1 SAN PEDRO 2
2
1Kólyenyaw kéxegke m'a ekyókxoho ektémakxa nak nentémakxa ekmaso, tén han ma'a ekyókxoho ektémakxa nak nelyexancháseykha egmók, kólyenyaw nahan ma'a nelmeyókasamáxkoho egagko' nak nentémakxa, tén han ma'a nelyásekkáseykha, tén han ma'a ekyókxoho ektémakxa nak nenxeyenma naksa egmók. 2Kólchetam kéxegke Dios appeywa, ektaha nak neme apyegmenek ektakmela apkeñama Dios, ektémol'a sakcha'a kaxwé ekteyam kaktamok ma'a neme, yakwayam enxoho kawánegkesesek kélteme megkólya'áseyam kéxegke xa neme apyegmenek ektakmela nak, tén han kólwetak kélwagkásamáxche teyp, 3cham'a eyámnaksoho enxoho kélya'ásegwokmo kéxegke aptaha aptakmela m'a Wese' egegkok Jesús.#Sal 34.8.
Cristo apteme meteymog megkamassegwayam
4Kólyo'ókxa kéxegke Wese' egegkok Jesús aptaha nak meteymog megkamassegwayam, cham'a apyamasma axta énxet'ák, keñe axta Dios aptaha apkelyéseykha xa meteymog nak, ekxeyenma nahan apwáxok ektaha ektakmalma agko'. 5Ekeso eñamakxa apmeyncha'a nak han kéxegke Dios appekkena m'a tegma appagkanamap ektaha nak apkelané Espíritu, hakte kéxegke kélteme meteymog megkamassegwayam; etnésesek sat nahan kéxegke kélpagkanamaxche Dios kélpasmo kélmaxnéseso m'a ektaha nak énxet'ák apagkok, kólmések sat nahan kéxegke Dios aksok kélméso, cham'a ekleklamol'a apwáxok Dios agmések eñama m'a aksok apkelané axta Jesucristo. Espíritu Santo eyke aptekkeso egwáxok yakwayam anlának xa. 6Ekeso eñamakxa ektéma nak han eknaktáxésamaxche weykcha'áhak se'e:
“Ekpekkenchek ko'o Sión
xama meteymog ektaha nak
kélmámenyého kólmaha,
ektaha nak ko'o selyéseykha
ektaha nak han ektakmalma agko';
énxet ektahakxa enxoho apteme mey'áseyam xa meteymog nak
megkatnehek sat eyakhémo apteme mey'áseyam.”#Is 28.16.
7Keñe kéxegke kéltaha nak megkólya'áseyam, ektakmela kóltemésesek xa meteymog nak, chakhásesamok eyke ektémakxa eknaktáxésamaxche m'a énxet'ák apteme nak apkelya'áseyam ektéma nak se'e:
“Tamhákxeyk kaxwo' meteymog
kélmámenyého kólmaha m'a
meteymog apyamasma axta
énxet'ák apkeláneyak nak tegma.”#Sal 118.22.
8Temék nahan mók eknaktáxésamaxche s'e:
“Cháxa meteymog peya nak
kalpelápagkasek énxet'ák xa.”#Is 8.14-15.
Kélpelápagkasek axta meteymog xa énxet'ák nak, hakte axta elyaheykekxohok ma'a ektémakxa nak amya'a eñama Dios, axta eyke kélpagkanchesók katnehek xa ektaha nak.
9Kéxegke eyke kélteme énxet'ák ektaha axta Dios apkelyéseykha, kélteme anhan kélmaxnéseso Dios énxet'ák apagkok eñama apkelásenneykha m'a Wese' apwányam Dios, kélteme nahan Dios énxet'ák apagkok apkelpagkanamap,#Ex 19.5-6; Is 43.20. kélteme nahan énxet'ák ektaha axta Dios apkelma yakwayam etnehek énxet'ák apagkok.#Ex 19.5; Dt 4.20; 7.6; 14.2; Tit 2.14. Temegkek kéxegke xa ektaha nak yakwayam enxoho kóllegaksek ma'a Dios aptamheykha ektakmela nak,#Is 43.21. cham'a Dios aptaha axta apkelwóneykha kéxegke yakwayam kólantépok neyseksa ekyaktésakxa exma yakwayam enxoho kólántexek ma'a neyseksa elseyexma apagkok ektakmalma nak.#Is 9.2. 10Háwe axta kéxegke Dios énxet'ák apagkok nano' axta, kaxwo' eyke kéltemék kéxegke Dios énxet'ák apagkok; axta kamopyósak apkelányo Dios kéxegke nano' axta, kaxwo' eyke kélyósekak apkelano kéxegke Dios.#Os 2.23.
Kólteme cha'a kéxegke Dios apchásenneykha
11Elyáxeg selásekhayo, eltamhok ko'o megkólhok kamok kélwáxok ektémakxa nak aksok negyespagko nenteme nak énxet, cham'a sẽlenmexeykegkohol'a cha'a negko'o,#Sal 119.19. kéxegke kéltaha nak kélheykha yakwatakxoho keso náxop ektémol'a énxet apheykha nak megkatnahakxa apkelókxa. 12Kóltakmelchesaxkoho kéxegke nepyeseksa m'a énxet'ák melya'áseyak nak Dios; keñe sat étak ektakmela kéltahakxa kéxegke xa énxet'ák nak, eltemésesek sat nahan apcheymákpoho Dios, cham'a ekwokmo sat ekhem yakwánxa yának Dios óltennaksek negyókxoho ektémakxa aksok nenlané, sagkek eykhe makham apkelxeyenma kéxegke xa énxet'ák nak, máxa elmasagcha'a kéltémakxa aptemesásak.
13Kólteme cha'a kélyaheykekxoho m'a kelwese'e ekha nak kéláyo eñama kélyetlo m'a Wese' egegkok: kólyahakxoho m'a wese' apwányam apkeláneykha nak apchókxa aptaha nak apkemha apmonye nepyeseksa apnámokkok, 14kólyahakxoho nahan ma'a ektaha nak apkelásenneykha wese' apwányam, yakwayam ellegásesagkohok ma'a énxet'ák ekmasagcha'a nak apkeltémakxa, aptaha nak han kéláphaso yakwayam kalkohok apwáxok aptahakxa m'a énxet'ák ektakmela nak apkeltémakxa. 15Hakte apmenyék Dios kóltehek kéxegke ektakmela kéltémakxa yakwayam enxoho mexének ekmaso kéxegke m'a énxet'ák melya'áseyak nak aksok, tén han ma'a énxet'ák elyéháxma nak.
16Kólteme kéltémakxa m'a apkeltémakxa nak énxet'ák ektaha nak melmomap, nágkóláseneykxa aksa kéxegke m'a ektémakxa nak kélmowána kóllának kélmokókxa enxoho kóllána', yakwayam kóltegyaha yakwánxa kóltehek kóllának aksok ekmaso, akke tásek kóltehek ma'a apkeltémakxa nak Dios apkelásenneykha. 17Kólteme kéláyo m'a apyókxoho énxet ekpayhókxa enxoho kóltehek kéláyo. Kólteme kélásekhayo apyókxoho ẽlyáxeg nentémo xamo' nak magya'áseyam, kólteme kéláyo Dios. Kólteme nahan kéláyo m'a wese' apwányam apkeláneykha nak apchókxa.
Ektémakxa axta aplegeykegkoho Cristo
18Kéxegke kéltaha nak kélásenneykha, kólyahakxoho cha'a yetlo kéláyo m'a kelwese'e kélagkok nak, háwe apwánxa apagkok ma'a kelwese'e ektakmela nak apkeltémakxa, tén han ma'a ektakmela nak apwáxók, kólteme nahan kéláyo m'a kelwese'e ekmasagcha'a nak apkeltémakxa. 19Hakte ektakmela agko' elenmaxakpohok énxet ma'a ekmaso nak kéltemésesakxa, hakte ey'asagkohok ma'a nentémakxa nak nentakmelchásamáxkoho nápakto' Dios. 20Kéllanak agkok kéxegke aksok ekmaso, megkólxénaxchék ektakmela m'a kélenmáxexkoho enxoho kéllegeykegkoho. Wánxa agkok, kéllegágkok agkok kéxegke eñama kéllané aksok ektakmela tén han ma'a kélenmáxexkoho enxoho kéllegeykegkoho, cháxa ekleklamo nak apwáxok Dios xa. 21Yakwayam kóllegagkohok axta kéxegke apkelwóneykencha'a Dios, hakte aplegágkok axta Cristo kéxegke eñamakxa, apmések axta kéxegke aptémakxa ektakmela yakwayam kólyetlakxak. 22Axta elaneyk mey'asáxma Cristo xama enxoho, axta nahan elyexancháseykha xama énxet enxoho.#Is 53.9. 23Axta yátegmowágkok Jesús ma'a kélwanyeyncha'a axta, axta nahan epagkaneykha yakwayam exnéshok mók ma'a kéllegasáseykegkoho axta, wánxa agkok Dios axta eyke aksa apchásenneykekxa Jesús, aptaha nak segyekpelchémo ekmámnaksoho agko'.#Is 53.7. 24Appata apagko' axta aptahak Cristo mólya'asáxma cham'a ekyetlóko axta apkexnákpo axta néten aksok ektegyéso, yakwayam enxoho kamaskok nénmexo negko'o m'a ektémakxa nak mólya'asáxma ektémol'a ótsapok, yakwayam enxoho antehek nentémakxa ekpéwomo. Kélyensasegkek axta Cristo yakwayam enxoho kóltakmelwók kéxegke.#Is 53.5. 25Hakte kélxeganeykmek axta kéxegke ektémol'a nekkések apkelxegányam,#Is 53.6. kaxwo' eyke kélya'aweykxek kéxegke Cristo, aptaha nak apkeltakmelcheso kéxegke ekhawo m'a aptémakxal'a énxet ektaha nak apkeláneykha nekkések, meyenseykmok nahan apkeltakmelcheso kéxegke m'a Cristo.
Currently Selected:
1 SAN PEDRO 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
