1 TESALONICENSES 2
2
Pablo aptamheykha tegma apwányam Tesalónica
1Elyáxeg, kélya'ásegkok kéxegke megkatnaha eyakhémo nentéma axta negko'o meyk'a kéxegke. 2Kélya'ásegkok eykhe kéxegke ektémakxa axta anhan negko'o sẽlwanyémo m'a tegma apwányam Filipos,#Hch 16.19-24. ẽlnaktawáseykegkók axta anhan, Dios axta eyke empasmak negko'o yakwayam enxoho anlegaksek kéxegke tásek amya'a, yetlo meyke negaye, neyseksa ekyentaxno nennapmáxche.#Hch 17.1-9. 3Hakte méko axta negko'o magakhémo ektémakxa neltenneykha, axta nahan óltenneykha aksa yetlo ekmaso elchetamso egwáxok, axta nahan agmáheyok ólyexanchesha xama énxet enxoho. 4Leyawók axta eyke apwáxok nentahakxa negko'o Dios, egásennakkek axta yakwayam anlegaksek tásek amya'a, cháxa nentahakxa nak neltenneykha. Magketámak negko'o m'a ekleklamókxa nak apwáxok antehek énxet, wánxa negketámak negko'o m'a ekleklamókxa nak apwáxok antehek Dios#Gá 1.10. aptaha nak apkelanyo cha'a kañe' egwáxok. 5Kélya'ásegkok kéxegke, axta katakmeleykha cha'a nempeywa nenláneya yakwayam enxoho agyexaxkohok agámenyéhok selyakye kélagkok. Axta nahan antegyeykegkohok nentémakxa yakwayam agwetak xa. Dios akke apteme segwetayo mantéma negko'o xa. 6Axta anhan óltémók negko'o hegáwhok énxet, axta anhan óltémók hegáwhok kéxegke, tén han ma'a pók énxet'ák nak. 7Egwanchek axta eykhe agyennaktésaxkohok negko'o agásenneykxa ma'a ektémakxa nak sẽlyaheykekxoho, nenteme nak Cristo seykha amya'a apagkok, wánxa agkok, negheyásexkók axta eyke sakcha'a kélnepyeseksa kéxegke, negheyásexkók axta nahan ma'a ektémakxal'a kelán'a éktegkeso étchek, cham'a kelán'a eltakmelchesol'a étchek, 8cháxa nentemésesamakxa nak han kéxegkáxa xa, yetlo ekyawe nelásekhayo negko'o kéxegke, háwe axta ekwánxa agkok negmámenyého agmések kéxegke tásek amya'a eñama nak Dios, wánxa agkok egmenyék axta nahan magmeyágwakxék negyókxa yakwayam antekyok, kéxegke eñamakxa, hakte awanhok agko' negko'o nelásekhayo kéxegke. 9Elyáxeg, kélya'ásegkok kéxegke ektémakxa axta negko'o nentamheykha, nenlenxaneykmók axta yakwayam antókasaxchek.#Hch 18.3; 2 Ts 3.8. Nentamheykha axta cha'a negko'o ekyókxoho ekhem tén han ekyókxoho axta'a, yakwayam enxoho manxámásesek kéltahakxa kélxama kéxegke neyseksa nenlegaso amya'a eñama nak Dios.
10Kéxegke kélteme kélwetayo nentéma axta negko'o ektakmela nentémakxa, tén han ekpéwomo nentémakxa, tén han meyke sẽlxéncháseykekxoho nak nentémakxa kélnepyeseksa kéxegke kélteme nak megkólya'áseyam. Dios nahan ektaha apwetayo nentéma negko'o xa. 11Kélya'ásegkok kéxegke neltamho axta kóllenxanmohok, tén han ma'a nelpeykesáseykekxo axta kélwáxok, ekhawo aptemésesamakxal'a apketchek énxet. 12Neltennásek axta kéxegke neltamho kóltehek eyéméxchexa nak antehek nenteme nak Dios énxet'ák apagkok, cham'a Dios ektaha axta apkelwóneykha kéxegke apkeltémo kawakxohok kélteme Wese' apwányam kélagkok ma'a Dios, tén han kawakxohok kéxegke m'a ektémakxa nak apcheymákpoho.
13Ekeso eñamakxa negmésa nak cha'a negko'o ekxeyenma egwáxok Dios, hakte xama axta kélleg'a kéxegke amya'a eñama Dios neltenneykha negko'o, ekmámnaksoho axta kéltemesásak kéxegke ektaha eñama Dios ma'a amya'a neltennásencha'a axta kéxegke, axta kaxénak kélwáxok ektaha apkeltenneykha apagko' la'a énxet. Nakso' agko' ektaha amya'a eñama Dios xa ektekkesama nak kéltémakxa ektakmela kéxegke kélteme nak megkólya'áseyam. 14Elyáxeg, xama axta kéllegágkoho kéxegke apmenxeneykha m'a kélpeywomo xamo' nak,#Hch 17.5. hawók axta ektahakxa kéxegke ektémakxa nak han Dios énxet'ák apagkok apheykha m'a yókxexma Judea, ektaha nak han Cristo Jesús énxet'ák apagkok. Kélmenxeneykha axta nahan xa énxet'ák nak, judíos xamo' axta apmenxeneykha. 15Cháxa énxet'ák judíos apchakhama axta anhan Wese' egegkok Jesús xa, ekhawo aptamheykegkaxa axta anhan apkennapma ma'a énxet'ák ektaha axta apkellegaso Dios appeywa, ẽlántekkesek axta anhan negko'oxa xa énxet'ák nak.#Hch 9.23,29; 13.45,50; 14.2,5,19; 17.5,13; 18.12. Megkésók ekpayheykekxa apwáxok Dios xa énxet'ák judíos, apyókxoho énxet nahan apkelenmexeykha. 16Negmokók agkok cha'a negko'o óltennasha amya'a eñama Dios ma'a énxet'ák metnaha nak judíos yakwayam enxoho nahan elwagkasakpok teyp, wánxa agkok, meheghók eyke cha'a énxet'ák judíos. Cháxa ektahakxa nak ekyeykhágwokmoho apteme melya'asáxma xa. Kaxwo' eyke, wa'ak yakwayam ellegásesagkohok ekmaso agko' Dios xa énxet'ák nak.
Pablo apmáheyo etnehek makham meyk'a énxet'ák apheykha nak Tesalónica
17Elyáxeg, xama axta negkexeykxo kéxegke yakwatakxoho, axta eykhe ólweteykekxak kéxegke, wánxa agkok, xéneykha axta eyke cha'a egwáxok, hakte egmenyék egagko' axta ólteyánegwakxohok kéxegke. 18Nenlenxáneykmek axta eykhe negko'o antehek meyk'a kéxegke, ko'o nak se'e Pablo, hágkaxwe axta eykhe amáwhok atnehek meyk'a kéxegke, wánxa agkok, Satanás axta eyke meheghayók antehek meyk'a kéxegke. 19Kéxegke kélteme eñamakxa negko'o nelhaxneykha, kéxegke nahan kélteme eñamakxa negko'o ekpayheykekxa egwáxok, kéxegke nahan kélteme eñamakxa nak negko'o ektakmeleykha egwáxok, kéxegke nahan kélteme sentakmelchesáseykekxa cha'a egwáxok. Kéxegke sat makham kañék negweté negko'o ekyókxoho xa, cham'a apwakto sat Jesucristo Wese' egegkok. 20Nakso', kéxegke keñamak ektakmeleykha nak egwáxok negko'o, tén han ma'a ekpayheykekxa nak egwáxok.
Currently Selected:
1 TESALONICENSES 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
