Exodo 24

1Lac Yum tsi' sube Moisés: Yom ma' letsel tilel ba' añon awic'ot Aarón, Nadab, Abiú, awic'ot lujuntiquil i chʌnc'al xñoxo' bʌ ti Israel. Ñajt mi caj i ch'ujutesañoñob. 2Cojach Moisés mi caj i ñochtañon. Jini israelob ma'anic mi caj i letselob ti wits. Che' tsi' yʌlʌ lac Yum Dios.

3Che' bʌ tsa' cha' sujti Moisés, tsi' subeyob winicob x'ixicob pejtelel i t'an lac Yum, yic'ot pejtelel i mandar tac. Ti pejtelelob tsi' jac'ʌyob ti jump'ejl i pusic'al: Mux c mel lojon ti pejtelel che' bajche' tsi' yʌlʌ lac Yum, che'ob. 4Moisés tsi' ts'ijbu pejtelel i t'an lac Yum. Tsa' ch'ojyi ti wen sʌc'an. Tsi' melbe i pulʌntib i majtan Dios ya' ti' yebal wits. Tsi' mele lajchʌntejc wa'al bʌ xajlel cha'an jini lajchʌnmojt israelob. 5Tsi' choco majlel ch'iton winicob cha'an mi' pulbeñob i majtan Dios. Tsi' tsʌnsʌbeyob alʌ tat wacax cha'an mi' yʌq'ueñob Dios wocolix i yʌlʌ. 6Moisés tsi' ch'ʌmʌ ojlil i ch'ich'el wacax. Tsi' yotsa ti p'ejt tac. Ojlil tsi' c'ʌñʌ i tsijcʌben i pulʌntib. 7Tsi' ch'ʌmʌ jini jun cha'an xuc'ul bʌ t'an. C'am tsi' pejca ti' tojlel winicob x'ixicob. Tsi' jac'ʌyob: Mi caj c mel lojon ti pejtelel che' bajche' tsi' yʌlʌ lac Yum, che'ob. 8Moisés tsi' ch'ʌmʌ jini ch'ich' cha'an mi' mul winicob x'ixicob. Tsi' yʌlʌ: Jini ch'ich' i wentajʌch i sellojlel jini xuc'ul bʌ t'an, come lac Yum tsi' yʌq'ueyetla pejtel ili mandar mu' bʌ caj la' jac'.

9Tsa' letsi majlel ti wits Moisés yic'ot Aarón yic'ot Nadab yic'ot Abiú, yic'ot lujuntiquil i chʌnc'al (70) ñoxo' bʌ israelob. 10Jini israelob tsi' q'ueleyob i Dios Israel. Che' yilal i t'uchlib i yoc che' bajche' tʌsbil bʌ zafiro xajlel. Wen yʌx che' bajche' pañimil che' wen jamʌlix. 11I yumob israelob tsi' q'ueleyob Dios pero ma'anic tsa' chʌmiyob. Tsi' cha'leyob we'el uch'el.

12Lac Yum tsi' sube Moisés: La' ti wits ba' añon. Pijtañon ilayi. Mi caj cʌq'ueñet wechel bʌ xajlel ba' tsac ts'ijba jini mandar tac cha'an ma' cʌntesan jini winicob x'ixicob, che'en. 13Tsa' majli Moisés yic'ot Josué i winic. Moisés tsa' letsi ti wits ba'an Dios. 14Moisés tsi' sube jini xñoxo' bʌ: Pijtanla wʌ'i jinto mic cha' tilel lojon ba' añetla. Awilan wʌ'an Aarón yic'ot Hur la' wic'ot. Mi an wocol ti la' tojlel cucula ba' añob cha'an mi la' mel la' bʌ.

15Tsa' ujti ti t'an, tsa' letsi majlel ti wits. Mʌcʌl jini wits cha'an tocal. 16Ya'an i ñuclel lac Yum ti' pam wits Sinaí. Jini tocal tsi' mʌcʌ jini wits wʌcp'ejl q'uin. Che' ti wucp'ejlel q'uin Dios tsi' pejca Moisés ya' ti' yojlil jini tocal. 17Jini israelob tsi' q'ueleyob i ñuclel lac Yum che' bajche' c'ajc woli bʌ ti lejmel ya' ti pam wits. 18Moisés tsa' ochi ti mal tocal che' bʌ tsa' letsi majlel ti wits. Tsa' cʌle ti wits cha'c'al q'uin cha'c'al ac'ʌlel.

Currently Selected:

Exodo 24: CTU77

Highlight

Copy

Compare