1 TIMOTEO 4
4
Enxet'ák yakwayam nak elwátesagkok apteme melya'áseyam
1Tásek apxeyenma Espíritu peya elwátesagkok aptamheyak melya'áseyam nápakha énxet'ák ektemegwánxa sat néxa ekhem, apkelyetlákxo sat ma'a espíritu sẽlyexancháseykha nak, tén han apkelyetlákxo enxoho m'a nelxekmowásamáxche eñama nak kelyekhama'. 2Elyahakxohok sat aptahakxa apkelpeywa m'a énxet'ák apkelmeyókásamákpoho nak apkeltémakxa, tén han ma'a énxet'ák apkelmopwancha'a amya'a nak, cham'a ekyennaktama nak ektémakxa elchetamso apwáxók eñama m'a aksok ekmaso apkeláneyak nak, máxa entemék ma'a elkahásamáxko enxoho xama sawo ekyentaxno. 3Megyohók cha'a antegyek entáwa xa énxet'ák nak. Megyohók nahan cha'a antók ma'a mók xama aksok nentamakxa nak, ektaha axta Dios apkelané yakwayam enxoho etawagkok ma'a énxet'ák apteme nak melya'áseyam, tén han etawagkok ma'a énxet'ák ektaha nak apkelya'áseykegkoho m'a amya'a ekmámnaksoho nak, egkések nahan ekpayheykekxa apwáxok Dios eñama xa aptéyak nak. 4Hakte ekyókxoho aksok ektaha axta Dios apkelané ekteme ektakmela; méko katnehek nentaknaweykxa xama aksok enxoho, cham'a nentawa enxoho yetlo negméso ekxeyenma egwáxok Dios. 5Hakte Dios appeywa ekteméseso ektakmela xa nento nak, tén han ma'a nempeywa nelmaxnagko nak.
Ektakmela nentémakxa nenteme Jesucristo apkeláneykha
6Apkelxekmósek agkok xép ẽlyáxeg'a xa ektéma nak, appekkenchek agkok nahan apwáxok xép ma'a amya'a eñama nak magya'áseyam, tén han apkelenxanakmoho enxoho apkelané m'a nelxekmowásamáxche ektakmela nak, etnehek sat xép Jesucristo apkeláneykha ektakmela aptémakxa.
7Nágyeyxho aksa exchep kéltenneykha amya'a eñama nak keso náxop, tén han ma'a amya'a ekyéháxmal'a. Eltámesap xép ma'a nentémakxal'a nempagkanchásamáxche Dios. 8Awanchek eykhe hempasmok xa nelyelaktésamaxche nak, akke ekyagwánxa agko' ekmowána hempasmok ma'a nempagkanchásamáxche nak Dios, cham'a ekyókxoho aksok nenlanakxa enxoho, hakte cháxa sempasma nak yakwayam katakmelek negha keso negwánxa nak, tén han peya hempasmok ma'a egmonye sat. 9Ekmámnaksoho agko' se'e, kéméxchek magya'ásók negyókxoho nak. 10Cháxa keñamak neltamheyncha'a nak negko'o xa, tén han nelwaskápeykxoho, hakte nentemék axta nengko'o negásenneykekxa m'a Dios memassegwayam nak, aptaha nak sẽlwagkaso teyp negyókxoho, ekyagwánxa agkok elwagkasek cha'a teyp ma'a énxet'ák apteme nak melya'áseyam.
11Yána sat kólyahakxohok xép se'e amya'a nak, elxekmós nahan. 12Neygyoho aksa kólwanyohok xép eñama apteme apketkok. Wánxa agkok kéméxchek xép etnehek ektakmela appeywa yakwayam enxoho elyetlakxak ma'a énxet'ák apteme nak melya'áseyam, tén han etnehek ektakmela aptémakxa, tén han keytek xép ma'a apchásekhayo nak, tén han keytek xép ma'a mey'áseyam nak, tén han etnehek eyáxñeyo aptémakxa. 13Elyetset cha'a exchep ektémakxa nak eknaktáxésamaxche tásek amya'a nepyeseksa énxet'ák, etnéses nahan ekmayheykegkoho apwáxok ẽlyáxeg, elxekmós nahan ekwokmoho sekwakto ko'o. 14Etakmelches xép ma'a apmopwána apmésa axta exchep Dios, cham'a apnegkena axta apmék apkátek xép ma'a apkelámha apmonye'e nak kélakneykekxexa, eñama apteméseso m'a Dios.
15Ná eyensem apkelané exchep xa aptamheykha nak, yakwayam enxoho étak apyókxoho énxet ekyágwokmoho exchep apkelenxányam. 16Etakmelchesakpoho cha'a exchep, etakmelchesho nahan cha'a m'a ektémakxa nak apkelxekmóso apnámokkok, elenxanmoho apwaskápeykekxoho eñama apkelané ekyókxoho xa, aptemék agkok xép xa, ewagkasakpohok sat apagko' teyp xép, elwagkasek sat nahan teyp ma'a énxet'ák ektaha nak apháxenmo apkeltenneykha exchep.
Currently Selected:
1 TIMOTEO 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
