1 SAN PEDRO 3
3
Eyéméxchexa antehek ekha nak entáwa
1Kéxegke kelán'ák ekha nak kélnakteyegka'a, kólyahakxoho cha'a kélnakteyegka'a,#Ef 5.22; Col 3.18. yakwayam enxoho etnehek nahan melya'áseyam ma'a kélnakteyegka'a apkelya'áseyam nak Dios appeywa, meyke kéltennáseykha xama enxoho, eñama m'a kéltakmelchásamáxkoho nak kéxegke, 2tén han eñama m'a kéltémakxa ektakmela nak, tén han kañék ma'a apwet'a enxoho ekyetna kéláyo kéxegke m'a Dios. 3Nágkólteméses aksa eñamakxa kéltakmalma kéxegke m'a kélennáxameykha negwetayo nak, cham'a negyeykháseykegkoho nak nelnáxegkáseykha egwa', tén han ma'a aksok egagkok elmomnáwa nak, tén han ma'a kélántaxno apkelmomnáwa nak,#1 Ti 2.9. 4wánxa agkok, akke tásek kañék kélteme kéltakmalma kéxegke m'a kélwáxok, cháxa nentémakxa ektakmela megkamassegwayam nak xa, cham'a sentemésesamol'a ekyelkamáxkoho egwáxok tén han ektakmeleykha egwáxok, cháxa ekleklamo nak apwáxok Dios nenteme nentakmalma eñama xa ektéma nak. 5Cháxa ektemésesama axta eltakmalma kelán'ák nano' axta xa, cham'a kelán'ák ekpagkanchásamáxche axta Dios; temegkek axta eyáyo Dios xa kelán'ák nak, kelyaheykekxók axta anhan anakteyegka'a. 6Cháxa ektémakxa axta Sara xa, kelyaheykekxók axta Abraham. “Wese' ahagkok”#Gn 18.12. axta cha'a katnohok kána'. Kéxegke kélteme étchek xa kelán'a nak, cham'a kéllana enxoho aksok ektakmela, cham'a megkólaka enxoho nahan xama aksok enxoho.”
7Kéxegke énxet'ák ekha nak kélnakteyegka'a kólteme cha'a kélya'áseykegkoho nentémakxa neyseksa kélyepetcheykha kélnakteyegka'a.#Ef 5.25; Col 3.19. Kólteme cha'a kéláyo kélnakteyegka'a, cham'a ekpayhawo nak kóltemésesek kélnakteyegka'a, kaxén kélwáxok méko ekyennakte kelán'a, kaxén nahan kélwáxok peya kólxawhok xamo' ekyennakte kélnenya'ák cham'a appagkanchesama nak kéxegke Dios apmáheyo egkések. Kólteme cha'a xa ektaha nak, yakwayam enxoho méko kawának kalya'aksexma neyseksa kélteme nempeywa nelmaxnagko.
Nenlegeykegkoho eñama nenlané aksok ektakmela
8Kólteme cha'a megkólexpanchásamáxche kéxegke, kólhésho cha'a mók kélwáxok, kólásekhaxkohok cha'a nentémol'a anlának egyáxeg nentémo xamo' nak magya'áseyam. Kólteme cha'a ektakmeleykha kélwáxok, tén han megkeymáxkoho kélwáxok. 9Nágkólhésho cha'a mók kéltemésesakxa ekmaso, nágkólhésho nahan mók ma'a kélwanyencha'a enxoho, wánxa agkok kólmaxnéses aksa yakwayam enxoho epasmok Dios, hakte apkelwóneyha axta kéxegke Dios yakwayam kólxawak aksok eltakmela eleñama néten. 10Hakte:
“Kéxegke ektahakxa enxoho kélmáheyo
katakmelmakha kélwáxok neyseksók kélha,
tén han kélmáheyo enxoho kalpayhekxak kélwáxok
ekyókxoho ekhem,
kóllanagkoho cha'a kélpeywa yakwayam enxoho
megkasógwomek kélpeywa,
yakwayam enxoho nahan megkóltehek kélmowána amya'a;
11kólyenyaw ma'a nentémakxa ekmaso nak,
kóllána' m'a nentémakxa ektakmela nak,
kólchetam ma'a meyke ektahakxa egwáxok nak,
nágkólyensem nahan kélyetlo.
12Hakte apkeltakmelchesegkek Wese' egegkok ma'a
énxet'ák apkelpéwomo nak,
apháxenmók nahan cha'a m'a
aptamhéyak nak nempeywa nelmaxnagko.
wánxa eyke apkenmexma Dios ma'a énxet'ák
elmasagcha'a nak apkeltémakxa.”#Sal 34.12-16.
13Méko kawának kasók ektemésesakxa kéxegke, cham'a kéllenxanakmoho enxoho kéllané kéltémakxa ektakmela. 14Peyk agkok kóllegagkohok makham kéxegke eñama kéllané m'a kéltémakxa ekpéwomo nak, kéleñémo sat kóltehek kéxegke.#Mt 5.10. Nágkólé' aksa xama énxet enxoho, nágkatneykha nahan kélwáxok, 15wánxa agkok, kólteme aksa kéláyo m'a Wese' egegkok Cristo apha nak kélwáxok#Is 8.12-13. kéxegke. Kólpenchesho cha'a kéltahakxa yakwayam kólátegmowagkok ma'a énxet ektahakxa enxoho apkelmaxneyeykha ektémakxa m'a kélhaxneykha nak kéxegke. 16Kólátegmowak cha'a yetlo ekyelkamáxkoho kélwáxok tén han kóltehek kéláyo m'a énxet ektahakxa enxoho apkelmaxneyeykha. Kóltakmelchesaxkoho cha'a yakwayam enxoho katnehek meyke ektahakxa elchetamso kélwáxok kéxegke, keñe sat elmegkagwók ma'a énxet'ák ektaha nak apkelxeyenma ekmaso m'a kéltémakxa ektakmela nak kéxegke, kéxegke kélteme nak megkólya'áseyam Cristo.
17Tásek anlegagkohok eñama nenlané m'a aksok ektakmela nak, cham'a apkepmenyého enxoho hentehek negko'o Dios, kaxnawók anlegagkohok eñama nenlané m'a aksok ekmaso nak. 18Hakte apketsekkek axta anhan Cristo eñama m'a ektémakxa nak negko'o mólya'asáxma, wánxa nahan xama apketsapma, meyke teyp. Tásek axta aptémakxa Cristo, wánxa agkok, aplegágkok axta eyke aptaha segyanmaga negko'o nenteme nak ekmaso nentémakxa, yakwayam enxoho enaklakxak kéxegke m'a aphamakxa nak Dios. Apketsekkek axta ekhawo ektémakxal'a ótsapok nenteme nak énxet, wánxa agkok apxátekhágwokmek axta eyke eñama apteme apkeñamakxa apagko' ma'a néten. 19Apmaheykegkek axta nahan apkeltenneykencha'a amya'a ekmámnaksoho m'a kélekheseykemxa nak kélhagák, eñama apteme apkeñamakxa apagko' ma'a néten. 20Cháxa énxet'ák apkeletsapma axta eñama melyaheykekxoho Dios nano' axta xa, cham'a aphamakxa axta Noé, cham'a apkelháxanma axta aksa nahan Dios yetlo mepekhésamap elyakmagkasek apwáxók neyseksa elánamáxche yántakpayhe, cham'a apkelwagkáseykpo axta teyp ocho énxet'ák neyseksa yegmen ekyawe.#Gn 6.1—7.24. 21Yakpasama yegmen axta ekyetchásamáxkoho xa yegmen ekyawe nak, cham'a sẽlwagkasama nak teyp negko'o. Háwe yakwayam kaxñásekxak negyókxa xa yakpasama yegmen nak, wánxa aksa yakwayam hegwetaksek ma'a meyke ektahakxa egwáxok nak nápakto' Dios; ẽlwagkasek nahan negko'o teyp xa yakpasama yegmen nak eñama m'a apxátekhágwayam axta Jesucristo, 22cham'a Jesucristo apmeyeykekxo axta néten, aphákxeyk nahan ma'a ekpayhókxa nak apkelya'asamakxa Dios. Temék kaxwo' elyaheykekxoho Dios apkelásenneykha m'a Cristo, tén han ma'a aksok magweté nak ekyókxa ekheykencha'a nak tekhenxet, cham'a ekha nak kélyaheykekxoho, cham'a ekha nak han elmowancha'a.
Currently Selected:
1 SAN PEDRO 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
