2 CORINTIOS 7
7
1Elyáxeg selásekhayo, cháxa sempekkencháseykekxa axta negko'o appeywa Dios xa; ékeso eñamakxa eyéméxko nak negko'o antehek eyáxñeyo nentémakxa, moghók hempeysegkesek ma'a ekyókxoho aksok ekpeysegkesamo nak negyókxa, tén han ma'a egwáxok; anlenxanmok hana antehek nempagkanchásamáxche agko' Dios, eñama m'a ektémakxa nak cha'a negaye Dios.
Enxet'ák apheykha Corinto apkelyakmagkaso apwáxók
2Henxekmós negko'o ekwánxa segásekhayo kéxegke. Manteméseseykmohok cha'a negko'o exma xama énxet enxoho; mantawasáseykha cha'a negko'o apwáxok xama énxet enxoho; mólyexancháseykha nahan cha'a negko'o xama énxet enxoho. 3Háwe yakwayam axénchásekxohok kéltémakxa kéxegke sektaha nak seláneya kéxegke xa, ektemék axta eyke seláneya kéxegke nano' axta, cham'a selásekhayo cha'a ko'o kéxegke, yakwayam enxoho megkamassegwomek negyepetcheykha egmók, megkeyxek ma'a nétsapa enxoho esenhan ma'a mótsapa enxoho. 4Magweysekxek ahagko' cha'a ko'o selpakhetchesa enxoho kéxegke, awanhek nahan ekpayheykekxa ewáxok kéxegke eñamakxa. Ekwaskápeykxók cha'a ko'o neyseksa m'a ekyókxoho ektémakxa nak nenlegeykegkoho, awanhek nahan cha'a ekpayheykekxa ewáxok.
5Móllókaseykmok negko'o nelyampé, eyeynamókxa m'a nelwokmo axta Macedonia,#2 Co 2.13. ekyókxoho yókxexma akke negwetágweykmok cha'a negko'o ekyentaxnamo negheykha: nennapéxchek cha'a negko'o m'a ektémakxa nak negyáwa, chekak nahan cha'a egwáxok. 6Wánxa agkok, ẽlwaskakkásekxók axta negko'o Dios, aptaha nak cha'a apkelwaskakkáseykekxoho énxet'ák elleklágwayam nak, axta ẽlwaskakkásekxohok negko'o Dios ma'a apwa'a axta Tito. 7Háwe axta ekwánxa agkok sẽlwaskakkásekxoho negko'o m'a apwa'a axta, akke anhan keñamak ma'a kélwaskakkásekxoho axta kéxegke Tito. Ẽltennáseyha axta negko'o Tito kélámenyého kélagko' hek hẽlwetekxak kéxegke, ẽltennaseyha axta anhan ellapwámeykegkoho exnek kéxegke, keñe exnek han ektemesáseykencha'a kélwáxok ko'o. Cháxa keñamak ekyágwokmoho nak ko'o ekpayheykekxa ewáxok xa.
8Kellapwagkásegkek axta eykhe kéxegke weykcha'áhak sektáxéseso axta, akke kayakhakkásók kaxwo' ewáxok. Yakhápawók axta agkok ko'o ewáxok sekwet'a ellapwagkásegko kéxegke yakwatakxoho m'a weykcha'áhak sektáxéseso axta, 9payhekxeyk eyke kaxwo' ewáxok; akke keñamak ekpayheykekxa ewáxok ko'o m'a sekwet'a axta ellapwagkásegko kéxegke weykcha'áhak seyapháseso axta, akke keñamak ko'o ekpayheykekxa ewáxok ma'a ektemesáseykxo nak megkólya'áseyam Dios kéxegke xa ellapwámeyak nak. Dios axta apmopmenyého katnehek kéxegke xa ellapwámegko axta, háwe axta negko'o negyentaxnésesamo kélwáxok kéxegke; 10hakte hegyakmagkaseshok cha'a egwáxok ma'a senlapwayam ektaha nak Dios apmopmenyého, segmésamol'a nelwagkásamáxche teyp. Chakhók agmok ekyentaxnamo egwáxok. Wánxa agkok, nétsapma eyke katekkeshok ma'a senlapwayam eñama nak keso náxop. 11Kóllano hana ektemésesakxa kéxegke xa ellapwámeyak ektaha axta Dios apmopmenyého. Ekmámnaksoho axta kéltemesásak kéxegke eñama xa kéllegeykegkoho nak, elmeyókek axta anhan kéxegke, elnathésásók axta anhan kéxegke, tamháha axta anhan kélwáxok. Keñe axta kélmoko helwetekxak kéxegke natámen xa. Elnathésásók axta kéxegke, kéllegasásegkók axta m'a énxet ektaha axta apsexnánémap. Kéxekmósek axta kéxegke megkólláneya aksok ekmaso eñama kélteme xa ekyókxoho nak. 12Axta ko'o kaxénak ewáxok énxet apteme axta aptekkeso ekmaso, megkaxénak nahan ewáxok ma'a énxet ektaha axta kéltemeseseykmoho exma, cham'a sektáxésesa axta kéxegke weykcha'áhak, axta eyke keñamak sektáxésesa kéxegke weykcha'áhak yakwayam enxoho katakmelhok ekwetamaxche nápakto' Dios ekyetna kéxegke ekyetnakhayo kélwáxok negko'o eñamakxa. 13Cháxa sempeykesáseykekxo nak egwáxok negko'o xa.
Yágwokmók eyke negko'o elpayheykekxa egwáxok, cham'a ekpayheykxo nak egwáxok negwet'a ekpayheykxo apwáxok Tito; hakte kélyókxoho kélwaskakkásekxohok makham kéxegke m'a Tito. 14Eltennásek axta ko'o Tito selmésama kéxegke ekpayheykekxa ewáxok, mehelmeyásak nahan sekmegkakto. Ekmámnaksoho axta nahan ma'a nentahakxa axta negáneya Tito ekhawo ektémakxa nak cha'a ekmámnaksoho neltennaso kéxegke: cham'a ekyetna nak sẽlpeykesáseykekxa egwáxok negko'o kéxegke. 15Yágwokmók nahan apkelásekhayo kéxegke Tito, cham'a ekxeyenwákxoho nak apwáxok kélyaheykekxoho kéxegke kélyókxoho nak, keñe anhan kélmoma takha' yetlo ekyawe kéláyo. 16Awanhek ko'o ekpayheykekxa ewáxok ekyetna ekyawe seyáyo kéxegke.
Currently Selected:
2 CORINTIOS 7: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
