Levitico 8
8
Tsa' sʌq'uesʌntiyob Aarón yic'ot i yalobilob
(Ex. 29.1-37)
1-2Lac Yum tsi' sube Moisés: Yom ma' pʌy majlel Aarón temel yic'ot i yalobilob ya' ti' ti' Tabernáculo ba' mi lac taj lac bʌ. Ch'ʌmʌ majlel i pislel, yic'ot aceite am bʌ i c'ʌjñibal ti boñoñel, yic'ot jini alʌ tat wacax cha'an i tojol mulil, yic'ot cha'cojt tat tiñʌme', yic'ot jini chiquib ba' but'ul jini waj mach bʌ anic i levadurajlel. 3Yom mi la' pʌy tilel jini israelob ti' ti' jini Tabernáculo. Che' tsi' yʌlʌ lac Yum. 4Moisés tsi' mele che' bajche' lac Yum tsi' sube. Tsi' tempayob i bʌ pejtelel israelob ya' ti' ti' jini Tabernáculo.
5Moisés tsi' subeyob: Wʌle wʌ' tempʌbilonla come che'ʌch tsi' yʌlʌ lac Yum, che'en. 6Che' jini Moisés tsi' pʌyʌ tilel Aarón yic'ot i yalobilob. Tsi' pocoyob ti ja'. 7Tsi' lʌpbe i pislel Aarón. Tsi' cʌchbe i cajchiñʌc'. Tsi' yʌq'ue tam bʌ i bujc yic'ot yambʌ junlajm i pislel i c'aba' efod* tsa' bʌ i yʌc'ʌ ya' ti' pam. Tsi' cʌchbe i pislel yic'ot wen uts'atax bʌ i cajchiñʌc'. 8Ya' ti' pam jini efod am bʌ ti' tajn tsi' yʌc'ʌ pisil ba' chucul jini cha'p'ejl xajlel i c'aba' Urim* yic'ot Tumim. 9Ti wi'il tsi' yʌq'ue chan bʌ i pixol ti' jol. Ya' ti pam i pixol tsi' ñʌp'be xelajʌl melbil bʌ ti oro che' bajche' lac Yum tsi' sube Moisés. Jiñʌch ch'ujul bʌ i xojtil i jol.
10Moisés tsi' ch'ʌmʌ jini olivo aceite. Tsa' caji i bon jini Tabernáculo yic'ot pejtelel ya' bʌ an ti' mal. Che' jini tsa' sʌq'uesʌnti ti' wut Dios. Tsa' cʌle ti' wenta Dios. 11Wucyajl tsi' tsijca jini pulʌntib. Che' ja'el tsi' tsijca pejtelel chuqui tac c'ʌmbil, yic'ot i yajñib, yic'ot i buchlib. Tsi' laj sʌq'uesa. 12Moisés tsi' mulbe aceite ti' jol Aarón cha'an mi' wa'chocon ti' ye'tel. 13Ti wi'il tsi' pʌyʌ tilel i yalobilob Aarón. Tsa' caji i lʌpbeñob i pislel. Tsi' cʌchbeyob i cajchiñʌc'. Tsi' yʌq'ueyob i cʌjchil i jol che' bajche' lac Yum tsi' sube Moisés.
14Ti wi'il tsa' caji i c'ajtin tilel jini alʌ tat wacax cha'an mulil. Aarón yic'ot i yalobilob tsi' yʌc'ʌyob i c'ʌb ya' ti' jol jini wacax cha'an mi' ñusʌbentelob i mul. 15-16Moisés tsi' tsʌnsa jini alʌ tat wacax. Tsi' ts'aja i yal i c'ʌb ti' ch'ich'el. Tsa' caji i bomben i xulub am bʌ ti' xujc tac jini pulʌntib cha'an mi' sʌq'uesan. Tsi' beq'ue i colobal jini ch'ich' ya' ti' yebal jini pulʌntib. Che' jini tsi' sʌq'uesa yic'ot majtañʌl cha'an i tojol mulil. Moisés tsi' laj ch'ʌmbe i lewil i soyta', yic'ot i lewil i yolmal, yic'ot am bʌ ti cha'p'ejlel i cuchi'tun. Tsi' yʌc'ʌ ti pulel pejtelel i lewil ya' ti pulʌntib. 17Tsa' puli i bʌc'tal jini wacax yic'ot i pʌchʌlel, yic'ot i ta' ya' ti' junwejlel jini tejclum che' bajche' lac Yum tsi' sube Moisés.
18Ti wi'il Moisés tsi' pʌyʌ tilel jini tat tiñʌme' cha'an mi' yʌq'uen lac Yum. Aarón yic'ot i yalobilob tsi' c'ʌcchocoyob i c'ʌb ya' ti' jol jini tat tiñʌme'. 19Che' jini Moisés tsi' tsʌnsa jini tat tiñʌme'. Tsa' caji i tsijcʌben i ch'ich'el ya' ti' joytʌlel jini pulʌntib. 20Tsi' bic'ti t'ojo jini tiñʌme'. Tsi' pulbe i jol yic'ot pejtelel jini t'ojbil tac bʌ yic'ot i lewil. 21Moisés tsi' pocbe i soyta' yic'ot i yoc tac. Tsi' laj otsa ti c'ajc ya' ti pam pulʌntib, come jiñʌch pulbil bʌ i majtan lac Yum, xojocña bʌ mi' yubin. Moisés tsi' mele pejtelel tsa' bʌ i yʌlʌ lac Yum.
22Ti wi'il Moisés tsi' c'ajti tilel jini yambʌ tat tiñʌme' cha'an mi' wa'chocon jini motomajob ti' ye'tel. Aarón yic'ot i yalobilob tsi' c'ʌcchocoyob i c'ʌb ya' ti' jol jini tat tiñʌme'. 23Che' jini Moisés tsi' tsʌnsa jini tat tiñʌme'. Tsi' ch'ʌmbe lamital i ch'ich'el. Tsi' bombe ñoj bʌ i chiquin Aarón yic'ot ñoj bʌ i ña'al i c'ʌb yic'ot jini ñoj bʌ i ña'al i yoc. 24Che' ujtemix tsi' pʌyʌ tilel i yalobilob Aarón. Moisés tsi' bombeyob ti ch'ich' jini ñoj bʌ i chiquin ya' ti' yebal ba' c'un yic'ot ñoj bʌ i c'ʌb yic'ot ñoj bʌ i ña'al i yoc. Tsi' tsijca i colojbal jini ch'ich' ti pulʌntib. 25Ti wi'il tsi' ch'ʌmbe pejtel i lewil, yic'ot am bʌ ti' ñej, yic'ot am bʌ ti' soyta', yic'ot i yolmal, yic'ot i cuchi' tun, yic'ot i lewil i bʌc'tal i pat. 26Tsi' ch'ʌmʌ junq'uejl waj mach bʌ anic i levadurajlel am bʌ ti chiquib ti' tojel lac Yum. Tsi' ch'ʌmʌ ja'el junq'uejl waj xajc'ubil bʌ yic'ot aceite, yic'ot junq'uejl galleta. Tsi' yʌc'ʌ tac ti' pam i lewil tac yic'ot ti' pam jini ñoj bʌ i yoc tiñʌme'. 27Tsi' yʌq'ue tac ti' wenta Aarón yic'ot i yalobilob cha'an mi' jʌmts'uñob ti' tojlel lac Yum come jiñʌch jʌmts'ubil bʌ i majtan. 28Ti wi'il Moisés tsi' cha' ch'ʌmʌ jini majtañʌl. Tsa' caji i pule' ti pam jini majtañʌl ya' ti pulʌntib. Jiñʌch jini pulbil bʌ i majtan lac Yum. Lac Yum tsi' mula jini i majtan.
29Moisés tsi' ch'ʌmbe i tajn alʌc'ʌl. Tsi' yʌq'ue jʌmts'ubil bʌ i majtan lac Yum. Jiñʌch tsa' bʌ aq'uenti i c'ux Moisés che' bajche' lac Yum tsi' yʌq'ue mandar. 30Tsi' ch'ʌmʌ ja'el jini aceite yic'ot jini ch'ich' am bʌ ti pulʌntib. Tsa' caji i tsijcan Aarón yic'ot i yalobilob yic'ot i pislelob. Che' jini Moisés tsi' yʌc'ʌ ti' c'ʌb Dios jini motomaj Aarón yic'ot i yalobilob yic'ot pejtel i pislelob. 31Moisés tsi' sube Aarón yic'ot i yalobilob: Yom mi la' ch'ʌx jini we'elʌl ya' ti' ti' jini Tabernáculo baqui mi lac tempan lac bʌ yic'ot lac Yum. Ya' yom mi la' c'ux yic'ot waj ya' ti' tojel lac Yum che' bajche' tsac subeyetla. 32Yom mi la' pul i colobal jini we'elʌl yic'ot jini waj. 33Wucp'ejl q'uin ya' yom mi la' wajñel ti' ti' jini Tabernáculo. Mach yomic mi la' loq'uel jinto mi' yujtel la' sʌq'uesʌntel, come wucp'ejl q'uin yom cha'an mi' ts'ʌctiyel la' sʌq'uesʌntel. 34Jini tsa' bʌ ujti sajmʌl jiñʌch tsa' bʌ i yʌlʌ lac Yum cha'an mi' tojtʌl la' mul. 35Wucp'ejl q'uin yom mi la' wajñel ti' ti' jini Tabernáculo ti q'uiñil yic'ot ti ac'ʌlel cha'an ma'anic mi la' chʌmel, come che'ʌch tsi' subeyon lac Yum, che'en Moisés. 36Ts'ʌcʌl tsi' mele Aarón yic'ot i yalobilob che' bajche' lac Yum tsi' sube Moisés.
Currently Selected:
Levitico 8: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
