1 TIMOTEO 3
3
Eyéméxchexa etnehek énxet ektaha nak apxegkeso kélakneykekxexa
1Ekmámnaksoho agko' se'e: apmenyék agkok etnehek énxet apxegkeso kélakneykekxexa, apmenyék elának aptamheykha ektakmela. 2Ekeso eñamakxa eyéméxko nak etnehek meyke kélxéncháseykekxoho aptémakxa énxet ektaha nak apxegkeso kélakneykekxexa, kéméxchek etnehek wánxa xama aptáwa, etnehek nahan apmopwána apkeláneykegkoho aptémakxa, etnehek nahan ekha apya'áseykegkoho, etnehek nahan ektakmela aptémakxa. Kéméxchek cha'a emok takha' pók exnésók ma'a apxagkok; kéméxchek nahan etnehek ma'a apmopwána nak elxekmósek apnámokkok; 3megkatakmelak etnehek ma'a anmenáto nak, megkatakmelak nahan etnehek ma'a megyéso nak elwok, akke tásek etnehek ma'a ektakmeleykha nak apwáxok, tén han etnehek meyke ektahakxa apwáxok, tén han ma'a megkaxéneykha nak apwáxok selyakye. 4Kéméxchek nahan etnehek ma'a apmopwána nak apkelmeykha ekheykha nak apxagkok, etnésesek nahan apketchek ekha apkelyaheykekxoho, tén han ekha elnawagko. 5Hakte mopwanchek agkok apkelmeykha énxet ma'a ekheykha nak apxagkok, ¿háxko katnehek yepwának nahan eltakmelchesek ma'a Dios énxet'ák apagkok nak? 6Ekeso eñamakxa megkapayhawo nak etnehek énxet apxegkeso kélakneykekxexa m'a kaxwé apyakmagkaso nak apwáxok, hakte kayeykhágwomhok katnehek eyeymáxkoho apwáxok, keñe kaxhok apsexnánemap ma'a ektahakxa axta eksexnánémaxche kelyekhama'. 7Kéméxchek nahan keytek kéláyo nepyeseksa m'a énxet'ák metné nak mey'áseyam Cristo, yakwayam enxoho megkamassegwomek ma'a ektémakxa nak kéláyo, tén han megkamhek ma'a kelyekhama' elhanma nak.#Tit 1.6-9.
Eyéméxchexa etnehek énxet ektaha nak appasmeykha kéltamheykha kélakneykekxexa.
8Hawók nahan ma'a énxet ektaha nak appasmeykha kéltamheykha kélakneykekxexa, kéméxchek etnehek ma'a énxet ekha nak kéláyo, metnehek ma'a apmopwána amya'a nak, metnehek nahan ma'a apyeykhásamákpoho nak apya anmen, metnehek nahan ma'a ekmaso nak aptémakxa yepmenyéhok selyakye, 9kéméxchek etnehek ma'a meyenseyam nak amya'a ekmámnaksoho sẽlxekmósama axta negko'o, cham'a magya'ásekmo nak, etnehek nahan megkay'áseyam apwáxok. 10Kéméxchek kóllanok sekxo' apkeltémakxa m'a yakwayam nak kóltemésesek appasmeykha kéltamheykha kélakneykekxexa, méko agkok kélxéncháseykekxoho apkeltémakxa, kélwanchek sat kóltemésesek appasmeykha kéltamheykha kélakneykekxexa. 11Hawók nahan ma'a kelán'ák apnakteyegka'a nak énxet'ák appasmeykha nak kéltamheykha kélakneykekxexa, kéméxchek nahan katnehek ekha kéláyo, háwe m'a eltennágwayam naksa nátegma, kéméxchek nahan katnehek ma'a ekmowána nak elaneykegkoho ektémakxa, tén han ma'a megkayenseyam nak elané ekyókxoho ektamheykha ektakmela. 12Enxet appasmeykha nak kéltamheykha kélakneykekxexa, kéméxchek etnehek wánxa xama aptáwa tén han ey'asagkohok apkelmeykha m'a apketchek tén han ma'a ekheykha nak apxagkok. 13Hakte énxet'ák appasmeykha nak kéltamheykha kélakneykekxexa ektaha nak apkeltakmelchesamo apkeltamheykha, étak ma'a yakwayam nak kóltehek kéláyo, yetlo megkatnaheykha apwáxok nahan exének ma'a ektémakxa nak mey'áseyam Cristo Jesús.
Senxekmósamo ektaha ekmámnaksoho m'a ektémakxa nak nelpeykesamo Dios.
14Emenyék atyánegwakxohok heykxa exchep, wánxa agkok ektáxésesek eyke exchep se'e weykcha'áhak nak 15yakwayam enxoho ey'asagkohok xép ma'a nentémakxal'a nepyeseksa Dios énxet'ák apagkok, ektaha nak Dios megyetsapma énxet'ák apagkok, cham'a énxet'ák appasmoma nak apmasma m'a amya'a ekmámnaksoho nak, cham'a sekyeykhasa enxoho yakwánxa awatak xa. 16Nakso' ektaha ektakmela agko' ma'a amya'a ekmámnaksoho senxekmósama axta eñama s'e ektémakxa nak nelpeykesamo Dios:
Apheyásamákpók axta énxet Cristo,
apmallanmeyk axta eñama apteme espíritu,
apwetayak axta nahan Dios apkelásenneykha.
kéllegasegkek axta apwesey ekyókxoho yókxexma,
kéltemegkek axta megkólya'áseyam keso náxop,
kélya'áseykekxeyk axta nahan ma'a néten
aphamakxa nak Dios ekha apcheymákpoho.
Currently Selected:
1 TIMOTEO 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
