2 CORINTIOS 8
8
Magmeyagweykekxa aksok negméso Dios
1Elyáxeg, egmenyék negko'o óltennaksek kéxegke ektahakxa nak ektamheykha Dios segásekhayo nepyeseksa apchakneykekxexa énxet yókxexma Macedonia. 2Kelpayheykekxeyk aksa apwáxók neyseksa apkelweté m'a aksok ekyekkónma nak; méko eykhe nahan aksok apagkok, axta eyke emyágweykxak appekkena aksok apméso Dios, máxa aptamheykegkok ma'a ekxákma enxoho aksok apagkok. 3Ko'o sekteme sekya'áseykegkoho apnegkenma cha'a aksok apméso Dios xa énxet'ák nak, cham'a ekyetnakxa enxoho, yetlo apmáheykegkoho apancha'awo' enegkenek, apyeykháseykmók nahan cha'a apnegkenéyak. Apkeltamhok axta anhan 4óghok negko'o epasmok Dios énxet'ák apagkok#Ro 15.26. xa énxet'ák nak. 5Apyeykhásekmók axta m'a negáneyakxa axta etnahagkok, hakte apkelmeyásekpók axta apancha'awók Dios, Wese' egegkok axta sekxo', keñe axta negko'o, ekhawo m'a ektémakxa nak Dios apmopmenyého. 6Ekeso eñamakxa neltamho axta negko'o Tito yánchásekxak kélnepyeseksa kéxegke xa aksok kélmeso nak Dios, ektaha nak ektakmalma agko', ektaha axta anhan apmonye apcháncheseykekxa. 7Kéméxchek nahan katakmelek kéllané kéxegke s'e nentamheykha nempasmo nak egmók, kéxegke kéltaha nak cha'a kéllané ektakmela ekyókxoho s'e: megkólya'áseyam, kélmowána kóltennaha tásek amya'a, kélya'ásegwayam, tén han kélmáheyo nak cha'a kólpasmok kélmók, tén han ekyetnama nak kélásekhayo eltámeyéyak axta eñama negko'o.
8Háwe eyke selyateyeykegkoho kóllának kéxegke sektaha nak seláneya xa; wánxa eyke aksa emenyék ko'o kólya'asagkohok kéxegke m'a apkeltémakxa nak cha'a appasmo pók énxet mók apchakneykekxexa nak, yakwayam enxoho kataxchek ekyetna kéxegke kélásekhayo ekmámnaksoho nak. 9Hakte kélya'ásegkok kéxegke Wese' egegkok Jesucristo, aptemesásamákpo axta meyke aksok apagkok kéxegke eñamakxa, xámok axta eykhe aksok apagkok ma'a néten, yakwayam enxoho kóltehek kéxegke ekxákma aksok kélagkok eleñama nak néten, eñama m'a aptemesásamap axta Cristo meyke aksok apagkok, eñama nahan ma'a ektémakxa nak segásekhayo.
10Eltennásek ko'o kéxegke s'e ektahakxa nak ekxeyenma ewáxok hakte tásek kóllának kéxegke xa seltennasa nak. Kélanchesákxeyk axta kéxegke aksok pók apyeyam axta, yakwayam kólpasmok ẽlyáxeg'a, yetlo kélmáheyo axta nahan kéllana kéxegke xa. 11kólsawhoho kéllané kéxegke m'a aksok kélénawo axta kéllané, ekhawo m'a ektahakxa axta kélmáheyo kóllának sekxo' axta, akke entemék ma'a ekyetnakxa enxoho aksok kélagkok. 12Nakso' agkok apmoko egkések aksok Dios xama énxet, emok han takha' Dios ma'a aksok apméso enxoho énxet, cham'a ekyetnakxa enxoho. Mehẽlmaxneyhek nahan Dios ma'a aksok meykexa enxoho negko'o.
13Háwe eyke yakwayam keytek kéxegke eyéméxchexa aksok eñama kélpasmo kélnámokkok, yakwayam kaxhok mók ekha aksok kélagkok akke. 14Yetneyk eyke kaxwo' kéxegke m'a aksok eyéméxko nak ma'a énxet'ák nak; nano' sat kexaha anhan keytek aksok eyéméxchexa kéxegke m'a énxet'ák nak, keñe sat kólhágwakxohok kélmók. 15Ekhawo ektémakxa nak eknaktáxésamaxche s'e: “Axta kayeykhágweykmohok aksok ma'a énxet ektaha axta ekxámokma apcháncheseykekxa aksok, axta anhan keymomaxchek xama aksok ma'a énxet ektaha axta antawók apcháncheseykekxa.”#Ex 16.18.
Tito keñe anhan ma'a apkelxegexma'a
16Ekmések ko'o ekpayheykekxa ewáxok Dios, hakte apheyásók axta mók ekxeyenma egwáxok negmáheyo ampasmok kéxegke, ko'o, tén han Tito. 17Hakte apkelyahakxók axta m'a seltamhókxa axta etnehek, kaxwo' sat eyke etyánegwakxohok kéxegke m'a Tito, eñama apmáheyo apagko', hakte apmáheyok epasmok kéxegke m'a.
18Eyáphasawók nahan xamo' Tito xama egyáxeg apxénamakpohol'a ektakmela ekyókxoho kélakneykekxexa nak, eñama m'a ektakmela nak apkeltenneykha tásek amya'a. 19Ekyókxoho apchakneykekxexa énxet axta anhan kélyésáha xa, yakwayam enxoho hegyetlók negko'o m'a nelmahágkaxa enxoho, yakwayam enxoho nahan elának se'e nentamheykha ektakmela nenlana nak, yakwayam óltemésesek apcheymákpoho Wese' egegkok, yakwayam enxoho anhan kataxchek negmamenyého negko'o ampasmok egnámokkok. 20Magmenyék negko'o ólxénaxchek ekmaso nentaha nak xa eñama s'e ekxámokma nak negáncheseykekxa aksok. 21Cháxa keñamak nenlenxanakmo nak negko'o nenlané aksok ektakmela xa, háwe eyke ekwánxa agkok nápakto' ma'a Wese' egegkok, nápakta'awo' énxet'ák akke anhan nenlanak aksok eltakmela.#Pr 3.4.
22Eláphásek nahan ko'o pók ẽlyáxeg xamo' xa énxet'ák nak, cháxa ektakmela axta negko'o negweté ekyetna apmáheyo epasmok apnámokkok xa, yágwokmók eyke kaxwo' apmáheyo epasmok kéxegke eñama m'a ekyawe nak han apkeláyo kéxegke. 23Ewanchek ko'o axének Tito aptaha sekxegexma, aptaha anhan sektamheykha xamo' yakwayam ampasmok kéxegke. Ewanchek nahan axének ko'o m'a apkánet ẽlyáxeg'a ektaha axta eláphaso kélakneykekxexa, cham'a, kélayókxa nak Cristo. 24Kólxekmós eyámnaksoho kélásekhayo kéxegke xa énxet'ák nak, kólxekmós nahan ektakmela nenxeyenma negko'o kéxegke, yakwayam enxoho kólya'ásegwók ekyókxoho apchakneykekxexa énxet ekyetna kélásekhayo kéxegke.
Currently Selected:
2 CORINTIOS 8: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
