1 SAN PEDRO 4
4
Nenlané nentamheykha nápakto' Dios ekhawo m'a ektahakxa axta segméso negmowána
1Kéméxchek kéxegkáxa kólmawhok kóllegagkohok, ekhawo m'a ektahakxa axta aplegeykegkoho Cristo. Enxet ektahakxa enxoho aplegeykegkoho neyseksa apha makham, kamaskok apkelana mey'asáxma, 2wánxa aksa elának ma'a ektémakxa nak Dios apmopmenyého, kamaskok apkelana m'a ektémakxa nak aksok ekmaso negyespagko. 3Wenaktémók axta kéxegkáxa kéllané m'a apkeltémakxa nak énxet'ák melya'áseyak nak Dios, kélláneyak axta m'a aksok ekmaso kélyespagkamakxa nak, tén han ma'a aksok ekmaso kélmámenyého nak, anmenát'ák axta nahan kéxegke, kélyennegkesegkek axta anhan cha'a exma ektókaxchexa tén han ekyenáxchexa enxoho, kólyeykhasaxkohok axta cha'a kélyenéyak, kólpeykeshok axta nahan cha'a m'a aksok kéleykmáseso ekmaso agko' nak. 4Apkenatchesek kaxwo' apwet'a kéltahakxa kéxegke xa énxet'ák nak, hakte massék kélwehenákxoho m'a ektémakxa nak apkelyeykhásamákpoho apkeltémakxa ekmaso, sagkók nahan cha'a apkelxeyenma kéxegke xa énxet'ák nak. 5Ekeso eñamakxa peya nak exének nápakto' Dios ektémakxa aksok apkeláneyak xa énxet'ák nak, cham'a Dios appenchesama nak apkeláneykekxa aptahakxa yakwayam etnehek apkelyekpelchémo énxet'ák apkelyenna nak, tén han ma'a énxet'ák apkeletsapma axta. 6Weykmók axta anhan kéllegaso tásek amya'a m'a énxet'ák apkeletsapma axta, yakwayam enxoho epékesesagkok nahan Espíritu xa énxet'ák apkeletsapma axta, ekhawo m'a ektémakxa nak Dios apmopmenyého. Kéltemegkek axta eykhe kélyekpelchémo neyseksók apheykha keso náxop, ekhawo m'a kéltemésesamakxal'a cha'a apyókxoho énxet.
7Kólteme kéxegke kélmowána kóllanagkohok kéltémakxa, kólteme nahan cha'a ekmámnaksoho nempeywa nelmaxnagko, hakte chágketwokmek yakwánxa nak kalmassegwók ekyókxoho aksok. 8Akke ekyagwánxa agkok ektakmela keytek kélnepyeseksa kéxegke m'a ekyawé kélásekhamaxkoho nak, hakte nelásekhamaxkoho cha'a kañék meyakmagkáseykekxa Dios nentémakxa mólya'asáxma.#Pr 10.12; 1 Co 13.7. 9Kólma cha'a takha' kélmók apwokmo enxoho kélxagkok meyke kélpakmeteykha xama enxoho.#Ro 12.13. 10Kéméxchek cha'a kólmaha kéxegke yakwayam kólpasmok kélmók ma'a kélmowána kélxawé axta eñama Dios, ekhawo apkeltémakxal'a énxet'ák apkeltakmelchesamo nak apkelmeykha m'a apkelmopwancha'a apkelxawéyak axta eñama Dios. 11Apkeltennáha agkok xama énxet, kéméxchek katnehek apkeltenneykha m'a ektémakxa nak Dios appeywa, apkelanak agkok aptamheykha xama énxet kéméxchek yásenneykxak ma'a apwaskápeykekxoho ektaha nak apméso Dios. Ekyókxoho aksok kéllanakxa enxoho, kóllána' cha'a yakwayam enxoho kóltemésesek apcheymákpoho Dios eñama m'a Jesucristo, cham'a Dios aptaha nak apagkok ma'a apcheymákpoho nak, tén han ma'a ektémakxa nak apmopwána megkatnegwayam enéxa. Katnahagkok sat cha'a.
Nenlegeykegkoho nenteme nak negyetlo Cristo
12Elyáxeg selásekhayo, nágkólchenatches aksa kélwet'a enxoho ekyentaxno kéllegeykegkoho, ektémol'a aksok negkenatcheso nak agweta'. 13Wánxa agkok, kalpayhekxa aksa kélwáxok ekwákxoho enxoho kéxegke m'a ektémakxa axta aplegeykegkoho Cristo, yakwayam enxoho kayáwhok agko' ekpayheykekxa kélwáxok, cham'a ekxekmowásexkoho sat kéxegke m'a ektémakxa nak Cristo apcheymákpoho.#Ro 8.17; 1 P 4.1. 14Kéleñémo agko' kéxegke apyamatchásencha'a enxoho énxet eñama kélyetlo Cristo, hakte megkamassegwomek cha'a apha kélwáxok kéxegke Espíritu, ekha nak apcheymákpoho apkeñama Dios. 15Kéllegagkok agkok kélxama kéxegke, nágkatne aksa eñama kéllegeykegkoho m'a kélakhé nak kélmók, esenhan ma'a kélmenyexma nak, tén han ma'a ekmaso nak kéltémakxa, esenhan ma'a kélweyhenágwayam aksa nak ektemegweykmoho exma. 16Wánxa agkok, kéllegágkok agkok kélxama kéxegke eñama kélyetlo Cristo, kéméxchek megkólmegkayhe', wánxa aksa kóltemésesek apcheymákpoho m'a Dios eñama kélteme kélyetlo Cristo.
17Wokmek kaxwo' ekhem yakwánxa nak keynhok kélteme kélyekpelchémo apmonye'e m'a ektaha nak Dios énxet'ák apagkok. Chénawok agkok egmonye negko'o kélteme sẽlyekpelchémo, ¿háxko sat kóltemésesek ma'a énxet'ák melyaheykekxoho nak Dios appeywa? 18Askehek agkok apkelwagkáseykpo teyp ma'a énxet'ák apkelpéwomo nak, ¿háxko sat katnehek ma'a énxet'ák elmasagcha'a nak apkeltémakxa, tén han ma'a énxet'ák melya'asáxma nak?#Pr 11.31. 19Apkellegágkok agkok nápakha énxet'ák eñama enxoho Dios apmopmenyého katnehek, kéméxchek elenxanmohok aksa apkelané m'a apkeltémakxa ektakmela nak, tén han yásenneykxak Dios yakwayam etakmelchesek, cham'a Dios aptaha axta senlané, aptaha nak han mehegyenyaweykha.
Currently Selected:
1 SAN PEDRO 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
