', kólyennaktes kélteme megkólya'áseyam, hakte kélya'ásegkok kéxegke ekhawo kéllegeykegkoho m'a ektémakxa nak apkellegeykegkoho ẽlyáxeg nentémo xamo' magya'áseyam apheykha ekyókxoho yókxexma keso náxop. 10Etnésesek sat kéxegke kélpéwomo Dios natámen kéllegeykegkoho yakwatakxoho, elyennaktésesek sat nahan kélteme megkólya'áseyam, etnésesek sat nahan ekha kélyennakte. Cháxa Dios sẽlwoneykencha'a axta eñama ekyawe segásekhayo xa, apkeltamhok axta hegwakxohok negko'oxa m'a ektémakxa nak apcheymákpoho megkamassegwayam eñama negyepetcheyo m'a Jesucristo. 11Megkamassegwomek ektémakxa nak apmopwána Dios. Katnahagkok sat.
Enxet'ák kélapháseso ekxeyenma kélwáxok
12Silvano#Hch 15.22,40. ko'o eyásenneykxak setáxésesa ekyakwate s'e sekpeywa nak, cham'a egyáxeg ekxeyenma nak ko'o ewáxok aptaha meyenseyam aptamheykha, yakwayam enxoho altennasagkohok kéxegke m'a aksok kélxaka axta, ektaha ekxekmóso eyámnaksoho m'a ektémakxa nak Dios segásekhayo, yakwayam enxoho nahan altennaksek kéxegke ektaha nakso' xa. Nágkólyensem aksa kéxegke xa ektémakxa nak Dios segásekhayo.
13Apcháphásesek nahan ekxeyenma apwáxók kéxegke m'a énxet'ák melya'áseyam nak Cristo apheykha m'a Babilonia, aptaha axta Dios apkelyéseykha ekhawo ektémakxa nak han kéxegkáxa, apchaphásesek nahan ekxeyenma apwáxok kéxegke m'a hatte Marcos.#Hch 12.12,25; 13.13; 15.37-39; Col 4.10; Flm 1.24. 14Kólpeykes cha'a kélmók yetlo kélásekhayo nentémol'a anlának egmók nentémo xamo' nak magya'áseyam.
Kólteme meyke ektahakxa kélwáxok kélxámokxoho kéxegke kéltaha nak Cristo énxet'ák apagkok.
Currently Selected:
1 SAN PEDRO 5: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
