Popular Bible Verses from 2 CORINTIOS 9

Share

Apwanchek egkések kéxegke Dios ekyókxoho ektémakxa aksok eleñama nak néten yetlo apyeykháseseykmoho, yakwayam enxoho keytek cha'a kéxegke m'a ekyókxoho aksok eyéméxchexa nak, keñe anhan kayeykhágwomhok kéxegke aksok, yakwayam enxoho kólpasmok ma'a ekyókxoho ektémakxa nak nentamheykha ektakmela.

Negyókxoho cha'a kéméxchek agmések aksok, cham'a ekxénakxa enxoho egwáxok agmések. Háwe eyke m'a neyseksa magmáheyo nak agmések tén han ma'a sẽlyateyeykegkoho nak, hakte yásekhohok cha'a Dios ma'a énxet ektahakxa enxoho apméso aksok yetlo ekpayheykekxa apwáxok.

Kaxénwakxohok kélwáxok se'e. Enxet ektahakxa enxoho antawók apkeneykekxa aksok, antawók nahan katnehek apnakxo ekyexna. Enxet ektahakxa enxoho ekxámokma apkeneykekxa aksok, xámok nahan katnehek apnakxo ekyexna.

Dios sat egkések kéxegke ekyókxoho aksok yakwayam kólchenekxak, ewánegkesesek sat nahan, etekkesesek sat nahan ekyawe ekyakmageykekxa eñama xa megkólmeyagweykekxa aksok kélagkok nak, cham'a Dios segmésamol'a cha'a aktek yakwayam agkenekxak, tén han ma'a aksok nentamol'a cha'a. keytek sat kéxegke ekyókxoho ektémakxa aksok kélagkok, kólewának sat nahan kólmések yetlo megkólmeyagweykekxa aksok kélyáxeg. Sat kañék apméso elpayheykekxa apwáxók Dios ẽlyáxeg'a m'a aksok kélánchesáseykekxa nak yakwayam kóláphásesek, cham'a peya nak ansakxak negko'o.

Negmések negko'o ekpayheykekxa egwáxok Dios, hakte egmések axta negko'o aksok segméso naksa ektaha nak ekyawe agko' magkegwagko nak han anxének ektémakxa.