SANTIAGO 5
5
Kéleyso énxet ekxákma nak aksok apagkok
1¡Kóleyxho kéxegke s'e énxet ekxákma nak aksok apagkok, kóllekxagwaha, kallapwomák kaxének kélwáxok ma'a yakwánxa nak katnehek kéllegeykegkoho! 2Kalesók sat ma'a aksok kélagkok nak, askok sat nahan katwok kélnakta, 3ayew'ák sat katyapok ma'a sawo ekyátekto elyenma ekmomnáwa nak, tén han ma'a sawo ekmopé elyenma ekmomnáwa nak, sat kañék ekwetamaxche aksok yakwayam kasexnenak kéxegke xa ayew'ák nak, máxa táxa eksawhoma kélhápetek sat katnehek ekmaséseyam kéxegke xa ayew'ák nak. Kélxámásegkek kéxegke aksok kélagkok keso ekhem ektemegwánxa nak néxa.#Mt 6.19. 4Wóneyha enmexa kéxegke m'a selyakye megkólyanmagkaseso axta apkeltamheykha énxet'ák, cham'a, apnakxa axta aksok ekyexna yókxexma kélagkok; apleg'awók nahan apkelwóneykha Wese' egegkok ekha apyennakte m'a énxet'ák ektaha axta apkeltamheykha.#Dt 24.14-15. 5Takmelmók kéxegke kélheykha keso náxop, yetlo ektakmelcháseykha kélwáxok ma'a aksok kélyespagko nak, kélnakmelásamáxkoho kélagko' nahan kéltemék kéxegke, ektémol'a weyke kélnaktóso, chágketwa'ak ma'a kéltekyawa ekxegakmo nak. 6Kélsexnenakek axta kéxegke m'a énxet'ák apkelpéwomo nak, kélnapchek axta nahan, yetlo apchahayo aksa meyke apkenmexeykekxa.
Meyke nempekhésamaxche tén han nempeywa nelmaxnagko
7Elyáxeg kólteme kéxegke megkólpekhésamaxche, ekwokmoho apkexyekmo Wese' egegkok. Enxet apkelané nak namyep, eleyxek aksa yetlo mepekhésamap ekwokmoho ekwakto mámeye, yeyk'ak agkok ma'a émha amonye ekmámeyekxal'a, keñe étak ektakmela apnakxo ekyexna. 8Kólteme kéxegkáxa megkólpekhésamaxche, kóllenxanmoho kélwaskápeykekxoho hakte kaxwo' sat ewatak Wese' egegkok Jesús.
9Elyáxeg, nágkólpakmésmakha aksa kóllának kélmók, yakwayam enxoho mékpelchásesók kéxegke Dios, hakte apwa'ak ma'a Dios aptaha nak segyekpelchémo, nekha átog apkenegwa'ak. 10Elyáxeg, kólyetlakxa kéxegke ektémakxa axta apkelenmáxamákpoho apkellegeykegkoho énxet'ák ektaha axta Dios appeywa apkellegaso, cham'a apkelxeyenmo axta cha'a amya'a eñama nak Dios. 11Kaxénhok cha'a negko'o egwáxok aptaha apkeleñémo m'a ektaha nak apkelenmáxamákpoho apkellegeykegkoho yetlo apkelwaskápeykekxoho. Kéllegayak kéxegke ektémakxa axta apkelenmáxamákpoho aplegeykegkoho Job, kélya'ásegkok nahan kéxegke m'a aptemésesamakxa axta Wese' egegkok ektemegwánxa axta néxa aplegeykegkoho,#Job 1.21-22; 2.10. hakte Wese' egegkok apteme segemleykekxoho, apteme nahan apmopyósa henlano'.#Sal 103.8; 111.4.
12Elyáxeg, ekyagwánxa agkok, nágkólxén aksa ektaha ekweteykegkoho néten tén han keso náxop, esenhan ma'a mók aksok enxoho, cham'a, kéltemésesa enxoho ekmámnaksoho kélpeywa. Kéltemék agkok kélpeywa “Ehay”, kólteme cha'a nakso' “Ehay”, kéltemék agkok nahan kélpeywa “Ma'”, kólteme cha'a nakso' “Ma'”, yakwayam enxoho mékpelchásesók kéxegke Dios.#Mt 5.34-37.
13Aplegágkok agkok kélxama kéxegke, kéméxchek etnehek nempeywa nelmaxnagko, payheykxeyk agkok nahan apwáxok kélxama kéxegke, enneykmes yakwayam eltemésesek apcheymákpoho Dios. 14Apháxekpek agkok kélxama kéxegke, kóláneyha m'a énxet'ák apkelámha apmonye'e nak kélakneykekxexa, yakwayam enxoho elmaxnésesek ma'a ektahakxa enxoho apháxamap, yetlo apxeyenma Wese' egegkok Jesús apwesey nahan eltexnagkok pexmok égmenek.#Mr 6.13; Lc 10.34. 15Kélmaxnakkek agkok yetlo megkólya'áseyam, etakmelwók ma'a ektaha apháxamap. Wese' egegkok exneyásekxak néten; apkeláneyak agkok nahan mey'asáxma m'a ektahakxa enxoho apháxamap, megkólyakmagkásekxék sat eyke m'a ektémakxa nak mey'asáxma. 16Kóltennés cha'a kéltémo xamo' nak megkólya'áseyam ektahakxa enxoho kéllané megkólya'asáxma, kólmaxnéses cha'a kélnámokkok yakwayam enxoho eltakmelchesók Dios. Ekmowána eghak apkelmaxnagko m'a énxet ektakmela nak aptémakxa, hakte keytlawhok nahan apméso apwáxok ma'a Dios. 17Enxetók xamo' axta negko'o Elías, aptaha axta Dios appeywa aplegaso, xama axta aptaha nempeywa nelmaxnagko yetlo apméso apwáxok Dios apkeltamho megkammakye', massék axta ekwakto mámeye, ekwokmoho apkántanxo apyeyam nepxet pók.#1 R 17.1; 18.1; Lc 4.25. 18Xama axta apkelmaxneyákxo makham apkeltamho kammé', mameyákxeyk axta makham,#1 R 18.24-45. keñe axta xóp ekmésa yakwayam kanakxaxchek aksok ekyexna.
19Elyáxeg, kélyetnakhágwokmek agkok kélxama kéxegke neyseksa kélyetlo m'a amya'a ekmámnaksoho nak, keñe kélmók ey'ókxések makham Dios, 20kólya'ásegwomho kéxegke m'a énxet ektahakxa enxoho apyakmagkaseso apwáxok pók ektahakxa enxoho apkelané m'a aptémakxa ekmaso nak, ewagkasek teyp yakwayam eykhe yetsapok xa énxet mey'asáxma nak, yának nahan meyakmagkásekxék Dios ma'a ektémakxa nak melya'asáxma énxet'ák.#Pr 10.12; 1 P 4.8.
Currently Selected:
SANTIAGO 5: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
