2 CORINTIOS 4
4
1Mólháxexchágwokmok cha'a negko'o, hakte Dios axta segásennagko yakwayam anlának xa nentamheykha nak eñama segemleykekxoho. 2Negyenyókek axta negko'o m'a aksok segmegkasamo apkelyexamakpoho axta cha'a apkeláneykegko énxet; manlanak nahan cha'a yetlo negmáheyo ólyexanchesha egnámokkok, Magyetnakháseykmok nahan cha'a m'a ektémakxa nak Dios appeywa. Wánxa agkok, ekmámnaksoho eyke nentémakxa nak cha'a negko'o nempeywa, cháxa ektahakxa nak cha'a ektakmela ekxeyenma apwáxók negko'o énxet'ák nápakto' Dios xa ektaha nak. 3Wánxa aksa askehek cha'a elya'asagkohok tásek amya'a neltenneykha negko'o m'a énxet'ák peya nak elmassegwók, máxa cha'a katnésesek ma'a apáwa kélapmal'a. 4Apkelya'ásekmek cha'a xa énxet'ák nak, hakte meyke apakta'ák temésesók ma'a dios ektaha nak eláneykha keso náxop, yakwayam enxoho melwetyehek ma'a tásek amya'a elseyexma agkok eñama nak ma'a Cristo ekha nak apcheymákpoho, aptaha nak aphémo apagko' ma'a Dios. 5Manxénáxchekxohok cha'a negko'o egagko' neltenneyncha'a, wánxa cha'a nenxéna m'a Jesucristo aptaha nak Wese' egegkok; nenxénchek eyke cha'a negko'o nentaha sẽlásenneykha kéxegke eñama negásekhayo m'a Jesús. 6Dios apagko' axta apkeltémo katyapok aksa elseyexma neyseksa ekyaktesóxma,#Gn 1.3. axta anhan apkeltémo katyapok elseyexma egwáxok negko'o m'a Dios, yakwayam enxoho agya'ásegwomhok ektémakxa nak Dios apcheymákpoho elyenmasama nak nápát ma'a Jesucristo.
Nentémakxa ekha nak magya'áseyam
7Cháxa aksok ekmomnáwa ekyetna nak negyókxa xa, ektaha nak ekhawo m'a yátegwáxa apkelánamapla'a yelpa', yakwayam enxoho kataxchek ektaha eñama Dios xa negmowána ekyawe nak, háwe eñama negko'o egagko'. 8Awanhek eykhe ekyentaxnamo negheykha, akke hegyakhápak negko'o, yetneyk nahan negko'o ekyetnakhayo egwáxok, wánxa agkok nelenmáxexkók eyke. 9Ẽlmenxeneykha eykhe cha'a negko'o, akke hegyamasmak Dios; awanhek negko'o senlegasáseykegkoho, akke hẽlmaseseykmok. 10Hentamhohok cha'a negko'o kamawhok kawak nétsapma m'a ektémakxa axta apketsapma Cristo, keñe so ektémakxa nak nelyennakte negko'o, cháxa senxekmóso apha makham Jesucristo xa. 11Negko'o nelyenna nak, keto' cha'a katnehek nétsapma eñama negyetleykekxa m'a Jesús, yakwayam enxoho kataxchek ekyetna negko'o m'a ektémakxa nak Cristo apyennakte keso negyókxa étsapmo nak. 12Keto' cha'a negko'o nentekyómakxa, keñe kéxegke ekyetna ekyennakte kélnenyek.
13Temék eknaktáxésamaxche weykcha'áhak se'e: “Yetneyk axta ko'o may'áseyam, ékeso eñamakxa sekpakmeta axta.”#Sal 116.10. Hawók nahan negko'o xa ektémakxa ekxeyenma egwáxok ekyetna xa magya'áseyam nak, magya'ásekmok cha'a, neltenneykha nahan cha'a. 14Hakte negya'ásegkok negko'o m'a Dios, aptaha axta apxátekháseyam apketsapa axta m'a Wese' egegkok Jesucristo, hennakxátekhasók sat nahan negko'o xa xamo' Cristo. Hennaklakxak sat xamo' kéxegke m'a aphakxa nak Cristo. 15Temegkek axta ekyókxoho xa yakwayam enxoho kapasmok kéxegke, yakwayam enxoho exámhok énxet apkelmeyáseyak Dios ektémakxa nak segemleykekxoho, yakwayam enxoho anhan exámhok énxet apméso ekpayheykekxa apwáxok Dios, keñe nahan kóltemésesek apcheymákpoho Dios.
16Ekeso eñamakxa mólháxexchágwokmo nak negko'o. Peykhe kamassegwók negko'o s'e ektémakxa nak negyókxa, keñe m'a espíritu ekyetna nak egwáxok ektamhágko cha'a axnagkok ekyókxoho ekhem. 17Kexyókók ektémakxa nak cha'a nenlegeykegkoho, ñohok nahan cha'a kamaskok. Wánxa agkok, hegmések sat eyke negeymáxkoho megkatnegwayam enéxa nápakto' Dios xa ektaha nak ekyawe agko', megkaxnawok ma'a nenlegeykegkoho nak. 18Megkaxénáha cha'a negko'o egwáxok ma'a aksok negwetayo nak, wánxa m'a aksok magwetayo nak. Hakte ñohok cha'a kamaskok ma'a aksok negwetayo nak, wánxa agkok, megkamassegwomek sat eyke m'a aksok magwetayo nak.
Currently Selected:
2 CORINTIOS 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
