2 CORINTIOS 9
9
Aksok kélánchesáseykekxa ẽlyáxeg'a
1Megkeyméxchek alenxanmohok sektáxéseso kéxegke yakwayam altennaksek ma'a kélánchesáseykekxa nak aksok ẽlyáxeg apteme nak melya'áseyam, 2hakte ekya'ásegkok ko'o ekyetna kélmáheyo kóllának kéxegke xa. Yetlo ekpayheykekxa ewáxok cha'a ko'o altennasha énxet'ák apheykha Macedonia kéleynamo axta kélmáheyo kólpasmok kélnámokkok pók apyeyam axta, kéxegke kélheykha nak Acaya. Apxámok axta anhan énxet Macedonia apmáheyo ewhánhok kéxegke eñama xa aksok ektakmela nak kélmáheyo kóllának kéxegke. 3Wánxa agkok, eláphásek eyke ko'o s'e ẽlyáxeg'a nak, yakwayam enxoho megkayakhapwomók ko'o ewáxok sekxeyenma cha'a kéxegke ektakmela kéltémakxa, cham'a sekxéna enxoho cha'a aksok kéláncheseykekxa nak, yakwayam enxoho katnehek ekmámnaksoho kéllaneykekxa kéltahakxa kéxegke, 4etnehek kexaha katnehek selxegexma'a nápakha énxet'ák apkeleñama Macedonia, keñe elwetágwak megkóllaneykxo kéltahakxa kéxegke. Olmegkágwakxak negko'o ektaha enxoho kéxegke xa, hakte awanhek negko'o negáyo kéxegke, kayágwomhok nahan katnehek kélmegkakto kéxegkáxa. 5Cháxa keñamak ekxéna nak ko'o ewáxok eyéméxko etnehek sekxo' meyk'a kéxegke xa ẽlyáxeg'a nak, keñe anhan epasmok yakwayam kólpennaksek kéxegke kéláncheseykekxa m'a aksok kélxeyenma axta kólánchesekxak. Keñe sat kataxchek kéxegke kélnegkenma aksok ektaha yetlo megkólmeyagweykekxa háwe m'a neyseksa kélmeyawakxohol'a.
6Kaxénwakxohok kélwáxok se'e. Enxet ektahakxa enxoho antawók apkeneykekxa aksok, antawók nahan katnehek apnakxo ekyexna. Enxet ektahakxa enxoho ekxámokma apkeneykekxa aksok, xámok nahan katnehek apnakxo ekyexna. 7Negyókxoho cha'a kéméxchek agmések aksok, cham'a ekxénakxa enxoho egwáxok agmések. Háwe eyke m'a neyseksa magmáheyo nak agmések tén han ma'a sẽlyateyeykegkoho nak, hakte yásekhohok cha'a Dios ma'a énxet ektahakxa enxoho apméso aksok yetlo ekpayheykekxa apwáxok. 8Apwanchek egkések kéxegke Dios ekyókxoho ektémakxa aksok eleñama nak néten yetlo apyeykháseseykmoho, yakwayam enxoho keytek cha'a kéxegke m'a ekyókxoho aksok eyéméxchexa nak, keñe anhan kayeykhágwomhok kéxegke aksok, yakwayam enxoho kólpasmok ma'a ekyókxoho ektémakxa nak nentamheykha ektakmela. 9Temék eknaktáxésamaxche weykcha'áhak se'e:
“Apyeykhásesakmók axta apméso aksok ma'a
énxet meyke aksok apagkok nak,
megkamassegwomek nahan cha'a m'a
aptémakxa nak memyagweykekxa aksok.”#Sal 112.9.
10Dios sat egkések kéxegke ekyókxoho aksok yakwayam kólchenekxak, ewánegkesesek sat nahan, etekkesesek sat nahan ekyawe ekyakmageykekxa eñama xa megkólmeyagweykekxa aksok kélagkok nak, cham'a Dios segmésamol'a cha'a aktek yakwayam agkenekxak, tén han ma'a aksok nentamol'a cha'a.#Is 55.10. 11keytek sat kéxegke ekyókxoho ektémakxa aksok kélagkok, kólewának sat nahan kólmések yetlo megkólmeyagweykekxa aksok kélyáxeg. Sat kañék apméso elpayheykekxa apwáxók Dios ẽlyáxeg'a m'a aksok kélánchesáseykekxa nak yakwayam kóláphásesek, cham'a peya nak ansakxak negko'o. 12Hakte, háwe ekwánxa agkok peya ansakxések negko'o ẽlyáxeg'a m'a aksok eyéméxchexa nak, cham'a peya nak ansakxések aksok kélánchesáseykekxa nak kéxegke, egmenyék eyke nahan kañék apméso elpayheykekxa apwáxók Dios eñama xa aksok kéllané nak kéxegke. 13Eltemésesek sat nahan apcheymákpoho Dios xa énxet'ák nak, hakte sat kañék apkelweté kélyaheykekxoho kéxegke tásek amya'a kélxeyenma nak megkólya'áseykmo eñama xa kélpasmo nak, cham'a tásek amya'a eñama nak Cristo. Etnehek sat nahan apcháyo Dios xa énxet'ák nak, eñama m'a megkólmeyagweykekxa nak kélánchesáseykekxa aksok, tén han yakwayam kólmések ma'a apyókxoho énxet'ák nak. 14Elmaxnésesek sat nahan kéxegke xa énxet'ák nak yetlo apkelásekhayo eñama m'a apxekmóso axta anhan kéxegkáxa Dios ekyawe apkelásekhayo. 15Negmések negko'o ekpayheykekxa egwáxok Dios, hakte egmések axta negko'o aksok segméso naksa ektaha nak ekyawe agko' magkegwagko nak han anxének ektémakxa.
Currently Selected:
2 CORINTIOS 9: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
