2 CORINTIOS 1
1
Ekxeyenma ewáxok
1Ko'o Pablo, sekteme Jesucristo seykha amya'a apagkok eñama Dios apmopmenyého, eyáphásesek ko'o ekxeyenma ewáxok Dios énxet'ák apagkok apheykha nak xa tegma apwányam Corinto,#Hch 18.1. tén han ma'a apyókxoho ẽlyáxeg'a apheykha nak yókxexma Acaya, yetlo nahan sekxegexma egyáxeg Timoteo. 2Dios Egyap tén han Jesucristo Wese' egegkok sat etnehek apméso naksa kélyókxoho kéxegke m'a ektémakxa nak segemleykekxoho, tén han ma'a meyke ektahakxa egwáxok nak.
Pablo aplegeykegkoho
3Oltemésesek sat apcheymákpoho Dios Jesucristo Wese' egegkok Apyap, hakte cham'a Egyap aptaha nak apmopyósa henlanok ma'a, aptaha nak han Dios sempeykesáseykekxa cha'a egwáxok negko'o. 4Hempeykesásekxak nahan cha'a egwáxok neyseksa ekyókxoho ektémakxa nenlegeykegkoho, yakwayam enxoho negko'o xa agkegwának ólpeykesásekxak apwáxók énxet'ák ektaha nak apkellegeykegkoho, aghéshok negméso ekpayheykekxa egwáxok ma'a ekwánxa axta segméso negko'o Wese' egegkok. 5Egwaktamók cha'a negko'o ektémakxa nak ekyawe aplegeykegkoho Cristo, nenlegágkok cha'a negko'o xamo' Cristo ekhawo ektémakxa nak han segweyktamho cha'a negko'o ekyawe ekpayheykekxa egwáxok eñama Cristo. 6Nenlegágkok agkok cha'a negko'o, kéxegke yakwayam keytek elpayheykekxa kélwáxok akke, tén han kólwagkasaxchek teyp. Egmések agkok nahan cha'a negko'o Dios ekpayheykekxa egwáxok, kéxegke eyke nahan yakwayam keytek elpayheykekxa kélwáxok, yakwayam enxoho nahan kólewának kólenmaxaxkohok yetlo kélwaskápeykekxoho m'a nenlegeykegkoho nak, ekhawo ektémakxa nak han nenlegeykegkoho negko'o xa. 7Yawanchek kamaskok ektémakxa nak negáyo kéxegke, hakte negya'ásegkok ekwákxoho kéxegkáxa nenlegeykegkoho, ekhawo ektémakxa nak han ekweykekxoho kéxegke ekpayheykekxa egwáxok eñama nak Dios.
8Elyáxeg, egmenyék negko'o agya'ásesagkohok kéxegke ektahakxa axta negko'o nellegeykegkoho m'a yókxexma Asia.#1 Co 15.32. Awanhók agko' axta negweté negko'o nellegeykegkoho, xegkásók axta mólenmaxaxche'. Neganeykek axta mólyephogwomo'. 9Máxa axta entahak peya enxoho agmaskok. Wánxa agkok, egya'asásegwokmek axta eyke negko'o ektémakxa yakwayam magásenneyxkók egagko' xa, wánxa antehek negásenneykekxa m'a Dios, aptaha nak apnakxátekháseyam cha'a apkeletsapma axta. 10Ẽlmeyókek axta negko'o Dios keto' neletsapmakxa, hẽlmeyok sat makham. Magya'ásekmok nahan peya hẽlmeyok cha'a negko'o Dios, 11cham'a sempasma enxoho kéxegke sẽlmaxnésesa. Apxámok agkok énxet sẽlmaxnéseso negko'o, apxámok sat nahan etnehek énxet apméso ekpayheykekxa apwáxók Dios eñama nenxawé m'a aksok eltakmela eleñama nak Dios.
Pablo memhéyak Corinto
12Yetneyk negko'o xama aksok segmésa nak ekpayheykekxa egwáxok, cham'a negya'áseykegkoho nak negko'o ektakmalma cha'a nentémakxa, tén han mampósamo cha'a nentémakxa keso náxop, ekyagwánxa agkok ma'a nentémakxa nak cha'a negko'o kélnepyeseksa kéxegke. Háwe negko'o sempékesáseyak ma'a ektémakxa nak negya'ásegwayam egagko', wánxa sempékesáseyak ma'a Dios segásekhayo nak. 13Mantahak negko'o nentáxéseso kéxegke m'a megkólmowánal'a kólyetsetek, tén han ma'a megkólmowánal'a kólya'asagkohok. Emenyék ko'o kólya'ásegwomhok ektakmela agko' kéxegke xa, 14ekhawo ektahakxa nak nekha kélya'áseyak nentémakxa negko'o, apkexyekmek sat agkok Wese' egegkok Jesucristo kalpayhekxak sat kélwáxok kéxegke negko'o eñamakxa, kalpayhekxak sat nahan negko'o xa egwáxok kéxegke eñamakxa.
15Xeyenmék axta ko'o ewáxok atnehek sekxo' meyk'a kéxegke, hakte nakso' ektemesásak ektéma kéxegke xa, yakwayam enxoho nahan katnehek ánet sekteme meyk'a kéxegke, keñe nahan kalpayhekxak kélwáxok kéxegke; 16xénchek axta ko'o ewáxok atnehek sekxo' meyk'a kéxegke sekmahágko enxoho m'a Macedonia.#Hch 19.21. keñe sat sexyekmo enxoho atnehek makham meyk'a kéxegke, keñe sat kéxegke helpasmok yakwayam alenxanmohok sekxega amhagkok ma'a Judea. 17¿Xénchek enxoho axta eykel'a ko'o ewáxok atnésesha aksa selané, cham'a sekmoko axta alának xa? ¿Kélanagkamcheya kéxegke axámáseykha ektémakxa nak cha'a selaneykekxa yakwánxa atnehek, sektaha enxoho cha'a sekpeywa “nakso'”, tén han “ma'”, cham'a sekhéyásawo enxoho mók sekteme sekpeywa xa? 18Dios akke aptaha apya'áseykegkoho mantéma cha'a negko'o agának kéxegke “nakso'”, tén han “ma'”, cham'a neghéyásawo enxoho mók nenteme nempeywa xa. 19Hakte Cristo Jesús aptaha nak Dios Apketche, cham'a nenxeyenma nak cha'a negko'o neltenneykencha'a Silvano, tén han Timoteo tén han ko'o,#Hch 18.5. mantemék cha'a negko'o “nakso'” tén han “ma'” cham'a neghésamo nak mók nenteme nempeywa xa. Cristo eyke apteme “nakso'” apkeñama Dios, 20Cristo nahan keñamak eksawhomáxkoho ektéma m'a apxeyenma axta elának Dios. Ekeso eñamakxa nentéma nak cha'a nempeywa neltemésesa enxoho apcheymákpoho Dios se'e: “Katnahagkok sat” eñama m'a Cristo Jesús. 21Dios aptaha segyennaktéseso nenteme magya'áseyam negko'o tén han kéxegkáxa, cham'a segyepetcháseykxo axta Cristo, entemésesek axta anhan nelpagkanamaxche. 22Ẽlkahásek axta anhan negko'o m'a apkelkahaso nak, empekkenchesek axta negko'o egwáxok Espíritu Santo, yakwayam katnehek nakso' nenxawé aksok peya nak anxawa'.#Ef 1.14.
23Agkok amyákxak makham ma'a Corinto, cham'a ektahakxa axta ekxeyenma ewáxok, kéxegke axta eyke eyekak keytnakhohok kélwáxók, eltamhok nahan heñásesagkohok Dios megkatnaha enxoho ekmámnaksoho xa sektahakxa nak sekpeywa.
24Móltamhok negko'o óltennasagkohok kéxegke m'a eyéméxchexa nak kóltehek megkólya'áseyam; hakte yennakweykmek kéxegke kélteme megkólya'áseyam, egmenyék eyke ampasmok kéxegke, yakwayam enxoho kalpayhekxak kélwáxok.
Currently Selected:
2 CORINTIOS 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
