Levitico 7
7
1-2Jiñʌch mandar che' an majqui mi' taj i mul. Ya' ti ajñibʌl baqui mi la' tsʌnsan jini pulbil bʌ c majtan, ya' yom mi la' tsʌnsan jini majtañʌl cha'an mulil. Yom mi la' tsijcʌben i ch'ich'el ti' joytʌlel jini pulʌntib. Ch'ujulʌch ili majtañʌl. 3Jini motomaj mi caj i yʌc' ya' ti pulʌntib pejtelel i lewil yic'ot i ñej, yic'ot i lewil tac i soyta', 4yic'ot i lewil jini cha'p'ejlel i cuchi'tun, yic'ot am bʌ ya' ti' bʌc'tal i pat, yic'ot i cuchi'tun. 5An ti' wenta jini motomaj cha'an mi' pulbeñon ya' ti pulʌntib cha'an i tojol la' mul. 6Cojach jini motomajob yic'ot ch'iton bʌ i yalobilob mi mejlel i c'uxob. Yom mi' c'uxob ya' ti Ch'ujul bʌ Ajñibʌl, come c'ax ch'ujulʌch jini majtañʌl. 7Jun lajal mi caj la' mel yic'ot jini majtañʌl cha'an bʌ i ñusʌntel mandar che' bajche' jini majtañʌl cha'an bʌ mulil. Jini motomaj mu' bʌ i yʌc' ti ñusʌntel jini mulil mi caj i ch'ʌm jini majtañʌl. 8Jini motomaj mu' bʌ i pulbeñon c majtan mi caj i ch'ʌm ja'el i pʌchʌlel jini majtañʌl. 9Jini motomaj am bʌ ti' wenta cha'an mi yʌq'ueñon jini uts'at tac bʌ majtañʌl melbil tac bʌ ti trigo mu' bʌ i colojbajel, mi tiq'uesʌbil ti horno, o mi ch'ilbil, mi caj i ch'ʌm. I cha'añʌch cha'an mi' c'ux. 10Pejtelel yan tac bʌ majtañʌl xajc'ubil bʌ yic'ot aceite, o mi tiquin jach melbil, ti' pejtelel jini i cha'añobʌch i yalobilob Aarón. Junlajal yom mi' tajob.
11Jiñʌch mandar cha'an c majtan che' mi la' subeñon wocolix cʌlʌ cha'an la' coltʌntel. 12Che' mi cʌq'uentel c majtan che' mi la' subeñon wocolix cʌlʌ, yom jini woch'esʌbil bʌ waj mach bʌ anic i levadurajlel, xajc'ubil bʌ yic'ot aceite, yic'ot galleta tac bombil bʌ yic'ot harina xajc'ubil bʌ yic'ot olivo aceite, yic'ot waj melbil bʌ ti harina xajc'ubil bʌ yic'ot olivo aceite. 13Yom mi cʌq'uentel ili majtañʌl temel yic'ot caxlan waj am bʌ i levadurajlel che' mi la' subeñon wocolix cʌlʌ. 14Jini motomaj mi caj i yʌq'ueñon junq'uejl waj loq'uem bʌ ti' yonlel. Jini motomaj mu' bʌ i tsijcʌben i ch'ich'el alʌc'ʌl ti' tojel pulʌntib mi caj i ch'ʌm i colobal c majtan ti chajp ti chajp. 15Jini alʌc'ʌl mu' bʌ cʌq'uentel cha'an mic subentel wocolix cʌlʌ mi caj i c'uxtʌl i bʌc'tal ti jini jach bʌ q'uin. Mach yomic mi' wis cʌytʌl i colobal cha'an yambʌ q'uin.
16Pero mi an juntiquil mu' bʌ i yʌc' majtañʌl tilem bʌ ti' pusic'al che' bajche' tsi' ña'ta i yʌc', mach bʌ cha'anic wocolix cʌlʌ, mi tsa' to colobaji, mi mejlel i cha' c'uxtʌl che' ti yijc'ʌlal. 17-18Mi chʌn an to i bʌc'tal jini we'elʌl che' ti yuxp'ejlel q'uin, yomix mi' pulel ti c'ajc. Mi tsa' to chʌn c'uxle i bʌc'tal jini majtañʌl che' ti yuxp'ejlel q'uin, che' jini lolom jach tsi' yʌc'ʌ. Ma'anix mic ch'ʌm tic wenta come tsa'ix ñumi i yorajlel. Majqui jach mi' c'uxe' mi' taj i mul. 19Mach mejlic mi' c'uxtʌl jini we'elʌl mu' bʌ i pʌjq'uel cha'an cha'an tsi' tʌlʌ chuqui tac jach bibi' tic wut. Wersa yom mi' pulel ti c'ajc. Majqui jach sʌc tic wut mi mejlel i c'ux jini we'elʌl mi ma'anic tsa' pʌjq'ui.
20Pero jini motomaj mu' bʌ i c'ux c majtan che' mic subentel wocolix cʌlʌ, mi max to sʌq'uesʌbilic jini motomaj tic wut, wersa yom mi' chojquel loq'uel ti' tojlel i pi'ʌlob. 21Majqui jach mi' tʌl chuqui bibi' tic wut mi i bibi'lel winic, mi i bibi'lel alʌc'ʌl tac, mi' taj i bibi'lel ja'el. Mi tsi' c'uxu jini majtañʌl tac aq'uebilon bʌ cha'an mic subentel wocolix cʌlʌ, wersa yom mi' chojquel loq'uel ya' ti' tojlel i pi'ʌlob, come tsi' bib'esa jini ch'ujul bʌ, che'en lac Yum.
22-23Lac Yum tsi' cha' sube Moisés: Subeñob jini israelob: Mach mejlic la' c'ux i lewil wacax, mi i lewil tiñʌme' mi i lewil chivo. 24Che' an i lewil jini chʌmen bʌ alʌc'ʌl, mi i lewil yambʌ bʌte'el mu' bʌ i tsʌnsan bajlum ya' ti te'el, mi mejlel la' c'ʌn, pero mach yomic mi la' c'ux. 25Come majqui jach mi' c'uxben i lewil alʌc'ʌl mu' bʌ cʌq'uentel cha'an c majtan, wersa mi caj i chojquel loq'uel ti' tojlel i pi'ʌlob.
26-27Mach mejlic la' c'ux mi ts'ita'ic i ch'ich'el alʌc'ʌl mi te'lemut. Che' an juntiquil winic mu' bʌ i c'uxben i ch'ich'el alʌc'ʌl mi te'lemut, wersa mi caj i chojquel loq'uel ti' tojlel i pi'ʌlob, che'en lac Yum.
28-29Lac Yum tsi' cha' sube Moisés: Subeñob israelob: Jini yom bʌ i yʌq'ueñon c majtan cha'an mi' subeñon wocolix cʌlʌ, la' i ch'ʌmbeñon tilel c majtan. 30Ti' c'ʌb la' i chuc tilel jini majtañʌl mu' bʌ caj i pulbeñon. Yom mi' ch'ʌmbeñon tilel i lewil am bʌ ti' tajn cha'an mi' jʌmts'untel tic tojlel ba'an jini pulʌntib. 31Jini motomaj mi caj i pulbeñon i lewil ya' ti pulʌntib, pero jini i tajn i cha'añʌch Aarón yic'ot i yalobilob. 32-33Yom mi la' wʌq'uen jini motomaj i bʌc'tal i pat am bʌ ti' tojel i ñoj cha'an mi' c'ux. I cha'añʌch jini motomaj mu' bʌ i yʌq'ueñon majtañʌl cha'an wocolix cʌlʌ. 34Come joñon woli cʌq'ueñob motomajob i tajn c majtan mu' bʌ i jʌmts'untel yic'ot i bʌc'tal i pat mu' bʌ i yʌq'ueñoñob jini israelob. Tsa cʌq'ueyob ti' wenta jini motomaj Aarón yic'ot i yalobilob. Che'ʌch yom ti pejtelel ora. 35Ti pejtelel majtañʌl mu' bʌ c pulbentel jiñʌch mu' bʌ caj i yʌq'uentel Aarón yic'ot i yalobilob come tsac wa'chocoyob ti' ye'tel motomaj tic tojlel. 36Jiñʌch c mandar c'ʌlʌl che' bʌ tsac wa'chocoyob ti' ye'tel ti' tojlel Israel. Yom chʌn c'ajalob i cha'an israelob yic'ot i yalobilob ti pejtelel ora, che'en lac Yum.
37Jiñʌch mandar cha'an majtañʌl tac ti chajp ti chajp: jini pulbil bʌ majtañʌl, jini majtañʌl bʌ harina, jini majtañʌl cha'an i tojol mulil yic'ot majtañʌl che' mi' ñusʌntel mandar, yic'ot che' an majqui mi' sʌq'uesan i bʌ, yic'ot cha'an i tijicñʌyelelob i pusic'al. 38Jiñʌch tsa' bʌ i yʌlʌ lac Yum ti' tojlel Moisés ya' ti wits i c'aba' Sinaí, am bʌ ti colem bʌ i tiquiñal pañimil. Tsi' subeyob israelob cha'an mi' yʌq'ueñob i majtan lac Yum.
Currently Selected:
Levitico 7: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
