2 CORINTIOS 2
2
1Axta keñamak mamoko makham atnehek meyk'a kéxegke yakwayam enxoho mallapwagkasagke'. 2Ellapwagkásegkek agkok ko'o kéxegke ¿yaksak sat ko'o hepeykesásekxak ewáxok, mehelpeykesásekxo enxoho ewáxok kéxegke, kéxegke ektahakxa enxoho sellapwagkáseyak ko'o? 3Ekeso eñamakxa sektaha nak sektáxéseso kéxegke xa ektaha nak, hakte axta amokók axog yakwayam hellapwagkasek kéxegke, kéxegke eyéméxko neykhe hegkések ekpayheykekxa ewáxok. Nakso' axta ektemesásak peya kaxhok ekpayheykekxa kélwáxok kélyókxoho kéxegke ektémakxa nak ko'o ekpayheykekxa ewáxok, 4wánxa agkok, yetnakha'awók axta eyke ewáxok sektáxésesa axta kéxegke m'a weykcha'áhak axta, kelapwokmek axta ewáxok ekwokmoho sekwana. Axta eyke atáxesásak yakwayam enxoho allapwagkasagkok kéxegke, emenyék eyke kólya'ásegwók kéxegke ekyawe seyásekhayo ekyetna nak ko'o.
Kélemleykekxoho énxet ektaha axta apnathémo Pablo appeywa
5Yetneyk agkok kélxama ektaha apkelapwagkaso pók, mehelapwagkásak wánxa ko'o, wákxók eyke nahan apkellapwagkáseyak kélyókxoho kéxegke. Ekxénchek ko'o eyesextawo cha'a ellapwámeyak kélnápakha, yakwayam enxoho magkések sekpeywa ekyennakte. 6Tásek ma'a ekwánxa axta ekyentaxno kéllegasáseykegkoho kéxegke xa énxet nak. 7Kéméxchek eyke kaxwo' megkólyakmagkásekxék aptemésesakxa, tén han kólpasmok aksa, keyntaxnegwomhok katnehek elapwayam xa énxet nak. 8Ekeso eñamakxa seltamho nak kóxekmowásekxohok kélásekhayo kéxegke xa énxet nak. 9Nano' axta sektáxéseso kéxegke xa amya'a nak, yakwayam enxoho alyekkónhok kéxegke, tén han ay'ásegwomhok kélmokók enxoho kólyetlók seltémókxa nak kóltehek. 10Enxet megkólyakmagkáseykxexa enxoho aptemésesakxa kéxegke, mayakmagkásekxék nahan ko'o xa aptahakxa. Mayakmagkásekxék nahan ko'o xa aptahakxa, cham'a ekyetna enxoho aksok yakwayam mayakmagkásekxék aptahakxa, eñama ekxeyenma ewáxok ko'o kéxegke nápakto' Cristo. 11Keñe sat yawanchek henlának negko'o Satanás, hakte tásók agko' negya'áseyak negko'o m'a ektémakxa nak.
Ekyetnakhayo apwáxok Pablo m'a tegma apwányam Troas.
12Xama axta sekwákxo tegma apwányam Troas yakwayam altennaha tásek amya'a eñama Cristo, tekkek axta yakwayam alyentamaxkohok alának sektamheykha eñama nak Wese' egegkok. 13Wánxa agkok, yetnakha'awók axta eyke ewáxok, hakte axta ót'ak egyáxeg Tito. Ekeso eñamakxa selpeykásegkakxoho axta énxet'ák sekmeyákxo m'a Macedonia.#Hch 20.1.
Nelyaphogweykmoho eñama Cristo
14Agmések sat ekpayheykekxa egwáxok Dios, aptaha nak cha'a segnakleykekxa apkeleweykxexa enxoho ektaha nak apkelyaphogweykmoho xamo' Cristo. Negko'o nahan keñamak apkelya'asásegwokmo Cristo énxet'ák ma'a ektémakxa nak appeywa, cham'a ekpayheykxo nak ekyókxoho yókxexma ektémol'a sokmátsa ekpakneyam. 15Negko'o nenteme neghawo m'a ektémakxa nak ekpakneyam aksok ekwatnamáxche ekmátsa ekpakneyamla'a, cham'a apmésamol'a cha'a Cristo m'a Dios, cham'a ekpayheykekxo nak han nepyeseksa énxet'ák peya nak elwagkasakpok teyp, tén han ma'a énxet'ák peya nak elmassegwók. 16Cháxa aksok ekmátsa ekpakneyam nak, temésesek cha'a ekpakneyam segakhamo m'a énxet'ák peya nak elmassegwók, keñe m'a énxet'ák peya nak elwagkasakpok teyp, temésesek cha'a ekmátsa ekpakneyam ekyennaktésamo egnenyek. ¿Yaksak eyewagko kalának xa nentamheykha nak? 17Mantahak cha'a negko'o aptamheykegkaxa nak nápakha énxet'ák apkelyanmagkásamakpo nak cha'a eñama nak Dios appeywa, wánxa agkok, neltennáha cha'a negko'o ekmámnaksoho agko' meyke negeyseykekxa nápakto' Dios, hakte negko'o nenteme Dios apkelásenneykha, eñama nahan negyepetcheyo m'a Cristo.
Currently Selected:
2 CORINTIOS 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
