1 TESALONICENSES 4

Nentémakxa ekleklamo nak apwáxok Dios.

1Elyáxeg, neltennásek negko'o kéxegke yetlo nenxeyenma apwesey Wese' egegkok Jesús neltamho kóllenxanmohok kéllané m'a nentahakxa axta nelxekmóso kéxegke, yakwayam enxoho kalkohok apwáxok Dios kéltahakxa (ekhawo xa kéltahakxa nak).

2Kélya'ásegkok kéxegke neltamhókxa axta kóltehek eñama m'a apkeltémókxa nak antehek Wese' egegkok Jesús. 3Apmenyék Dios kóltehek kélpagkanchásamáxche kéxegke wánxa m'a Dios, mopmenyék kóllának kélxama kéxegke ekmaso nak nentémakxa mansexta, 4apmenyék nahan Dios agya'asagkohok negko'o nentémakxa nentakmelchásamáxkoho xamo' entáwa, cham'a nentémakxal'a nápakto' Dios, tén han ma'a nentémakxal'a nápakta'awo' énxet'ák, 5háwe m'a negyeykhásamáxkoho nak negmáheyo anlának aksok, tén han ma'a aksok ekmaso negyespagko nak, ekhawo aptamheykegkaxal'a énxet'ák melya'áseyak nak Dios. 6Nágkóltawasagkoho aksa kélmók kólmawho kóltemesesamhoxma aptáwa eñama kéllané xa ektéma nak mansexta, hakte kayhek cha'a katnehek senlegasáseykegkoho Wese' egegkok eñama nenlané ekyókxoho xa, ekhawo m'a nentahakxa axta neláneya kéxegke. 7Hakte axta hẽlwóneyha negko'o Dios yakwayam antehek ekmanyása nentémakxa, wánxa apkeltémo antehek wánxa nempagkanchásamáxche m'a Dios. 8Kéxegke ektahakxa enxoho kéltaknagko s'e nelxekmowásamáxche nak, megkóltaknaweyk xama énxet, wánxa kéltaknawé m'a Dios aptaha axta apméso kéxegke Espíritu Santo apagkok.

9Megkeymexchek ko'o atáxésesek kéxegke ektémakxa nak nelásekhamaxkoho nepyeseksa ẽlyáxeg nentémo xamo' nak magya'áseyam, hakte Dios apagko' axta apkelxekmóso kéxegke ektémakxa nak kélásekhamaxkoho. 10Cháxa kéltémakxa nak cha'a kéxegke nepyeseksa m'a apyókxoho ẽlyáxeg'a apheykha nak ekyókxoho yókxexma Macedonia. Ẽlyáxeg, neltamhok negko'o kólyánchesagkohok xa ektémakxa nak kélásekhamaxkoho. 11Kólenxánem cha'a kóltehek meyke kéltémakxa neyseksa kélha, kóllána cha'a m'a aksok ekpehewayam nak kéllané, kóltemeykha cha'a ekhawo nentahakxa axta neláneya kéxegke, 12yakwayam enxoho etnehek apcháyo m'a énxet'ák apkeleñama nak mók nekha, yakwayam enxoho nahan keytek kéxegke ekyókxoho aksok.

Wese' egegkok apkexyeyam sat

13Ẽlyáxeg, egmenyék negko'o kólya'asagkohok kéxegke ektémakxa m'a énxet'ák apkeletsapma axta, yakwayam enxoho megkallapwomagkek kéxegke ekhawo ektamheykegkaxa nak ma'a énxet'ák melhaxanma nak yakwayam exnamhok xamo' Dios. 14Magya'áseykmok negko'o apketsapma axta Jesús tén han ma'a apxátekhágweykmo axta, ékeso eñamakxa magya'ásekmo nak han peya enakxátekhásók Dios xamo' Jesús ma'a énxet'ák apkeletsapma apteme axta melya'áseyam Jesús.

15Neltennásek negko'o kéxegke s'e nelxekmowásamáxche eñama nak Wese' egegkok, negko'o nenteme nak negheykha ekweykmoho apweyktamxa Wese' egegkok, mehẽltemésesek sat egmonye'e negko'o. Sat eyke kóltemésesek apmonye'e m'a énxet'ák ektaha axta apkeletsapma. 16Hakte kañexchek sat ekyennakte kélpeywa, kañexchek sat nahan appeywa m'a apkemha apmomye Dios apchásenneykha, kañexchek sat nahan ekpáwá kélakkahaso eñama nak Dios, Wese' egegkok apagko' sat eweywentak apkeñama m'a néten, apmonye'e sat nahan enakxátekhágwók énxet'ák apkeletsapma apteme axta melya'áseyam Cristo. 17Keñe sat negko'o nelyenna nak hẽnnaklakxohok xamo' neyseksa yaphopé xa énxet'ák nak, yakwayam enxoho antahanyohok Wese' egegkok ma'a néten, keñe sat anxek xamo' Wese' egegkok megkatnegwayam enéxa.#Mt 24.30-31; Mr 13.26-27; 1 Co 15.51-52. 18Kóllánesekxa' cha'a apwáxok kélmók eñama s'e amya'a nak.

Currently Selected:

1 TESALONICENSES 4: LEGN

Highlight

Copy

Compare