1 SAN PEDRO 1
1
Pedro apcháphaso ekxeyenma apwáxok
1Ko'o Pedro, sekteme Jesucristo seykha amya'a apagkok. Enxet'ák apkexpakneykha mexneykha apkelókxa#Stg 1.1. ektáxesásak ko'o s'e weykcha'áhak nak, cham'a apheykha nak yókxexma Ponto, Galacia, Capadocia, Asia tén han ma'a Bitinia, 2cham'a énxet'ák ektaha axta nano' apkelyéseykha Dios Egyap, ekhawo m'a ektémakxa axta apmopmenyého elának Dios. Espíritu axta anhan keñamak aptemésesama kélpagkanamaxche kéxegke Dios yakwayam enxoho kóltehek kélyaheykekxoho, yakwayam enxoho katnésesek kéláxñeyo kéxegke Jesucristo éma apagkok. Kólyánchesho kélma m'a ektémakxa nak segméso naksa Dios segemleykekxoho, tén han ma'a meyke ektahakxa kélwáxok.
Ektémakxa elhaxneykha egwáxok
3Oltemésesek hana apcheymákpoho Dios, Jesucristo Wese' egegkok Apyap, entemésesek axta negko'o eghaxnancha'ák Dios eñama m'a ekyawe ektakmeleykha nak apwáxok henlano', eñama nahan ma'a apxátekhágwayam axta Jesucristo.#Jn 3.3-7; Ro 6.4-13; 1 P 1.22. Cháxa segmésa nak nelhaxneykha ektaha nak ekmámnaksoho agko' xa, 4sat kañék nahan kélxawé kéxegke aksok aptakmelchesesama nak Dios ma'a néten, appagkanchesama nak kéxegke apmáheyo egkések, cham'a aksok megkamowána nak katsagkasaxche, yawanchek nahan kapeysegkesek xama aksok ekmanyása nak, yawanchek nahan kamassegwók ma'a ektémakxa nak. 5Apkeltakmelchesegkek kéxegke Dios yetlo m'a ektémakxa nak apmopwána, eñama m'a ektémakxa nak megkólya'áseyam, yakwayam enxoho kólxawak kéxegke kélwagkásamáxche teyp, cham'a aptakmelchesesama nak kéxegke Dios, cháxa peya nak hegya'asásegwók ektemegwánxa néxa ekhem xa.
6Ekeso eñamakxa ekyawa nak ekpayheykekxa kélwáxok kéxegke, neyseksa eykhe kéllegeykegkoho kéxegke yakwatakxoho m'a ekyókxoho ektémakxa nak ekyentaxnamo negha. 7Hakte máxa sawo ekyátekto elyenma ekmomnáwa m'a ektémakxa nak megkólya'áseyam kéxegke: kéméxchek sekxo' kólyekkónek ma'a ektémakxa nak megkólya'áseyam, ektémol'a sawo ekyátekto elyenma ekmomnáwa kólyekkónek kólyenyók neyseksa táxa. Magya'áseyam elenmáxamáxkohol'a ektémakxa segyekkónma, yeykhágweykmók ma'a ekwánxa nak ekmomnáwa sawo ekyátekto elyenma étsagkasamáxkohol'a. Temegkek agkok ekyekkónamaxche megkólya'áseyam kéxegke xa ektaha nak, kalkohok sat kélwáxok kéltahakxa kéxegke, kóltemésesek sat kéleymáxkoho kéxegke, tásek sat nahan katnehek kélxénamaxche, cham'a senxekmowáseykpoho sat Jesucristo.
8Kélásekha'awok kéxegke Jesucristo, eykhe kólweteyk xama enxoho; megkólya'aseykmok nahan kéxegke neyseksa megkólwetayo keso kaxwo' nak,#Jn 20.29. awanhek nahan ekpayheykekxa kélwáxok kéxegke, cham'a magmowánal'a anxének ekwánxa ekyawe hakte tasók agko', 9eñama m'a kélwagkásamáxche teyp nak kéxegke, ektaha nak ekwetaso m'a ektémakxa nak megkólya'áseyam.
10Apkeltámesamakpek axta énxet'ák ektaha axta apkellegaso Dios appeywa ektémakxa xa nelwagkásamáxche teyp nak, apkeltémók axta nahan elya'ásegwomhok ektémakxa, cham'a nano' axta. Apkelxeyenmék axta nahan ma'a apmáheyo nak egkések kéxegke Dios, eñama m'a ektémakxa nak segemleykekxoho. 11Nano' axta apkelya'asáseyak Cristo Espíritu apagkok énxet'ák ektaha axta apkellegaso Dios appeywa m'a yakweykenxa axta katnehek aplegeykegkoho Cristo, tén han apkelya'asásegweykmo ekmáheyo exkak Cristo apcheymákpoho natámen aplegeykegkoho, apkeltémók axta eykhe elya'ásegwomhok énxet'ák ektaha axta Dios appeywa apkellegaso xa, tén han apkeltémo elya'ásegwomhok ekwánxa ekhem katnehek xa, tén han apkeltémo elya'ásegwomhok ektémakxa m'a aptahakxa axta apxeyenma Espíritu apha axta apwáxók xa énxet'ák nak. 12Wánxa agkok, apkelya'asásegweykmek axta eyke Dios megkapheweykmo yakwayam kapasmok ektémakxa axta apkeltenneykha xa énxet'ák nak, kéxegke eyke yakwayam kapasmok xa ektémakxa axta apkeltenneykha, cháxa kéllegasama axta kéxegke xa eñama apkellegaso m'a énxet'ák apkeltennáseykencha'a axta tásek amya'a yetlo Espíritu Santo apmopwána, cham'a Espíritu kéláphaso axta apkeñama néten. Cháxa apkeltémo axta anhan étak Dios apkelásenneykha xa.
Dios apkeltémo antehek nempagkanchásamáxche
13Kóllánekxa kéltahakxa, kólteme kélmowána kélláneykegkoho kéltémakxa, kólleyxmakha m'a aksok peya nak egkések Dios eñama m'a ektémakxa nak segemleykekxoho, cham'a senxekmowáseykpoho sat Wese' egegkok Jesucristo. 14Nágkóltemekxa makham ma'a ektémakxa axta aksok kélyespagko megkólya'aseykegkaxa axta Dios. Kólteme m'a aptamheykegkaxal'a kélketchek ekhal'a apkelyaheykekxoho. 15Kólteme ektakmela agko' kéltémakxa, hakte Dios aptaha axta apkelwóneykha kéxegke apteme aptakmalma; 16hakte temegkek eknaktáxésamaxche weykcha'áhak se'e: “Kólteme kéxegke ektakmela kéltémakxa hakte ko'o sekteme sektakmalma.”#Lv 11.44-45; 19.2.
17Kéltemék agkok kélwónencha'a kéxegke Dios “Táta”, cham'a aptaha nak cha'a apyekpelchémo ektémakxa enxoho aksok nenlané, aptaha nak han apteméseso meyke apyeykhamap énxet, kéméxchek kéxegke kólxekmósho ekyetna kéláyo, neyseksa kélha makham keso náxop. 18Hakte apkelwagkasek axta teyp kéxegke Dios neyseksa kélyetlo m'a kéltémakxa mékoho axta, cham'a apmeyáseykekxo axta kélyepmeyk nano' kéxegke; kélya'ásegkok eyke kéxegke megkólyanmagkasama xama aksok étsagkasamáxkohol'a m'a kélwagkásamáxche teyp nak kéxegke, cham'a sawo ekyátekto elyenma ekmomnáwa nak, tén han ma'a sawo ekmopé elyenma ekmomnáwa nak, 19wánxa m'a Cristo éma apagkok ektaha nak ektakmela agko' kélmésama axta Dios ektémol'a nekkések apketkok apmatña meyke ektemegweykmohoxma apyempehek, cham'a aptakmalmal'a. 20Nano' axta kélpagkancheso Cristo katnehek xa ektaha nak, cham'a amonye axta elánamáxche keso náxop, wánxa agkok apwa'ak axta eyke Cristo keso negwánxa nak, eyágketexa nak ektemegwánxa néxa, yakwayam epasmok kéxegke. 21Cristo nahan keñamak kéltaha megkólya'áseyam kéxegke Dios, cham'a Dios aptaha axta apxátekháseyam Cristo, aptaha axta anhan apméso apcheymákpoho; cháxa keñamak kéltéma nak kéxegke megkólya'áseyam Dios xa, tén han ma'a ektémakxa nak elhaxneykha kélwáxok.
22Kaxwo' eyke kéltemék kéxegke eyáxñeyo kélwáxok, yakwayam enxoho kólásekhohok ekmámnaksoho agko' ma'a ẽlyáxeg nentémo xamo' nak magya'áseyam, cham'a kélyahákxoho axta kéxegke amya'a ekmámnaksoho nak. Kéméxchek kéxegke kóltehek ekmámnaksoho kélásekhamaxkoho ekweykmoho kañók agko' kélwáxok. 23Kéltemesásekxeyk kéxegke kaxwé kélteyam, háwe eyke kaxwo' ma'a ektémakxal'a kélyap énxet, cham'a apketsapmol'a, akke keñamak kéltamheykekxa kaxwé kélteyam kéxegke m'a Dios appeywa ektaha nak ekha ekyennakte, ektaha nak han megkamassegwayam.#Jn 3.3-7; Stg 1.18; 1 P 1.3. 24Hakte temegkek eknaktáxésamaxche weykcha'áhak se'e:
“Apyókxoho énxet apteme máxa
pánakte exnók elámhal'a naxma,
keñe m'a ektémakxa nak apkeleymákpoho ekhawo m'a
ektémakxal'a pánakte exnók,
ketsekkek agkok axchapok katyamok ma'a exnók,
25wánxa agkok, megkamassegwomek eyke m'a
Dios appeywa nak.”#Is 40.6-8.
Cháxa tásek amya'a kéllegasama axta kéxegke xa.
Currently Selected:
1 SAN PEDRO 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
