Levitico 6
6
1-2Lac Yum tsi' sube Moisés: Che' an majch mi' cha'len mulil cha'an chuqui tac jach tsi' cha'le tij contra, ñucʌch i mul tic tojlel. Mi tsi' loti i pi'ʌl, mi tsi' jeme i t'an, mi tsi' xujch'ibe i chubʌ'an i pi'ʌl, mi tsi' tic'la i pi'ʌl, 3o mi tsi' loto chuqui tsa' sajti pero ma'anic tsi' tsictesa, mi tsi' cha'le lot cha'an mi' muc i mul, che' jini an i mul. 4Wersa mi' cha' sutq'uiben i yum chuqui tac jach tsi' ch'ʌmbe, mi i xujch', mi tic'laya, o mi prenda, o mi chuqui tsa' sajti i cha'an bʌ i pi'ʌl, o mi yan tac bʌ tsa' bʌ i mucu che' bʌ tsi' yʌc'ʌ i t'an. 5Ts'ʌcʌl yom mi' toj yic'ot cha'p'ejl i diezmojlel jini chubʌ'añʌl. La' i cha' sutq'uiben i yum ti jini jach bʌ q'uin che' mi' yʌq'ueñon tsʌnsʌbil bʌ c majtan ya' ti Tabernáculo cha'an i mul. 6La' i pʌybeñon tilel juncojt wen uts'at bʌ tat tiñʌme' mach bʌ wis anic i c'amʌjel. Yom mi' yʌq'uen jini motomaj cha'an i tojol i mul. 7Jini motomaj mi caj i yʌq'ueñon tsʌnsʌbil bʌ c majtan cha'an i tojol i mul jini winic. Che' jini mi caj i ñusʌbentel pejtelel i mul, che'en.
Mandar tac cha'an motomajob
8-9Lac Yum tsi' pejca Moisés: Suben Aarón yic'ot i yalobilob jiñʌch mandar cha'an pulbil bʌ c majtan. Wersa mi' yajñel ti c'ajc c'ʌlʌl mi' ñumel ac'ʌlel c'ʌlʌl mi' cha' sʌc'an pañimil. Yom mi' chʌn lejmel c'ajc ya' ti pulʌntib c'ʌlʌl mi' sʌc'an. 10Che' ti sʌc'ajel jini motomaj mi caj i lʌp lino bʌ i pislel ti' pejtelel i cuctal, lino bʌ i borwex, yic'ot lino bʌ i bujc. Yom mi' much'quiben i tʌñʌl ya' ti pulʌntib. Che' jini much'ul jach mi' cʌy ya' ti' t'ejl pulʌntib. 11Ti wi'il yom mi' cha' q'uextan i pislel cha'an mi' lʌp yambʌ i bujc. Che' jini yom mi' loc'san jini tan ya' baqui sʌc pañimil. 12Pero jini c'ajc ya' to bʌ an ba' mi' xic' ya' ti pulʌntib mach yomic mi' junyajlel yajpel. An ti' wenta motomaj cha'an mi' yotsan si' ti jujump'ejl sʌc'ajel. Yom mi' chʌcʌ much'quin jini majtañʌl, cha'an mi' pulel pejtelel i lewil jini majtañʌl mu' bʌ i yʌjq'el, cha'an mi' tajob i tijicñʌyel i pusic'al. 13Ti pejtelel ora yom mi' lejmel jini c'ajc ya' ti' pam jini pulʌntib. Mach yomic mi' wis yajpel.
14Mi caj la' wʌq'ueñon majtañʌl bʌ harina cha'an i bʌl ñʌc'ʌl. An ti' wenta i yalobilob Aarón cha'an mi' pulbeñon. 15Jini motomaj mi caj i ch'ʌm junjojp harina mu' bʌ cʌq'uentel tic majtan yic'ot aceite yic'ot pom. Che' jini la' i pulbeñon c majtan ya' ti pulʌntib. Xojocña i yujts'il mi cubin. 16Aarón yic'ot i yalobilob mi caj i c'uxob i colobal mu' bʌ i cʌytʌl. Mach yomic mi' c'uxtʌl yic'ot levadura ya' ti Ch'ujul bʌ Ajñibʌl. La' i c'uxob i colobal c majtan ya' ti' pat jini pisil bʌ cotot. 17Mach yomic tiq'uesʌbil yic'ot levadura, come tsa'ix cʌq'ueyob i yalobilob Aarón. I cha'añobʌch che' mi' yujtel i pulbeñon c majtan wen ch'ujulʌch che' bajche' jini majtañʌl cha'an mulil, yic'ot jini majtañʌl cha'an bʌ i ñusʌntel mandar. 18Pejtelel winic bʌ i p'olbal Aarón mi mejlel i c'uxob c'ʌlʌl ti pejtelel ora jini loq'uem tac bʌ tic majtan. Cojach jini motomajob mi mejlel i c'uxob jini majtañʌl. Ch'ujul mi' yajñel majqui jach mi' tʌl jini majtañʌl tac, che'en lac Yum.
19-20Che' ja'el lac Yum tsi' sube Moisés: Ti jim bʌ ora che' mi' wa'chocontel Aarón yic'ot i yalobilob ti' ye'tel motomaj, la' i yʌq'ueñon majtañʌl bʌ harina, wen chʌmen bʌ juch'bil. Yom chʌmp'ejl litro. La' i yʌc'ob ojlil ti sʌc'ajel, ojlil ti ic'ajel. 21Yom uts'at xajc'ubil. Yom c'unte ch'ilbil ti sartén yic'ot aceite. Jini bic'ti xut'bil bʌ tsa'ix bʌ tic'a xojocña i yujts'il ti' tojlel lac Yum. 22-23Jini motomaj mi caj i yʌq'ueñon ili majtañʌl che' mi' wa'chocontel ti' ye'tel i yalobil Aarón. Che'ʌch yom ti pejtelel ora ti' tojlel jini motomajob che' bajche' ts'ijbubil. Wersa yom mic pulbentel pejtelel ili majtañʌl. Mach yomic mi' c'uxtʌl, che'en lac Yum.
24-25Lac Yum tsi' sube Moisés: Suben Aarón yic'ot i yalobilob jiñʌch jini mandar cha'an mi' yajpel mulil: Yom mic tsʌnsʌbentel alʌc'ʌl cha'an i tojol mulil. Ya' yom ti jini jach bʌ ajñibʌl ba' tsa' pulbentiyon yambʌ majtañʌl, come ch'ujulʌch. 26Jini motomaj mu bʌ i yʌc' jini majtañʌl cha'an mulil mi caj i c'uxe' ya' ti ch'ujul bʌ ajñibʌl ti' pat jini pisil bʌ cotot ba' mi lac tempan lac bʌ. 27Cojach jini wa'chocobilo' bʌ ti motomajob mi mejlel i tʌlob ili we'elʌl. Mi tsa' pʌjq'ui i pislel ti' ch'ich'el alʌc'ʌl, yom mi' pojquel ya' ti Ch'ujul bʌ Ajñibʌl. 28Jini p'ejt ya' ba' tsa' ch'ʌxle yom mi' tojp'el. Mi' tsa' ch'ʌxle ti p'ejt melbil bʌ ti tsucu taq'uin, yom mi' wen pojquel yic'ot ja'. 29Cojach jini motomajob yic'ot ch'iton bʌ i yalobilob mi mejlel i c'uxob jini we'elʌl, come c'ax ch'ujulʌch. 30Pero mach yomic mi' wis c'uxtʌl jini majtañʌl cha'an i tojol mulil. Mi' ch'ʌjmel ochel i ch'ich'el ili majtañʌl ti Tabernáculo ya' ti Ch'ujul bʌ Ajñibʌl. Yom mi' laj pulel ti c'ajc.
Currently Selected:
Levitico 6: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
