អេសាយ 60
60
សិរីរុងរឿងរបស់ព្រះយេហូវ៉ានៅស៊ីយ៉ូន
1ចូរក្រោកឡើង! ចូរភ្លឺឡើង!
ដ្បិតពន្លឺរបស់អ្នកបានមកដល់ហើយ
សិរីរុងរឿងរបស់ព្រះយេហូវ៉ាបានរះឡើងមកលើអ្នកហើយ។
2មើល៍! សេចក្ដីងងឹតនឹងគ្របលើផែនដី
ភាពងងឹតដ៏ក្រាស់នឹងគ្របលើជាតិសាសន៍នានា
ប៉ុន្តែព្រះយេហូវ៉ានឹងរះឡើងមកលើអ្នក
ហើយសិរីរុងរឿងរបស់ព្រះអង្គនឹងត្រូវបានឃើញនៅលើអ្នក។
3ប្រជាជាតិនានានឹងមករកពន្លឺរបស់អ្នក
ស្ដេចទាំងឡាយនឹងមករករស្មីអរុណរះរបស់អ្នក។
4ចូរងើបភ្នែកឡើងមើលជុំវិញចុះ!
ពួកគេទាំងអស់គ្នាមូលគ្នាមករកអ្នក
កូនប្រុសៗរបស់អ្នកនឹងមកពីទីឆ្ងាយ
កូនស្រីៗរបស់អ្នកនឹងត្រូវបានបីនៅលើភ្លៅ។
5ពេលនោះ អ្នកនឹងឃើញ ហើយអ្នកនឹងភ្លឺចែងចាំង
ចិត្តរបស់អ្នកនឹងរំភើប ហើយរីករាយ
ពីព្រោះភាពបរិបូរនៃសមុទ្រនឹងត្រូវបានបង្វែរមកអ្នក
ហើយទ្រព្យសម្បត្តិរបស់ប្រជាជាតិនានានឹងមកដល់អ្នក។
6ហ្វូងអូដ្ឋដ៏ច្រើនសន្ធឹកនឹងគ្របដណ្ដប់អ្នក
គឺអូដ្ឋស្ទាវរបស់ម៉ាឌាន និងអេផា;
ពួកគេទាំងអស់គ្នានឹងមកពីសេបា ទាំងយកមាស និងកំញានមក
ហើយប្រកាសសេចក្ដីសរសើរតម្កើងអំពីព្រះយេហូវ៉ា។
7អស់ទាំងហ្វូងចៀមនៃកេដារនឹងមូលគ្នាមករកអ្នក
ពួកចៀមឈ្មោលនៃនេបាយ៉ូតនឹងបម្រើអ្នក
ពួកវានឹងឡើងមកលើអាសនារបស់យើងជាតង្វាយដ៏គាប់ចិត្ត។
យើងនឹងលើកតម្កើងដំណាក់ដ៏រុងរឿងរបស់យើង។
8តើអ្នកទាំងនេះជានរណា ដែលហើរមកដូចជាពពក
និងដូចជាព្រាបមករកបង្អួចរបស់វា?
9មែនហើយ កោះទាំងឡាយនឹងទន្ទឹងរង់ចាំយើង
ហើយសំពៅតើស៊ីសនឹងមកមុនគេ
ដើម្បីនាំកូនប្រុសៗរបស់អ្នកមកពីទីឆ្ងាយ
ព្រមទាំងនាំប្រាក់ និងមាសរបស់ពួកគេមកជាមួយផង
សម្រាប់ព្រះនាមរបស់ព្រះយេហូវ៉ាដ៏ជាព្រះរបស់អ្នក
សម្រាប់អង្គដ៏វិសុទ្ធនៃអ៊ីស្រាអែល
ពីព្រោះព្រះអង្គបានលើកតម្កើងសិរីរុងរឿងដល់អ្នក។
10ពួកជនបរទេសនឹងសង់កំពែងរបស់អ្នកឡើងវិញ
ហើយបណ្ដាស្ដេចរបស់ពួកគេនឹងបម្រើអ្នក។
ថ្វីត្បិតតែយើងបានវាយអ្នកដោយកំហឹងរបស់យើងក៏ដោយ
ប៉ុន្តែយើងបានអាណិតមេត្តាអ្នក ដោយសេចក្ដីសន្ដោសរបស់យើងវិញ។
11ខ្លោងទ្វាររបស់អ្នកនឹងបើកចំហជានិច្ច
គឺមិនបិទទាំងយប់ទាំងថ្ងៃ
ដើម្បីនាំទ្រព្យសម្បត្តិរបស់ប្រជាជាតិនានាមកឯអ្នក
ហើយបណ្ដាស្ដេចរបស់ពួកគេក៏ត្រូវបាននាំមកដែរ។
12ដ្បិតប្រជាជាតិណា និងអាណាចក្រណាដែលមិនបម្រើអ្នក នឹងវិនាស
ប្រជាជាតិទាំងនោះនឹងហិនហោចអស់ទៅ។
13សិរីរុងរឿងនៃលីបង់
គឺដើមស្រល់ ដើមស្រល់ក្រហម និងដើមស្រល់ធំ នឹងមកឯអ្នកជាមួយគ្នា
ដើម្បីតុបតែងកន្លែងនៃទីវិសុទ្ធរបស់យើង
ហើយយើងនឹងលើកតម្កើងសិរីរុងរឿងដល់កន្លែងនៃជើងរបស់យើង។
14ពួកកូនចៅរបស់អ្នកដែលធ្វើបាបអ្នក នឹងមកឱនចុះនៅចំពោះអ្នក
អស់អ្នកដែលធ្លាប់មើលងាយអ្នក នឹងក្រាបចុះនៅទៀបបាតជើងរបស់អ្នក។
ពួកគេនឹងហៅអ្នកថា “ទីក្រុងរបស់ព្រះយេហូវ៉ា”
ក៏នឹងហៅថា “ស៊ីយ៉ូនរបស់អង្គដ៏វិសុទ្ធនៃអ៊ីស្រាអែល”។
15ជំនួសឲ្យការដែលអ្នកត្រូវគេបោះបង់ចោល ត្រូវគេស្អប់ ហើយគ្មានអ្នកណាឆ្លងកាត់អ្នក
យើងនឹងធ្វើឲ្យអ្នកបានជាឧត្ដុង្គឧត្ដមជារៀងរហូត
និងបានជាសេចក្ដីរីករាយពីជំនាន់មួយទៅជំនាន់មួយ។
16អ្នកនឹងជញ្ជក់ទឹកដោះរបស់ប្រជាជាតិនានា
ក៏នឹងជញ្ជក់ដោះបណ្ដាស្ដេចដែរ
នោះអ្នកនឹងដឹងថា យើងហ្នឹងហើយ គឺយេហូវ៉ាជាព្រះសង្គ្រោះរបស់អ្នក
ជាព្រះប្រោសលោះរបស់អ្នក និងជាព្រះដ៏មានព្រះចេស្ដារបស់យ៉ាកុប។
17យើងនឹងនាំមាសមកជំនួសលង្ហិន
ក៏នឹងនាំប្រាក់មកជំនួសដែក លង្ហិនជំនួសឈើ ហើយដែកជំនួសថ្មផង។
យើងនឹងធ្វើឲ្យសេចក្ដីសុខសាន្តទៅជាអ្នកត្រួតត្រាអ្នក
ហើយធ្វើឲ្យសេចក្ដីសុចរិតទៅជាអ្នកគ្រប់គ្រងអ្នកផង។
18នៅក្នុងទឹកដីអ្នក នឹងមិនឮអំពីអំពើហិង្សាទៀត
ក្នុងព្រំដែនរបស់អ្នកនឹងមិនឮអំពីការបំផ្លាញ ឬការអន្តរាយឡើយ
ផ្ទុយទៅវិញ អ្នកនឹងហៅកំពែងរបស់អ្នកថា “សេចក្ដីសង្គ្រោះ”
ក៏ហៅខ្លោងទ្វាររបស់អ្នកថា “សេចក្ដីសរសើរតម្កើង”។
19ព្រះអាទិត្យនឹងលែងធ្វើជាពន្លឺដល់អ្នកទៀតនៅពេលថ្ងៃ
ព្រះចន្ទនឹងលែងផ្ដល់ពន្លឺដល់អ្នកទៀតសម្រាប់ជាភាពចែងចាំង
គឺព្រះយេហូវ៉ានឹងបានជាពន្លឺដ៏អស់កល្បដល់អ្នកវិញ
ហើយព្រះរបស់អ្នកនឹងបានជាសិរីរុងរឿងដល់អ្នកដែរ។
20ព្រះអាទិត្យរបស់អ្នកនឹងមិនលិចទៀតឡើយ
ហើយព្រះចន្ទរបស់អ្នកក៏មិនជ្រេដែរ
ដ្បិតព្រះយេហូវ៉ានឹងបានជាពន្លឺដ៏អស់កល្បដល់អ្នក
ហើយគ្រានៃការកាន់ទុក្ខរបស់អ្នកនឹងផុតទៅ។
21ពេលនោះ អស់ទាំងប្រជាជនរបស់អ្នកនឹងបានសុចរិត
ពួកគេនឹងទទួលទឹកដីនេះជាមរតករហូតតទៅ;
ពួកគេជាមែកចេញពីការដាំដុះរបស់យើង
ជាកិច្ចការនៃដៃរបស់យើង
ដើម្បីឲ្យយើងទទួលការលើកតម្កើងសិរីរុងរឿង។
22អ្នកតូចបំផុតនឹងត្រឡប់ជាអម្បូរមួយ
អ្នកតូចតាចជាងគេនឹងត្រឡប់ជាប្រជាជាតិខ្លាំងពូកែ។
គឺយើងហ្នឹងហើយជាយេហូវ៉ា
យើងនឹងពន្លឿនការនេះក្នុងពេលកំណត់របស់វា៕
Currently Selected:
អេសាយ 60: GKHB
Highlight
Copy
Compare
Share
Want to have your highlights saved across all your devices? Sign up or sign in
GLOBAL KHMER BIBLE©
Copyright © 2023 by Global Bible Initiative
