1 TESALONICENSES 3
3
1Axta alenmaxexchágwokmok ahagko' ko'o, ékeso eñamakxa seyamenyého axta ko'o axnekxak exakko' ma'a tegma apwányam Atenas,#Hch 17.15. 2egyáxeg Timoteo axta eyke eyáphásak ko'o, aptaha nak han sempasmo nenlané nentamheykha eñama nak Dios, cham'a ektémakxa nak nenlegaso amya'a ektakmela ekxeyenma nak Cristo. Eyáphásek axta ko'o xa egyáxeg nak, yakwayam enxoho etnehek meyk'a kéxegke, tén han elyennaktésesek kélteme megkólya'áseyam, tén han yának kóllenxanmoho, 3yakwayam enxoho anhan megkaleklágwomek kélxama kéxegke m'a ektémakxa nak kéllegeykegkoho. Hakte kélya'ásegkok kéxegke megkatnehek manlegeykegkoho xa. 4Neltennásek axta eykhe peya agwetak negko'o nenlegeykegkoho, cham'a, neyseksók negheykha axta kélnepyeseksa kéxegke, entemék axta negko'o xa, cháxa ektahakxa nak kélya'áseykegkoho kéxegke. 5Axta alenmaxexchágwokmok ektahakxa ewáxok. Ekeso eñamakxa seyáphasa axta Timoteo yakwayam etegyaha amya'a ektémakxa megkólya'áseyam kéxegke, hakte tamháha axta ko'o ewáxok kalyekkónek kéxegke kelyekhama', keñe m'a nentamheykha nak negko'o katnégwók eyakhémo.
6Kaxwo' eyke, apwakteyk Timoteo apkenyekto m'a tegma apwányam Tesalónica,#Hch 18.5. ensántegkesek axta negko'o amya'a ektakmela ektémakxa megkólya'áseyam kéxegke, tén han ektémakxa kélásekhamaxkoho ekyetna nak kélnepyeseksa kéxegke. Ẽltennásakteyk axta megkamassegweykmo exnek cha'a ekxeyenma kélwáxok negko'o yetlo segásekhayo, tén han kélmáheyo kélagko' hek hẽlwetekxak makham negko'o, ekhawo ektémakxa nak han negko'o xa negmáheyo ólwetekxak kéxegke. 7Elyáxeg, cháxa keñamak ekyawa nak negko'o ekpayheykekxa egwáxok negya'ásegwokmo megkólyensakmo kélteme megkólya'áseyam kéxegke, neyseksók eykhe ekyentaxno negheykha, tén han ma'a ektémakxa nak nenlegeykegkoho. 8Máxa axta entahak nelyennákxoho enxoho negko'o nenleg'a amya'a kélyennaktésawo kélteme megkólya'áseyam kéxegke m'a Wese' egegkok. 9Awanhok agko' negko'o negméso ekpayheykekxa egwáxok Dios kéxegke eñamakxa, tén han eñama m'a ekyawe ekpayheykekxa egwáxok ekyetna nak negko'o nápakto' Dios kéxegke eñamakxa. 10Nelmaxnakkek cha'a negko'o Dios ekyókxoho ekhem tén han ekyókxoho axta'a yakwayam enxoho heghok ólwetekxak kéxegke, tén han agyanchesesagkohok kélteme megkólya'áseyam, cham'a eyéméxchexa nak makham kóltehek megkólya'áseyam kéxegke.
11Egmenyék negko'o hempasmok Dios Egyap, tén han Wese' egegkok Jesús, yakwayam enxoho agkegwának antehek meyk'a kéxegke, 12Wese' egegkok sat eyanchesesagkohok makham kélteme kélásekhamaxkoho, tén han eyanchesesagkohok kélásekhayo m'a apyókxoho énxet'ák nak, ekhawo ektémakxa nak nelásekhayo negko'o kéxegke. 13Wese' egegkok sat nahan elwaskakkasek kélwáxok kéxegke, etnésesek sat nahan kélpagkanamaxche, tén han etnésesek kéxegke meyke kélxéncháseykekxoho kéltémakxa nápakto' Dios Egyap, cham'a apwa'akto sat Wese' egegkok Jesús yetlo m'a apyókxoho ektaha nak énxet'ák apagkok. Katnahagkok sat.
Currently Selected:
1 TESALONICENSES 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
