អេសាយ 59
59
បាប និងការប្រោសលោះ
1មើល៍! ព្រះហស្តរបស់ព្រះយេហូវ៉ាមិនមែនរួញខ្លីដែលសង្គ្រោះមិនបាន
ហើយព្រះកាណ៌របស់ព្រះអង្គមិនធ្ងន់ដែលស្ដាប់មិនឮនោះទេ
2គឺអំពើទុច្ចរិតរបស់អ្នករាល់គ្នាវិញទេតើ
ដែលខណ្ឌចែករវាងអ្នករាល់គ្នា និងព្រះរបស់អ្នករាល់គ្នា
គឺបាបរបស់អ្នករាល់គ្នាទេតើ
ដែលបាំងព្រះភក្ត្រព្រះអង្គពីអ្នករាល់គ្នា មិនឲ្យព្រះអង្គសណ្ដាប់ឡើយ។
3ដ្បិតដៃរបស់អ្នករាល់គ្នាប្រឡាក់ដោយឈាម
ហើយម្រាមដៃរបស់អ្នករាល់គ្នាប្រឡាក់ដោយអំពើទុច្ចរិត;
បបូរមាត់របស់អ្នករាល់គ្នានិយាយមុសា
ហើយអណ្ដាតរបស់អ្នករាល់គ្នាពោលសេចក្ដីទុច្ចរិត។
4គ្មានអ្នកណាប្ដឹងដោយយុត្តិធម៌ឡើយ
ក៏គ្មានអ្នកណាការពារក្ដីដោយពិតត្រង់ដែរ;
ពួកគេទុកចិត្តលើសេចក្ដីឥតប្រយោជន៍ ហើយនិយាយសេចក្ដីមិនពិត;
ពួកគេមានផ្ទៃពោះជាសេចក្ដីអន្តរាយ ហើយសម្រាលបានសេចក្ដីទុច្ចរិត;
5ពួកគេភ្ញាស់ពងរបស់ពស់ពិស
ហើយព័ទ្ធជាសំណាញ់ពីងពាង;
អ្នកដែលហូបពងរបស់ពួកវានឹងស្លាប់
ហើយពងដែលជាន់បែក ក៏ញាស់ចេញជាពស់វែក។
6សំណាញ់របស់ពួកគេប្រើជាសម្លៀកបំពាក់មិនបានទេ
ហើយពួកគេបិទបាំងកាយដោយកិច្ចការរបស់ខ្លួនក៏មិនបានដែរ
កិច្ចការរបស់ពួកគេជាកិច្ចការទុច្ចរិត
ហើយមានអំពើហិង្សានៅក្នុងដៃរបស់ពួកគេ។
7ជើងពួកគេរត់ទៅតាមសេចក្ដីអាក្រក់
ហើយពួកគេរហ័សនឹងបង្ហូរឈាមឥតទោស;
គំនិតរបស់ពួកគេជាគំនិតទុច្ចរិត;
មានសេចក្ដីបំផ្លាញ និងសេចក្ដីអន្តរាយនៅក្នុងវិថីរបស់ពួកគេ;
8ពួកគេមិនបានស្គាល់ផ្លូវនៃសន្តិភាពឡើយ
ក៏គ្មានសេចក្ដីយុត្តិធម៌នៅក្នុងគន្លងរបស់ពួកគេផង;
ពួកគេបានបង្វៀចផ្លូវរបស់ខ្លួន
ហើយអស់អ្នកដែលដើរជាន់លើផ្លូវនោះ នឹងមិនស្គាល់សន្តិភាពឡើយ។
9ហេតុនេះហើយបានជាសេចក្ដីយុត្តិធម៌នៅឆ្ងាយពីយើងខ្ញុំ
ហើយសេចក្ដីសុចរិតក៏មិនតាមទាន់យើងខ្ញុំ;
យើងខ្ញុំរំពឹងចាំពន្លឺ ប៉ុន្តែមើល៍! មានភាពងងឹតទៅវិញ
យើងខ្ញុំរំពឹងចាំភាពត្រចះត្រចង់ ប៉ុន្តែយើងខ្ញុំដើរក្នុងភាពងងឹតសូន្យទៅវិញ។
10យើងខ្ញុំរាវរកជញ្ជាំងដូចមនុស្សខ្វាក់ភ្នែក
ក៏រាវរកដូចមនុស្សគ្មានភ្នែក
យើងខ្ញុំជំពប់នៅពេលថ្ងៃត្រង់ដូចជានៅពេលថ្ងៃលិច
ក៏ប្រៀបដូចជាមនុស្សស្លាប់នៅក្នុងចំណោមមនុស្សមានសុខភាពល្អ។
11យើងខ្ញុំទាំងអស់គ្នាគ្រហឹមដូចខ្លាឃ្មុំ
ហើយថ្ងូរឥតឈប់ដូចព្រាប។
យើងខ្ញុំរំពឹងចាំសេចក្ដីយុត្តិធម៌ ប៉ុន្តែគ្មានសោះ
ក៏រំពឹងចាំសេចក្ដីសង្គ្រោះ ប៉ុន្តែវានៅឆ្ងាយពីយើងខ្ញុំ។
12ដ្បិតការបំពានរបស់យើងខ្ញុំបានកើនឡើងនៅចំពោះព្រះអង្គ
ហើយបាបរបស់យើងខ្ញុំក៏ធ្វើបន្ទាល់ទាស់នឹងយើងខ្ញុំ;
ការបំពានរបស់យើងខ្ញុំនៅជាប់នឹងយើងខ្ញុំ
ហើយយើងខ្ញុំស្គាល់អំពើទុច្ចរិតរបស់យើងខ្ញុំ
13គឺយើងខ្ញុំបានប្រព្រឹត្តការល្មើស ហើយបដិសេធព្រះយេហូវ៉ា
ក៏បែរចេញពីការទៅតាមព្រះនៃយើងខ្ញុំ
ហើយនិយាយអំពីការសង្កត់សង្កិន និងការបះបោរ
ព្រមទាំងមានផ្ទៃពោះជាពាក្យភូតភរ ក៏បញ្ចេញវាពីចិត្តផង។
14ដូច្នេះ សេចក្ដីយុត្តិធម៌បានថយទៅវិញ
ហើយសេចក្ដីសុចរិតក៏ឈរនៅឆ្ងាយ
ដ្បិតសេចក្ដីពិតបានជំពប់នៅកន្លែងសាធារណៈ
ហើយសេចក្ដីទៀងត្រង់ក៏មិនអាចចូលមកបានដែរ;
15មែនហើយ នៅខ្វះសេចក្ដីពិត
ហើយអ្នកដែលបែរចេញពីការអាក្រក់ក៏ក្លាយជារំពា។
ព្រះយេហូវ៉ាបានទតឃើញ
ហើយការដែលគ្មានសេចក្ដីយុត្តិធម៌ដូច្នេះ
ជាការអាក្រក់ក្នុងព្រះនេត្ររបស់ព្រះអង្គ។
16ព្រះអង្គទតឃើញថា គ្មានអ្នកណាម្នាក់ឡើយ
ព្រះអង្គទ្រង់នឹកឆ្ងល់ថា គ្មានអ្នកណាអង្វរជំនួស
ដូច្នេះព្រះពាហុរបស់ព្រះអង្គបាននាំមកនូវសេចក្ដីសង្គ្រោះដល់ព្រះអង្គ
ហើយសេចក្ដីសុចរិតយុត្តិធម៌របស់ព្រះអង្គក៏ទ្រទ្រង់ព្រះអង្គ។
17ព្រះអង្គបានពាក់សេចក្ដីសុចរិតជាក្រោះការពារទ្រូង
ក៏ពាក់សេចក្ដីសង្គ្រោះជាមួកសឹកលើព្រះសិររបស់ព្រះអង្គ
ហើយគ្រងព្រះពស្ត្រនៃសេចក្ដីសងសឹកជាសម្លៀកបំពាក់
ព្រមទាំងដណ្ដប់អង្គទ្រង់ដោយព្រះហឫទ័យឆេះឆួលជាព្រះភូសា។
18ដូចដែលទង្វើរបស់ពួកគេជាយ៉ាងណា ព្រះអង្គនឹងតបសងយ៉ាងនោះដែរ
គឺសេចក្ដីក្រេវក្រោធដល់បច្ចាមិត្តរបស់ព្រះអង្គ
ហើយសំណងដល់សត្រូវរបស់ព្រះអង្គ;
ព្រះអង្គនឹងតបសងសំណងដល់កោះនានាដែរ។
19នោះពួកគេនឹងកោតខ្លាចព្រះនាមរបស់ព្រះយេហូវ៉ាពីតំបន់ថ្ងៃលិច
ក៏នឹងកោតខ្លាចសិរីរុងរឿងរបស់ព្រះអង្គពីតំបន់ថ្ងៃរះ;
ដ្បិតព្រះអង្គនឹងយាងមកដូចជាទឹកជំនន់ដែលជន់លិច
ដែលខ្យល់របស់ព្រះយេហូវ៉ារុញវាមក។
20“ព្រះប្រោសលោះនឹងយាងមករកស៊ីយ៉ូន
និងអ្នកដែលបែរចេញពីការបំពានក្នុងយ៉ាកុប”។
នេះជាសេចក្ដីប្រកាសរបស់ព្រះយេហូវ៉ា។
21ព្រះយេហូវ៉ាមានបន្ទូលថា៖ “រីឯចំពោះយើង នេះហើយ ជាសម្ពន្ធមេត្រីរបស់យើងជាមួយពួកគេ គឺវិញ្ញាណរបស់យើងដែលសណ្ឋិតនៅលើអ្នក និងពាក្យរបស់យើងដែលយើងបានដាក់នៅក្នុងមាត់របស់អ្នក នឹងមិនចាកចេញពីមាត់របស់អ្នក ឬពីមាត់របស់ពូជពង្សអ្នក ឬពីមាត់របស់ពូជពង្សនៃពូជពង្សអ្នកឡើយ គឺចាប់ពីឥឡូវនេះរហូតអស់កល្បជានិច្ច!”។ ព្រះយេហូវ៉ាមានបន្ទូលដូច្នេះហើយ៕
Currently Selected:
អេសាយ 59: GKHB
Highlight
Copy
Compare
Share
Want to have your highlights saved across all your devices? Sign up or sign in
GLOBAL KHMER BIBLE©
Copyright © 2023 by Global Bible Initiative
