1 TIMOTEO 2
2
Nelmaxnéseso apyókxoho énxet
1Eyeynókxa, eltennásek ko'o kéxegke seltamho kólmaxnésesek apyókxoho énxet'ák, kólána epasmok Dios, kólmaxnéses nahan yakwayam enxoho elmeyók Dios, kólmés nahan ekpayheykekxa kélwáxok Dios eñama appasmo m'a apyókxoho énxet'ák nak. 2Kéméxchek kólmaxnésesek kéxegke apyókxoho kelwese'e apkeláneykha nak apchókxa, tén han ma'a apyókxoho apkelámha apmonye'e nak, yakwayam enxoho katakmelhok negheykha, tén han megkatnegwomóxma negheykha, tén han antehek nempagkanchásamáxche egagko' ma'a Dios, tén han antehek ektakmela nentémakxa nápakta'awo' énxet'ák. 3Cháxa ektakmela nak antehek xa, kalkohok nahan apwáxok Dios antehek xa. 4Hakte apmenyék Dios ólwagkasaxchek teyp negyókxoho nak, apmenyék nahan agya'ásegwók ma'a amya'a ekmámnaksoho nak. 5Hakte wánxa xama Dios, wánxa nahan xama énxet apmopwána nak épetchásekxak Dios apyókxoho énxet'ák: cham'a Jesucristo. 6Hakte apmeyáseykpók axta apagko' Jesucristo yakwayam emátog yakwayam etnehek segyanmaga eñama nelwagkásamáxche teyp negyókxoho#Mt 20.28; Mr 10.45; Gá 1.4; Tit 2.14. nak, cham'a senxekmósama axta Dios ekwokmo axta ekhem yakweykenxa katnehek ma'a aptémakxa axta appeywa. 7Axta keñamak selyésáxko axta ko'o yakwayam atnehek seltenneykha tásek amya'a, tén han atnehek seykha amya'a, eyáneyaxchek axta anhan ko'o alxekmósek énxet'ák metnaha judíos ma'a eñama nak magya'áseyam, tén han ma'a amya'a ekmámnaksoho nak. Nakso' xa sektahakxa nak ko'o sekpeywa; háwe sekmowána amya'a.#2 Ti 1.11.
8Emenyék ko'o etnahagkok nempeywa nelmaxnagko énxet apheykha nak ekyókxoho yókxexma, tén han elya'aksek néten apmék yetlo eyáxñeyo apwáxok nápakto' Dios, meyke m'a nenlo nak, tén han meyke m'a nelátegmomaxche nak. 9Emenyék ko'o kawagkohok elnáxameykha kelán'ák yetlo ektakmelchesamo elnáxameykha, meyke m'a ekyeykhásamáxkoho nak elnáxameykha, tásek kólennáxamha, háwe eyke yetlo m'a kélyeykháseykegkoho nak kélnáxegkáseykha kélwa', háwe nahan yetlo m'a sawo ekyátekto elyenmál'a, tén han ma'a aksok ekmomnáwa nak, esenhan ma'a apáwa apkelmomnáwa nak,#1 P 3.3. 10tásek katnahagkok ektakmela ektémakxa kelán'ák, ekhawo m'a eyéméxchexa nak katnehek kelán'ák ektaha nak ekpagkanchásamáxche Dios. 11Kéméxchek kalwanmeyagkok aksa kelán'ák keyxhok ma'a nelxekmowásamáxche nak, yetlo megkátegmoweyak ma'a ektahakxa enxoho amya'a. 12Momenyék ko'o kalxekmósek kelán'ák énxet'ák ma'a kañe' apchakneykekxexa nak, momenyék nahan katnehek ekyeykhágweykmoho énxet'ák apkelennay'a nak; emenyék ko'o kalwanmeyagkok aksa kelán'ák, 13hakte apmonye axta apkelané Dios Adán#Gn 2.7. keñe axta axayo' apkelané Eva.#Gn 2.21-22. 14Háwe axta kélyexancháseykha Adán, kelán'a axta eyke kélyexancháseykha, xama axta kélyexancháseyncha'a Eva, kelanak axta megkay'asáxma.#Gn 3.1-6. 15Kalwagkasaxchek sat eyke teyp kelán'ák eñama ekweté étchek, cham'a elenxanakmoho enxoho ekteme megkalya'áseyam yetlo elya'áseykegkoho, tén han elenxanakmoho enxoho m'a eyásekhayo nak, tén han elenxanakmoho enxoho ekteme ekpagkanchásamáxche m'a Dios.
Currently Selected:
1 TIMOTEO 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
