1 TESALONICENSES 5
5
1Elyáxeg, méko katnehek matáxésesek kéxegke ekhem yakwánxa nak katnehek xa. 2Kélya'ásegkok ektakmela kéxegke yakwánxa nak katnehek apweykta Wese' egegkok, ewatak sat neyseksa megkólhaxneykha, ekhawo ektémakxal'a énxet apmenyexma ewak axta'a.#Mt 24.43; Lc 12.39; 2 P 3.10. 3Aptemék sat agkok apkelpeywa énxet'ák se'e: “Méko ektahakxa negheykha”, keñe sat katlakkasek aksa kawak kélmaseseyam xa énxet'ák nak, ekhawo ektémakxal'a káskok awáxok kelán'a#Is 13.8. amonye ektegkeso étche; mopwanchek sat nahan elegketakpok xa énxet'ák nak. 4Elyáxeg, akke kólháha kéxegke neyseksa ekyaktesóxma, ékeso eñamakxa peya nak metaxnegwátamok Wese' egegkok ektémol'a kóltaxnegwakxohok apmenyexma, cham'a ekwokmo sat ekhem apweyktamxa Wese' egegkok. 5Kélyókxoho kéxegke kélteme kéleñama neyseksa elseyexma tén han neyseksa ekteyapma ekhem. Háwe negko'o neleñama axta'a, háwe anhan neleñama neyseksa ekyaktesóxma; 6Ekeso eñamakxa eyéméxko nak negko'o mannaktének, mantehek ma'a aptamheykegkaxa nak énxet'ák apnakteyenmo nak. Tásek mannaktének negko'o, tén han antehek ekha negya'áseykegkoho. 7Enxet'ák ektaha nak apnakteyenmo, axta'a cha'a enaktének, keñe m'a énxet'ák ennapmo nak anmen, axta'a cha'a kannápok anmen. 8Keñe negko'o neleñama nak neyseksa ekteyapma ekhem, tásek cha'a antehek ekha negya'áseykegkoho. Kéméxchek negko'o agahakkasaxchek ma'a magya'áseyam nak tén han ma'a negásekhayo nak, keñe ótchesek empátek ma'a nelhaxanma nak yakwayam ólwagkasaxchek teyp#Is 59.17; Ro 13.12; Ef 6.13-17. ektémol'a sẽlpextétamo apketcheso apkátek. 9Hakte axta hempagkanmak negko'o Dios yakwayam henlegásesagkohok, wánxa agkok, empagkanchek axta yakwayam anxawak nelwagkásamáxche teyp eñama m'a Wese' egagkok Jesucristo. 10Apketsekkek axta Jesucristo negko'o eñamakxa, yakwayam enxoho anxek xamo', megkeyxek ma'a nétsapa enxoho esenhan ma'a mótsapa enxoho. 11Ekeso eñamakxa, kólyáteyaxkoho cha'a yetlo kélwaskápeykekxoho, ekhawo xa kéltahakxa nak kaxwo'.
Pablo apméso appeywa ẽlyáxeg.
12Elyáxeg, neltamhok negko'o kóltehek kéláyo m'a énxet'ák ektaha nak apkeltamheykha kélnepyeseksa kéxegke, cham'a apxegkeseso nak kélakneykekxexa, cham'a apkeltennáseykegkoho nak han eyéméxchexa nak kóltehek eñama Wese' egegkok. 13Kéméxchek cha'a kóltehek kéláyo tén han kólyáncheshok kélásekhayo xa énxet'ák nak eñama apkeláneyak ma'a apkeltamheykha nak. Kólteme meyke kéltémakxa xamo' kélnámokkok.
14Elyáxeg, neltamhok nahan negko'o kólmések kélpeywa kéxegke m'a énxet'ák memáheyo nak eltemeykha, neltamhok nahan kólyáteyagkohok ma'a énxet'ák ektaha nak elleklámeyak, neltamhok nahan kólpasmok ma'a énxet'ák eyéméxko nak kólpasmok, neltamhok nahan kóltehek megkólpekhésamaxche nepyeseksa m'a apyókxoho énxet'ák nak.
15Nágkólho aksa exnéshok mók kéltemésesakxa ekmaso énxet. Kóllenxánem cha'a kóltehek kéltémakxa ektakmela kélnepyeseksa kéxegke, tén han nepyeseksa m'a apyókxoho énxet'ák nak.
16Kalpayhekxa' cha'a kélwáxok.#Flp 4.4. 17Kólteme cha'a nempeywa nelmaxnagko. 18Kólmés cha'a ekpayheykekxa kélwáxok Dios eñama m'a ekyókxoho ektahakxa enxoho kéxegke, hakte cháxa apkeltémókxa nak kóltehek kéxegke Dios xa, kéxegke kélteme nak megkólya'áseyam Cristo Jesús.#Flp 4.6; Col 4.2-7.
19Nágkólya'és exma yakwánxa etnehek Espíritu Santo. 20Nágkóltaknawáses aksa apkeltenneykha amya'a m'a énxet'ák apkelxeyenma nak ektaha eñama Dios ma'a apkeltenneykha. 21Kóltakmelchesho sekxo' cha'a kélyekpelchágweykmoho ekyókxoho amya'a ekxénamaxche nak ektaha eñama Dios, kólma cha'a m'a ektakmelakxa enxoho. 22Kólyetnakhes ekyókxoho ektémakxa nak nentémakxa ekmaso.
23Nelmaxnakkek negko'o Dios segmésamol'a cha'a meyke ektahakxa egwáxok, neltamho etnésesek kéxegke kélpagkanamaxche kélagko', tén han etakmelchesesek ma'a kéltémakxa nak, tén han etakmelchesesek ma'a espíritu kélagkok, tén han ma'a kélhagák nak, tén han etakmelchesesek ma'a kélyókxa, tén han etnésesek meyke kélxéncháseykekxoho kéltémakxa xama enxoho, cham'a apkexyekmo sat Wese' egegkok Jesucristo. 24Mehegyenyawha cha'a m'a ektaha axta apkelwóneykha kéxegke, esawhohok sat nahan elának xa.
Ekxeyenma egwáxok tén han ektahakxa néxa nenxeyenma aksok eltakmela eleñama Dios
25Elyáxeg, hẽlmaxnéses nahan cha'a negko'o xa.
26Kólpeykes apyókxoho elyáxeg yetlo ektakmeleykha kélwáxok.
27Eltennásek ko'o kéxegke seltamho kólyetsetchesek apyókxoho ẽlyáxeg se'e weykcha'áhak nak, yetlo sekxeyenma ektémakxa nak selyaheykekxoho eñama Wese' egegkok.
28Jesucristo Wese' egegkok sat etnehek apméso naksa kéxegke m'a ektémakxa nak segemleykekxoho.
Currently Selected:
1 TESALONICENSES 5: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
